ڕابەر قەرەداخی21/7/2019 301 جار بینراوە

وەڵامێک بۆ شینەی شاوڵ بۆ ڕێبوار كەریم مەحمودی لای بەرهەم ساڵەح

 

ئەوە ئەڵێن لە شاری کفری کۆن دەستەگەری زۆر هەبووە، کەسیش نەبووە ببێتە کوێخای ئاوایی، کابرایەکی بێ سەروسەوداو شڕپۆخ و پیسخۆر هەبووە ناوی « شینەی شاوڵ» بووە، هەر بۆ خۆشی ئەیکەن بە ئاغا، «کفری» یش سەرەڕێ بووە، کە ڕێبوار هاتونەتە ناوچەکە وتویانە کێ دەم سپی تانە، وتویانە شینەی شاوڵە، ئیتر بوەتە بەزم وتویانە:


ئەوسا زانیم کفری کاولە
ئاغای دیوەخان شینەی شاوڵە
جا ئەوە بەڕێز « مەلابەختیار» کە پەنجا ساڵ خەباتی لە شاخ و شار هەیە، پرۆژەیەکی لە بەرمەبنای ئەزمونی خۆی و کێشە کەڵەکەبووەکانی ناو یەکێتی پێشکەش کردووە، کە زۆرینەی هەرە زۆری تێکۆشەرەکانی یەکێتی پرۆژەکە بە هەڵسانەوەی یەکێتی ئەبینن. کەچی هەر لە خۆیەوە میرزایەک لای دکتۆر بەرهەم ساڵەحەوە بەناوی « ڕێبوار کەریم مەحمود» هاتووە وەڵامی بەڕێز مەلا بەختیار ئەداتەوە، لەم سەدەها و هەزارەها کەوادیرە ڕۆشنبیرو قوربانیدەرو ڕێکخستنەی یەکێتی خۆی هەیەتی چار نییە مەگەر « شینەی شاوڵێک»ی وەک ڕێبوار لە دەرەوەی یەکێتیەوە بکەین بە دەم سپی خۆمان :


یەکەم: ئەم « ڕێبوار کەریم» ە هەقی خۆیەتی وەڵامی کاک مەلابەختیار و هەرکەسێکی یەکێتیش بداتەوە، چونکە خۆی ڕۆژێک یەکێتی نەبووەو لەسەر شانی سەدەها هەزار کادیر و گەنج و خانەوادەی شەهیدی یەکێتی چۆتە پەرلەمان، ئەگەر بە پارەی یەکێتی، بە سەیارەو کەرەستەو ، ئەو ئازادییەی یەکێتی بۆ ئەوو ئاغاکانی فەراهەم کردووە نەبوایە، ئەو ئیشی چی بو لە پەرلەمان؟. ئەبو وەک ئەوسا قۆڵی بەرپرسێکی کۆمەڵەی خوێندکارانی گرتبایەو، بهاتایە بۆ لای مەلا بەختیار تا لەناو زانکۆ کەمێک موراعاتی پۆخڵەواتەکانی بکەن...


دووەم: پرۆژەکەی مەلا بەختیار کە خۆی لە دوو بەشدا ئەبینێتەوە، بەشی یەکەمی ڕەخنەو دەستخستنە سەربرینەکانە، ڕێبوار و نمەک حەرامەکانی وەک ڕێبواری سەخڵەت کردووە. بۆیە لە کۆی دەیان هەزار ووشە و سەدان دێڕ ئەوە باشە کە ڕێبوار مەوزوعێکی بۆ خۆی بینیوەتەوە تا لەم بازاڕشێواویەی ناو یەکێتی و سلێمانی دا خۆی پێ بکا بە مەوزوع....


سێیەم: شێخ ڕەزا واتەنی « ئەسڵی مەقسەد» ئەوەیە کە دار هەڵبڕی سەگی دز دیارە، هەروەها لەوە ئەسڵتر لە مەقسەدی هەموو یەکێتیەکاندا ئەوەیە کە چۆن ئەبێت کەسێک بڕواو مەبدەئی بە حیزبێک نەبێت و جێگری سکرتێری گشتی حیزبەکەش بێت؟!. گەلۆ بەرهەم ساڵەح لە کوێدا بڕوای بە یەکێتی هەیە کە هەموی دوێنێ بو بۆی بکرایە یەکێتی لە ڕەگ و ڕیشەوە هەڵدەکێشا!!!.

 

چوارەم: حیزب بریتیە لە ئایدۆلۆجیاو ڕێکخستن و هێڵی هاوبەش، نەک کەرەستەیەک بۆ بزنس و بازرگانی کردن، ڕێبوار لە سەرۆکە بێ بەرهەمەکەی پرسیوە زانکۆی ئەمریکیت بە پارەی کێ دانا!؟. سەدان دۆنم زەویت چۆن لەسەر خێزانەکەت تاپۆکرد؟. لەسەر پشت و حیسابی هەزارەها تێکۆشەرو کەمئەندامی سەنگەری ئەم حیزبەی ئێمە بایی چەن ملیار دۆلار دەست لەگەڵ کریزنت پیترۆلیۆم تێکەڵەو چەنت داوە بە میرزاکانی میدیای ئەهلی جاران تا یەکێتی پێ بچوک بکەنەوە؟.


پێنجەم: ئەگەر بەرهەم ساڵەح ئەونە سەرکەوتووە کە ئیدارەی عێراق و دیموکراسی ئەدات، ئەددی پێمان ناڵێن بۆچی هاوڕێ و هەڤاڵەکانی تا دوێنێ عەڕرابی کارو پرۆژەکەی بون ئیمڕۆکە لێی کەوتونەتە تەقەو بە بێ وەعدو بێ ئەمەک ناوزەندی ئەکەن؟. ئەبێت باش بزانن، یەکێتی یەکێتیەو، وەک چۆن گڕ و پڕی بە هەزارەها شەوەزەنگ و تاریکی برد، ئاوهاینەکەش پڕ بەو مشەخۆر و بێ پرەنسیپی و مۆراڵانە ئەبات کە تەوریان بۆ بڕینەوەی داری سەوزی یەکێتی حازرکردو، حازرکردووە.


شەشەم: هەقە بۆ مێژوو ئەو خاڵە تۆخ بکرێتەوە، کە دەیان پەرلەمانتارو وەزیرو سەدەها کادیری پێشکەوتووی یەکێتی شاهیدن ساڵی (٢٠١٣) بەرهەم ساڵەح عەڕڕاب و ئەندازیاری لێک هەڵوەشانەوەی ڕێککەوتنی ستراتیجی یەکێتی و پارتی بو، کە سوور بو لەسەرئەوەی یەکێتی بە لیستی جیا بەشداری هەڵبژاردن بکات، دواتر ئەنجامەکەی بینرا، وە تا ئیستەیش یەکێتی باجەکەی ئەدا، هەر بەرهەم ساڵەح بو بێوەفاو هەلپەرست بو هێشتا پرسەکەی جەنابی مام جەلال تەواو نە بو بو، رێبازەکەی مام ی پەرت کردو، حیزبی جیاکردەوە. خەڵکی کوردستان و یەکێتیەکان ئەو دیمەنانەیان لە پێش چاوە کە مەلا بەختیار جوامێرانە ماڵ بەماڵ و شار بەشار دەنگی بۆ یەکێتی کۆ ئەکردەوە، ئەو دیمەنەیان لە پێش چاوە کە مەلا بەختیار لەکەناڵی ڕووداو لە دیمانەکەی ڕەنج سەنگاوی چۆن وەسفی هەلپەرستی و نا موستەهەقی بەرهەم ساڵەحی کرد کە لیستی دژی یەکێتی جیا کردبوەوە. ئیمڕۆکەش لەسەر شانی یەکێتی دیسان کەوتونەتەوە کوتلە بازی و وەزیر و گزیر دانان، بۆ ئەوەی پرۆژەکانی خۆتانیان لە ڕێی حکومەتەوە پێ بەڕێ بخەن. هێشتا هاتون تانەو تەشەر لە پرۆژەیەک ئەدەن کە بۆ سەرپێخستنەوەی یەکێتی پێشکەشکراوە؟!.


لە کۆتاییدا، بەڕێز مەلا بەختیار ئەوە دە مانگە وازی لە بەشداری کردن لە کۆبونەوەکانی مەکتەبی سیاسی حیزب هێناوە، ئیستەیش پرۆژەی هەیە بۆ ئەوەی یەکێتی بکاتەوە بە خۆی لە هەموو ئاستەکاندا، ئەکرا ئێوە کە هیچ پەیوەندییەکتان بە یەکێتیەوە نیەو، ئەگەر « بەرهەم» ێکتان هەبوایە ئەبو ئەم پرۆژەیە دەوڵەمەن بکەن. بەڵام ناهەقتان نییە ترستان لەگەورەبونەوەو هەستانەوەی یەکێتی هەیە، چونکە ئێوە ئەو دزەن کە سودتان لە بازاڕی شێواو بینیوە.

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure