د.محه‌مه‌د عه‌لى7/6/2019 231 جار بینراوە

نێچیرڤان بارزانى سەرکەوتوو بووە؟

لەسەرو بەندى وەرگرتنى پۆستى سەرۆکى هەرێمدا، گروپێکى تێکەڵ لەکوتلەى حزب و وەزیرى موستەفید و میدیاى (یەکەمى بێڕکابەر)، خەریکى تەرویجدانن بەو بیرۆکەیە کە گوایە نێچیرڤان بارزانى لە ڕابردودا، سەرۆک وەزیرانێکی سەرکەوتوو بووە و دەتوانێت لەپۆستى داهاتووشیدا، پۆستی سەرۆکی ھەرێم، سەرکەوتوبێت. بەڵام:


یەکەم: ئەگەر قسەکە لەسەر سەرکەوتن بێت، ئەکرێت بڵێین نێچیرڤان بارزانی لە ڕواڵەتدا سەرکەوتو بووە، توانىویەتی خۆى وەک کەسێکی سەردەمییانە نمایشبکات، کە شانبەشانى شیکپۆشى و ڕەفاهیەت و خۆشگوزەرانیەکانى سیاسییە مدیاییەکانی دونیاى هاوچەرخ هەنگاودەنێت. بەشێوەیەک ئەم پیاوە زیاتر وەک نمایشکارێکى جوانپۆش دەربکەوێت تا ئەوەى سەرۆکى میلەتێکی چەوساوە و سەرۆکی وڵاتێکى نەوتى کە توانیبێتی لانیکەم لە چلەی زستاندا تەنەکەیەک نەوت بۆ ئەو خەڵکەی حوکمیان دەکات دابین بکات. لەبوارێکى ترشیدا ئەکرێت بە دەستکەوت و سەرکەوتن بۆى حسابکرێت: بواری دەستبڵاوى و هەڵڕشتنى پارەیەکى بێشومار بۆ زۆرێک لە وەزیرو بەرپرسەکانى کابینە یەک لەدواى یەکەکانی، تا ئاستى چاو بەرەوژێ پێکردنیان و کڕین و گۆرینى ئینتماى سیاسیان، ئەمەش لەبەرژوەندى خۆى و حزبەکەى. هاوکات لەوەشدا سەرکەوتوبووە کە میدیایەکى موسریف و زەبەلاح بۆ ئارایشت و جوانکردنى خۆى دابمەزرێنێت بەپارەى سەرەو نوگمکراوى خەڵک، بەشێوەیەک ئەم میدیایە ڕەشى بۆ بکات بەسپى و سپى بۆ بکات ڕەش. بە کورتی ناوبراو وەک پیاوێکی جوان پۆش و موسریف و وەک کەسێک ھەندێک لە وەزیری حیزبەکانی تر بکڕێت، کەسێکی سەرکەوتووبووە.
دووەم: خۆ ئەگەر قسە لە دەوڵەتدارى بێت، ئەوا شکست و سەرکەوتن پێوەرى خۆى هەیە. هەموو کارێکیش بە ئەنجامەکەیدا هەڵسەگاندنى بۆ دەکرێت. دواى نزیکەى بیست ساڵ نێچیرڤان بارزانى حکومەتێکى قەرزار و قاسەیەکى بەتاڵ و ئابورییەکى داتەپیو و ناڕوونیەکى گەورە لە داهاتى گشتى جێدەهێڵێت. چەند ساڵێکە حکومەتی ھەرێم بودجەى گشتى نییەو ئەگەر بەغداد نەبێت تواناى دابینکردنى نیو مووچەشى نیە بۆ فەرمانبەرەکانی. هیچ دەزگایەکى چاودێریش نییە لە داهات و خەرجى بپرسێتەوە. حکومەتێک خاوەنى هیچ پڕۆژەیەکى ستراتیجى و تەنانەت خزمەتگوزراى گشتی ئەوتۆش نییە. بەو شێوەیەش باس لە کەوتنەژێر قەرزێک ده‌كرێت كه‌ بەبیست ملیارد دۆلار ده‌خه‌مڵێنرێت. ئەمە لەکاتێکدا ڕۆژانە دەیان هەزار بەرمیل نەوت ڕەوانەى بازاڕەکانى جیهان دەکات، تائێستاش نەمانزانى ئەم (دەوڵەتمەدارە) چەند ساڵە لەگەڵ ئاشتى هەورامى نەوت ئەکڕێت یان ئەیفرۆشێت؟!


سێیەم: سیاسەتى ئابوریی سەربەخۆ دەکرێت وەک کارەستاویترین پڕۆژەى نێچیرڤان بارزانى و حوکمڕانییەکەى تەماشابکرێت کە تا دەیان ساڵى تریش خەڵکى کوردستان لە ژێر بار و لێکەوتە خراپەکانی دەرناچن. بەهەموو پێوەرێک ئەم شکستە چارەکە سەدەیەک خەڵکى گەڕانەوە دواە. ئەگەر کوردستان نەبوایە، ئەوا نێچیرڤان و حکومەتەکەى نەک هەر لەکار دەخران، بەڵکو وەک بەڵایەکى نیشتمانییش دەخرانە ناو قەفەزى دادگاوە.


چوارەم: گەندەڵى، بەهەدەردانى ماڵى گشتى، بەرتەسککردنەوەى ئازادییەکان، ململانێى بەردەوامى هەرێم و بەغداد لەسەر نەوت و سەرەنجامیش سزادانى خەڵکى کوردستان، بڕیاری چارەکە موچە و مامەڵەکردنێکی نامەدەنیانە لەگەڵ خۆپیشاندەران و مامۆستایان لە هەرە سیما دیارەکانى حوکمڕانى نێچیرڤان بارزانییە. وێڕاى ئەوە بەهایەکى بۆ پەرلەمان و دەسەڵاتى چاودێریکردن و داداگاکان و داواکاری گشتی نەهێشتەوە. نەک خۆی، بەڵکو ڕێگەى نەدا وەزیرەکانیشی بۆ لێپێچینەوە بچنە پەرلەمان، بەوەش گلۆپى سەوزى بۆ هەڵکردن بۆ برەودان بەگەندەڵى و سەرپێچیکردنى یاسا.


پێنجەم: یەکێک لەگەورەترین ئابڕوبەرییەکانى سەردەمى حوکمڕانى نێچیرڤان بارزانى: ڕازیبونى بوو بەدەرکردنى وەزیرەکانى بزوتنەوەى گۆڕان لە کابینەى هەشتەم و بەئاشکرا بوو بە بەشێک لە پرۆسەى بێڕێزیکردن بەرامبەر بەدامەزراوەى پەرلەمان و سەروەرى یاسا لە کوردستان. وێڕای کشانەوەى وەزیرەکانى کۆمەڵ و یەکگرتووش لە حکومەت، لەکۆى پێنچ هێزی سیاسیی تەنها پارتى و یەکێتى مانەوە. بەڵام بۆ درێژەدان بە حکومەتە فاشیله‌کەى، زۆرینەى وەزارەتەکانى بەوەکالەت بەڕێوەبرد.


شەشەم: ڕوون و ئاشکرایە پەیوەندی خوێن و خێزان و بنەماڵە (تەوریسی سیاسی)، ڕۆڵی سەرەکیان ھەبوە لە ھاتنەپێشەوەی نێچیرڤان بارزانى و سەرجەم دەرگاکانى بەڕوودا کراوەتەوە. توانیویەتى لەو ڕێیەوە دەستبەسەر سەرچاوەکانى داهاتدا بگرێت و زۆرێک لەکایەکانى تریشى بۆ مسۆگەر کردوە. وێڕای ئەم دەستکراوەی و ئەو ماوە زۆرەى لەبەردەمیدا بوو، ناوبراو کە جێگرى سەرۆکى پارتیش بووە، بەڵام شکستی خوارد بە هەموو پێوەرە نێودەوڵەتییەکانی حکومڕانیی باش (شەفافیەت، سەروەری یاسا، کۆنترۆڵکردنی گەندەڵی، لێپرسینەوە، عەدالەت و حكومه‌تی هاوڵاتیی، حکومەتی وەڵامدەرەوە، بەشداری پێکردن، لێوەشایی لە بڕیارو کرداردا).


حەوتەم: لە هەمووى کارەساتتر، لەبرى خەڵک و چین و توێژە جیاوازەکان هەڵسەنگاندن بۆ سەردەمى حوکمڕانى نێچیرڤان بارزانى بکەن، بەوپێەى هەموو هەنگاو و بڕیارەکانى نێچیرڤان بارزانی لە ژیان و گوزەرانى ئەواندا ڕەنگیداوەتەوە، کەچى کۆمەڵێک وەزیرى موستەفید ئەو ئەرکەیان داوە بە سەرشانى خۆیانداو کەوتونەتە شایەتیدانى ناهەقى. ئەمە جگە لە کەناڵە (یەکەمە بێڕکابەرەکەی ) خۆیشی.


هەشتەم: مەولود باوەموراد و ڕێباز حەملان دەڵێن: نێچیرڤان بارزانى لە حکومەتدا دەوڵەتداریى دەکات نەک حزبایەتى. زەحمەت نەبێت دەرکردنى چوار وەزیر و سەرۆکى دەستەیەک و چەندین ڕاوێژکار و بەڕێوەبەرى گشتىی لەسەر دەستى نێچیرڤان بارزانى، دەوڵەتداریی بو یان حزبایەتی؟


نۆیەم: ئه‌م سه‌رۆكه‌ نوێیه‌ له‌ ماوه‌ی ته‌مه‌نی حوكمڕانیی دوورودرێژی خۆیدا جگه‌ له‌ شكست و جێبه‌جێنه‌كردنی په‌یمانه‌كانی شتێكی تری له‌ كه‌لتوری سیاسیی هه‌رێمی كوردستاندا به‌جێنه‌هێشتووه‌. باڵاترین نموونه‌ش ئه‌و په‌یمانه‌ بوو كه‌ له‌ ده‌وره‌ی پێشوی هه‌ڵبژاردندا به‌ خه‌ڵكی دا، كه‌ گوایه‌ كۆمپانیایه‌ك دروستده‌كات و هه‌موو هاوڵاتیانی هه‌رێم له‌و كۆمپانیایه‌دا پشكیان له‌ فرۆشی نه‌وتی هه‌رێمدا ده‌بێت. ده‌رئه‌نجامی ئه‌م مژده‌ و په‌یمانه‌ ناڕاستانەش له‌مڕۆدا به‌ڕوونی دیاره‌، چونكه‌ هاوڵاتیانی هه‌رێم به‌ چه‌شنێ بێڕێزکراون وه‌ك منەتکردن بەسەریاندا، چاوه‌ڕوانی مووچه‌كانی خۆیانن.


ده‌یه‌م: ده‌شێت چه‌ند ڕۆژێكی تر له‌ مه‌راسیمێكی شاهانه‌و گرانبەھادا، كه‌سایه‌تییه‌ سیاسیی و دیپلۆماسییه‌كانی دونیا داوه‌تده‌كرێن و تاجی سه‌رۆكایه‌تی بخرێته‌ سه‌رت، به‌ڵام ئه‌وه‌ت بیرنه‌چێت به‌ ده‌نگی چه‌ند هێزی سیاسیی كرایت به‌ سه‌رۆكی هه‌رێم؟ جه‌نابتان لە ڕۆژی ٢٠١٩/٥/٢٨، بەدەنگی ٦٨ ئەندام پەرلەمان بویت بەسەرۆکی ھەرێم، ئەرێ بەڕاست کاردانەوەی ڕای گشتی کوردستان (جگە لەکادیرەکانی حیزبەکەت، ئەوانیش ھەمویان نا!)، ئیجابی بو؟! یاخود ھەستت کرد ھاوڵاتیان بەگشتی دڵخۆشن؟ بەلایەنی کەمەوە دەبێ دڵخۆشییەکە لە دەنگدەرانی ئەو ٦٨ ئەندام پەرلەمانەدا ڕەنگبداتەوە!

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure