دڵشاد مه‌جيد8/3/2019 261 جار بینراوە

بۆ دواڕۆژی ململانێی دەسەڵات لە نێوان پارتی و یەکێتی..

 

زۆربەی ئەو خوێندنەوە و شرۆفە سیاسی و فیکریانەی بۆ دواڕۆژی دەسەڵات و بەرێوەربردنی ئیدارەی ھەرێم لەنێوان ململانێی یەکێتی و پارتی لەلایەک.. و ململانێ یا ھەمانەگی حزبەکانی تر لەگەڵ ئەو دوو جەمسەرەی ھێز دەکرێ..

ش
خوێندنەوەکان کورتبینی و ترس و رق و قینە و ھەناسە سواری و پەشۆکاوی پێوە دیارە.. خوێندنەوەکان ھیچ حسابی بۆ فاکتەر و ڕەھەندە دەرەکیەکان و پارسەنگی ھێزو و ململانێنیە ئیقلیمیەکان ناکات.. ھەروەھا خوێندنەوەکان خۆی لە ململانێنی ناو خودی حزبەکان بۆ گرتنە جلەوی دەسەڵات بەدوور گرتووە.. خوێندنەوەکان زۆر لۆکاڵین، کەچی ھێزەکان ململانێکانیان لەدەرەوەی لۆکاڵەکەیە..

 

بۆیە ئەو خوێندنەوانە بە خوێندنەوەیەکی میتۆدی لێکۆلینەوەی زانستی دانانرێ و لە لۆژیک و مەنتقی ململانێی سیاسی دوورن.. بۆیە دەبێت ڕەھەندە لۆکاڵیەکان و دەرھاویشتە دەرکیەکان پێکەوە ھاوتەریب بخرێنە ڕوو، ھەروەک لەزانستی لێکۆڵینەوە پێی دەڵێن فاکتەرە بابەتەتیەکان و گشتیەکان، یا ناوخۆوی ودەرەکیەکان..( ذاتی و موضوعي)...

 

زیاتر خوێندنەوەیە بۆ دیاردەکان.. ئەو دیاردانەش تەنیا چەند مناوەرەکی سیاسیە بۆ ئامانجە ستراتیجیەکان.. کە تا ئێستا نەک رۆشەنبیران و چاودێرە سیاسیەکان و بەڵکو ھێزە سیاسیەکانی دەرەوەی یەکێتی و پارتی بێ ئاگان لێین..

 

گرنگرترین خاڵ کە تا ئێستا ئێمە دوای پرۆسەی فەشەلی ریفراندۆم و لێکەوتەکانی .. لێیتێنەگەیشتووین ئەوەیە ..
ئەمرۆ شتێک نیە بەناوی ململانێی ھەرێم و ناوەند..


ئەمرۆ پرۆسەیەک ھەیە پێی دەڵێن ، ھەوڵدان بۆ لێک نزیکردنەوەی ھەرێم و بەغدا و سفرکردنەوەی کێشەو ململانێکانی نێوان ھەرێم و بەغدا واتە گەرانەوەو پابەندبوون بەناوەند..
بەواتایەکی تر ئەوەی لەناوەند پێگەی ھەبێ لەھەرێمیش پێگەی دەبێ.. بەڵام دەبێ ئەوەش لەبیر نەکەین.. ئەوە مانای ئەوە نیە ئەوەی لەھەرێم پێگەی بەھێز بێت واتا لەبەغداش بەھێزە..
چونکە لەم قوناغە جارێ ھاوکێشەکانی بەغدا جیاوازە لەگەڵ ھەرێم .. بەڵام لەقوناغی داھاتوو دەبێت ھاوکێشەکانی ھەرێم ھاوتەریب بێ لەگەڵ ھاوکێشەکانی ناوەند. ئەگەر ھەریم وانەکا، ئەوا ھەرگیز ھەرێم ناتوانێ لەقەیرانەکانی دەسەڵات و دارایی دەربازی بێ..

 

به‌شى دوووه‌م:چۆن ململانێکانی دەسەڵات لەناوەند تەحریکی ململانێکانی ھەرێم دەکا و داینمۆکەیەتی..


( بەشی دووەم و کۆتایی)

 

• پارتی دوای شکستی پرۆسەی سەرۆک کۆمار، حەجم و کاریگەری و پێگەی خۆی ھەم لەناو شارعی عێراقی ھەم لەناو حزبە سیاسیەکانی بۆ دەرکەوت. لەوێوە ھەموو تواناکانی لەکوردستان خستەگەڕ بۆئەوەی ھێزی خۆی لەکوردستانەوە جارێکی تر ئاراستەی بەغدا بکا. پارتی ئەو ڕێکەوتنانەی ئێستا لەگەل بەغدا کردویەتی دەزانێ کۆنکریتی نین و کاتین.. بۆ بەرێکردنی قوناغێکە قوناغی بەھێزکردنی ناوەند.. پارتی بۆی دەرکەوت لە (مەدوای دوور یەکێتی دەبێتە خاوەن بڕیار لەناوەند).. بۆیە پارتی ھەوڵدەدات یەکێتی تەحجیم و احتوا بکا..

# گۆڕان و حزبەکانی تر دەبنە بەدیلی یەکێتی ..؟

 

• حزبەکابی دەرەوەی پارتی و یەکێتی دوای ئەوەی نەیانتوانی پێگەیەی سیاسی لەناوەند دروست بکەن.. بوونە ھێز گەلێکی ھامشی.. ئەو بێ ئومێدبوونەیان لەناوەند.. بە ئومێدی وەرگرتنی دەسەڵات لەھەرێم پڕ کردووە..


ئەگەر ئەمرۆ ئەوھێزانە لەھەرێم بە چوونە نێو بەرەی پارتی ھەژمار بکرێن.. بەڵام زۆربەی ئەو ھێزانە لەکاتی ململانێی سەرۆک کۆمار لەبەرەی یەکێتی بوون.. ئەم ھێزانە بەتایبەتی گۆڕان ، بڕیاری ھاتنە ناو حکومەتی پێشوەختە دابوو.. ئەمەش مافێک و کارێکی ئاساییە ئەوەی ئاسایی نەبوو، گۆران وەک کارتێکی گوشار بۆ سەر یەکێتی دەبینرا..

 

• گۆران ھەرگیز نابێتە بەدیلی یەکێتی بۆ پارتی.. یەکێتی جگە لەھەژموونی ھێزو دارایی و زۆن.. خاوەنی حزورێکی گەورەو بەھێزە لەبەغدا بە٢١ ئەندام پەرلەمان و خاوەنی پێگەی سەرۆک کۆمارە.. خاوەنی نفوزێکی سیاسی و جەماوەری و پەرلەمانیە لەناوچە دابڕاوەکان. خاوەنی (٦) کورسیە لەکەرکوک .. خاوەنی پەیوەندیەکی بەھێزی ناوخۆیی عیراق و ئیقلیمیە.. پەیوەندی بەردەوامی لەگەڵ ئەمریکا ھەیە..


ھەرچی گۆرانە ھێزێکی لۆکاڵیە و پەیوەندیەکانی لەدەرەوەی گردەکە زۆر لاوازە.. بەڵکو ئێستا ئەمریکیەکانیش سەردانیان ناکەن، گۆڕان بۆ زانینی ھەڵوێستی ئەمریکا..داوا لە کوردەکانی ئەمریکا ئەوانەی پەیوەندیان بەمەلەفی عیراق ھەیە لەوەزارەتی دەرەوەی ئەمریکا دەکەن کەھەلوێستی ئەمریکایان بۆ بپرسن ..


لەسەر ئاستی عیراقیش جووڵەیان نەماوە..ھێزەکانی تری وەک کۆمەڵ و یەکگرتوو و نەوەی نوێش بەھەمان شێوە.

 

واتە ئەگەر ململانێیەکەی کوردستان بۆ بەھێزکردنی پێگەی سیاسی بێ لەبەغدا، پارتی بیەوێ ھاوکێشەکانی کوردستان ھاوتەریب بکا لەگەڵ بەغدا .. ئایا بۆ پارتی یەکێتی گرنگترە یا گۆران و حزبەکانی تر..؟

 

# دواڕۆژی ململانێی دەسەڵات لەناو پارتی و یەکێتی..

 

• یەکێتی و بنەماڵەی تاڵەبانی لەمەودای دوور حزبێکی تۆکمەو بێ کێشە دەردەکەوێ.. بەتایبەتی دوای ئەوەی ھەر دوو کارەکتەری بەرھەم ساڵح و کۆسرەت رەسوڵیان لە داواکردنی وەرگرتنی دەسەڵاتی یەکێتی دوورخستەوە..


بەڵام پارتی لەمەودای دوور و نزیک دەکەوێتە ناو ململانێی ئامۆزاکان.. ئێستا ھەرچی خەڵکی ئیدارەیە لە ناو حکومەت کەسەربەنێچیر بوون، ریزیان گرتووە لەمەسیف بۆ نوێکردنەوەی وەلائ بۆ مەسروور و پێشکەشکردنی (سی ڤێ) کەزۆربەیان دژایەتی خۆیان بۆ ئیدارەی بێچیر بەیان کردووە. مەسرووریش بڕیاری داوە تەواوی ستافی حکومەت بگورێ.. خەڵکانی سەربەخۆی دێنی.. ئەمەش دەبێتە مایەی سەرھەڵدانی ناڕەزایی و سەرئێشە بۆپارتی.. ھەروەھا خەڵکی پارتی بێ ئومێد بوونە لەپارتی و دەڵێن بارزانی باوک بۆ ھێنانە پێشەوەی کورەکەی ھەموو شت دەدات بەحزبەکان.. بۆ نموونە دەڵێن گۆڕان ئەو ھێزە نیە ئەو ھەموو پۆستەی بدرێتی.... دەڵێن ئێمە کار بۆ پارتی دەکەین خەڵکی گۆڕان و حزبەکانی تر پۆست و ئیمتیازت وەردەگرن. ئەم ناڕەزاییانە بەئاشکرا لەناو لق و ناوچەکان دەبیسترێ.

 

• گرنگی کەرکوک بۆ یەکێتی و بنەماڵەی تاڵەبانی ، تەنیا بۆ پێگەی جەماوەری و دارایی نیە، گرنگترین شت بۆ بنەماڵەی تاڵەبانی، ئەندامانی مەکتەبی سیاسی و سەرکردایەتی کەرکوکە.. کە دەوری باڵایان دەبێت بۆ ئەو تەرەفەی بیەوێ لەسەر عەرشی یەکێتی دابنیشێ.. بۆیە ھەر نەرمیەک و تەنازولێک لەکەرکوک.. دواڕۆژی دەسەڵاتی بنەماڵەی تاڵەبانی لەق دەکا.. ھەروەھا ھەموو باڵەکانیش ناوێرن سازش لەسەر کەرکوک بکەن.. چونکە ئیعلانی مەرگی خۆیان دەکەن..

 

# یەکێتی ھێشتا بە ئەعسابی سارد گەمەکان دەکا..

 

• لێکدانەوەکان بۆ کارە تاکڕەویەکانی پارتی لەپەرلەمان لە ٢/١٨.. بە ھەڵە شرۆڤەی بۆ دەکرێ و ھەندێک بەبێ منەتی پارتی و بێ دەسەڵاتی یەکێتی دەیخوێننەوە. ھەندێکیش بۆ تەنگاوکردنی یەکێتی دەزانن.. بەڵام خۆی لەئەرزی واقیع ئەگەر یەکێتیش لە کۆبوونەوەکان ئامادە بوایە. ھەر ھەمان دەرئەنجام دەبوو.. بەڵام لێرە لێک تێنەگەیشتنە دروست بووە.. یەکێتی کەداوای رێکەوتنی سیاسی لەپارتی دەکا.. بۆئەوەیە کە ھیچ شتێک لەپەرلەمان و حکومەت بەبێ لێکتێگەیشتن و ڕێکەوتن نەڕوا.. واتە یەکێتی دەیەوێ بەو رێکەوتنەی پارتی ملزم بکا کەھیچ کارێکی تاکلایەنانە لەدەرەوەی سازان ئەنجام نەدا. بۆیە بەرای من ھێشتا یەکێتی ( بەئەعسابی سارد ) برەو بە یاریەکە دەدات.. تاکە ھەڵەی یەکێتی پەلاماردانە ڕاگەیاندەکەی بوو بۆ سەر گۆران، ھەروەھا کارنەکردنی لەسەر لێکترازاندنی نێوان حزبەکان لەپەرلەمان..


------
#تێبینی ئەم نووسینە ھیچ پەیوەندی بەڕێکەوتنەکە نیە ، پێش ڕێکەوتنەکە نووسراوە..

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure