ژوان قادر5/8/2018 405 جار بینراوە

بێ هیوا مەبن لە سندوقی دەنگدان


لە كوردستاندا گلەیی وبێ هیوایی گەیشتووەتە لوتكە هەموو بێزارن ،بێ ئومیدییەك ئایندەی گرتووە ،هەنگاوەكان لە تاریكدا دەنرێت .


خەریكە دروشمی بێ ئومیی لە دەنگدان دەبێتە باوەڕێك لای خەڵك ، خەریكە ئەو رستەیەی كە دەنگ بدەین و دەنگ نەدەین وەك یەك وایە ،دەبێتە ئاڕاستەیەكی چەسپاو.


بەڵام كەس ناپرسێت :ئەی بەدیلی دەنگنەدان چییە؟


ئایا ئەگەر بێ ئومێدبین لەوەی بە دەنگمان دونیای خۆمان بگۆڕین،ئەی رێگا چارەی تر چییە؟


ئایا ئەگەر سندوقەكان ئایندەمان چاك نەكەن ، ئەی فیشەكی كوشتنی براكان دەتوانن ئایندە روون بكەنەوە ؟


تائێستاش دەبێت هیوا لەسەر ئەوە هەڵبچنین كە هەڵبژاردن رێگای دروستی چاكردنی دونیای روخاوی ئێمەیە،نابێت بێ ئومێد بین لەوەی پەنچەی دەنگدان ناتوانێت هیچ بگۆڕێت ..


ئایندە هەر باشدەبێت ،بەڵام ئەگەر خۆمان بمانەوێت.


رەنگە خۆم پرۆسەی گۆڕینی ژیانی خراپی ئێستامان بۆ ژیانی باشتر لەرێی دەنگدانەوە بە مەحاڵ ببینم ،رەنگە لەسەر ئەو باوەڕەم كە دەنگ بدەین و دەنگ نەدەین تابلۆكەی سیاسەت لە وڵاتی ئێمەدا نەخشێنراوە بەوەی دەیانەوێت .رەنگە حەزبكەم سبەی هەموو سندوقەكان بشكێنرێت و هاواربكرێت ئەم گاڵتەجاڕییە ڕاگرن كە بەناوی دەنگدانەوە شەرعیەت بەمانەوەی خراپبوونی ژیان دەدا.


بەڵام هەمیشە دەشپرسم :ئەی بەدیلی دەنگنەدان چییە؟ئایا گڕتێبەردانی هەموو شتێكە ؟یان دەستكردنە بەشۆڕش ؟بەڵام كێ باجی سوتانی ژیان دەدا ؟هەر خەڵكی ئاسایی باجی شۆڕش و راپەرین وقوربانییەكان دەدا بۆیە لە نێوان دەنگنەدان و دەنگدان تاڵە دەزوویەك هەیە كە لە پچڕاندنی دەبێت سڵبكەینەوە۰ ئەوانەی بەدەنگی بەرز دەڵێن با نەچین بۆ دەنگدان رەنگە لەبێ هیواییەوە سەری گرتبێت كە ژیانی خراپ ودۆخی پڕ قەیران وهەرێمی بێ سیستەم بە دەنگ سندوقی هەڵبژاردن ناگۆڕێت ،ئەوان بێ ئومێدین پەرلەمانێك دروستبێت ژیانمان باشتر بكاتەوە ،


بۆیە ئەمانیش بەشێك لە قەناعەتیان. لایە كە هەڵبژاردن رێگا چارەی دروست نییە .لەبەرامبەر ئەم گروپەدا حزبە سیاسییەكان بە تازەو نوێیەوە بانگەشەی ئەوە دەكەن كە هەڵبژاردن. رێگای دروستە بۆ گۆڕانكاریی.


لەنێوان ئەم دوو باوەڕەدا خەڵكانێك ماونەتەوە ئایا دەنگبدەین و دەتوانین ژیانمان جیابكەینەوە لە رابردوو ،یان دەنگنەدەین چونکە پەنجەی مەرەكەباوی دەنگدان ناتوانێت دەرگا داخراوەكان بكاتەوە .


ئەوەی دەمێنیتەوە ئەو گومان و دڵەراوكێیە كە هەمووانی توشی خۆی كردوە ،كە بە چ شێوازێك ژیانمان باشبكەین وهەرێم بكەینە وڵاتێكی دروست و تەواو۰۰

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure