محەمەد هەورامی25/7/2018 871 جار بینراوە

تۆپخانەكە چی دەكات؟

هەموو خەون و ئومێدی نەوشیروان مستەفا ئەوە بوو میدیایەكی ئازادو سەربەخۆ هەبێت و ئەویش لەوێوە قسەی خۆی بكات، كە مامۆستای زانكۆش بوو بەو جۆرە پەروەردەی فێرخوازەكانی دەكرد، ئازاو ئازاد بن، هەموو میدیای ئازادی كوردیش لە كاتی سەرهەڵدانی بزوتنەوەی گۆڕاندا پاڵپشت و پەناگەی ئەو بزوتنەوەیە بوون و بەهەموو توانایانەوە دەیانوویست ئەو بزوتنەوە سیاسیە نوێیە‌، وەك ئۆپۆزسیۆنێكی بوێر گەشە بكات.

 

ئەوەتەی لەسەر هەندێ‌ كێشە بزوتنەوەی گۆڕان خۆی ڕووبەڕووی رەخنەی دڵسۆزان و خەمخۆران بوەتەوە، لەبری ئەو بزوتنەوەیە و میدیا و تۆپخانەكەی كە ماوەیەكە هیچی پێنەماوە، جگە لە پەلاماردانی دۆستەكانی خۆی، كەی ئێن ئێن بەربووەتە وێزەی میدیای ئازادو بە هەر چوار لادا پلار دەوەشێنێ‌ و تۆمەت دروستدەكات بۆ میدیای ئازاد، كەی ئێن ئێن و ئەوانەی لەپشتیەوەن لە بری ئەوەی سوپاسی ئەوانە بكەن كە دەیانەوێ‌ بە رەخنەكانیان كەلێنەكانیان نیشان بدەن، وەك میدیایەكی فاشی پەلامار دەدات و چیرۆك و حەكایەت هەڵدەبەستێت.

 

ئەم پەلامارە ناشرینە لە دوای 12ی 5ەوە پەرەی سەندووە، وەك بڵێی میدیای ئەهلی و ئازاد هۆكاری ئەو شكستەی گۆڕان بن، نەك ئەو سیاسەتە هەڵەیەی لە بواری میدیاو دیبلۆماسیەت و دارایدا پیادەی دەكەن، لەپشت ئەم هێرشەوە پێدەچێت نزیكترین كەسانی كوڕەكانی نەوشیروان مستەفا هەبن، یان خودی خۆیان رۆڵیان هەبێت، كە ئەمەش بۆ پیاوێكی وەك نەوشیروان مستەفا جێی داخ و ئەسەفە.

 

ئەوەی نەنگییە بۆ ئەوانەی لە پشت ئەم هێرشانەوەن هەر خۆیان پێشتر راپۆرت و زانیاریان لە سەر پەرلەمانتارانی بزوتنەوەی گۆڕان لە بەغداو هەولێر دەدا بە ئێمەو هەوڵیان دەدا كارەكتەرە هاوبیرەكانیان بشكێنن، بۆ ئەوە ئامادەیی پارە دانیشیان هەبوو، كەچی ئێستا لەكاتێكدا میدیای ئەهلی و ئازاد لەخەمی ئەوەدایە ئەم بزوتنەوەیە بەسەر كێشەو گرفتەكانیدا زاڵ بێت، ئەوان پەلاماری میدیای ئازاد دەدەن و ڕووی تۆپەكانیان لەگەندەڵی و نادادی و ستەمەوە گواستوەتەوە بۆ سەر ئازادی.

 

من دڵنیام ئەگەر ئێستا نەوشیروان مستەفا لەژیاندا بوایە بۆ خۆی لولەی تۆپەكەی دەكردە گردەكەو رێگەی نەدەدا ئەو ئەو ڕاپۆرتە ناشیرینانە بڵاو بكرێنەوە، بەڵام خۆ نەوشیروان مستەفا لەژیاندا نیەو كەی ئێن ئێنیش لەهەموو ئازادیخوازێك خاڵیكراوە و ئەوەی لەوێیە زۆربەیان بیریان چووە كە میدیای ئەهلی و ئازاد بۆ ماوەیەكی زۆر لەم هەرێمە زمانحاڵی ئۆپۆزسیۆن و خودی گۆڕان بووە.

 

درێژەدان بەم سیاسەتە چەوتە لەلایەن ئەو گروپەوە كە كەی ئێن ئێن بەڕێوە دەبەن دەبێتە هۆی شكستێكی گەورە بۆ بزوتنەوەی گۆڕان و خەونی نەوشیروان مستەفا بۆ چاكسازی و گۆڕانكاری لەگۆڕ دەنێت.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure