عه‌بدوڵايى كوێخا موباره‌ك5/7/2018 1079 جار بینراوە

کاک نەوشیروان بچوک مەکەنەوە

 

دروستکردنی کۆمپانیای وشە، دامەزراندنی بزوتنەوەی گۆڕان، کۆکردنەوەی خەڵک لە دەوری بەرنامەیەک، لەسەر دەستی یەک پیاو بو بۆ یەک ئامانج.

پرسیارەکان ئەوەیە:


ئایا کاک نەوشیروان کۆمپانیای وشەی دروستکرد بۆ بازرگانی و پارە کۆکردنەوە؟


ئایا دەکرێت خۆ بە کوشتدان، خۆ خستنە مەترسیەوە، کاری خۆبەشی بە پارەی گیرفانی خۆت، گرتن، دەرکردن لە ئەرک و نان بڕین لە پێناو سەرخستن و پاراستنی ڕێباز و بەرنامەی کاک نەوشیروان ئەرکی ھەمو گۆڕانخوازان بێت؟ چونکە کاک نەوشیروان و بزوتنەوەکەی موڵکی ھەمو گۆڕانخوازانن، بەڵام کۆمپانیا و سەروەت و سامانی تەنھا میراتی خێزانێکی چەند کەسی بێت و نابێت باسی بکرێت و نابێت بخرێتە خزمەتی بزوتنەوەکەی خۆیەوە؟


ئایا کاک نەوشیروان ھەلی بۆ گەنج ڕەخساند بۆ ئەوەی بەرگری لە مافی خەڵک و خزمەت بکەن یان بۆ پلانگێڕی و ملشکاندنی یەکتر و وەدەرنانی ھاوڕێکانی خۆی و بچوککردنەوەی گۆڕان لەپێناو پۆست و پێگەی بەرزتر بۆ خۆیان؟

 

ڕێگا ڕاستەکە ئەمە:


کوڕو کچی کاک نەوشیروان مافی خۆیانە و شایستەیی ئەوەیان تێدایە بۆ ھەر پلە و پۆستێکی حکومی، پەرلەمانی، حزبی بە ڕێکخەری گشتیشەوە خۆیان ھەڵبژێرن و بەپێی بەرپرسیاێتیان تەداخولی ھەر کارێک بکەن کە لێی بەرپرسن، نەک لەدەرەوەی بەرپرسیاێتی بڕیار بدەن، با کۆمپانیای وشە بەناوی ئەوانەوە بێت و ئەوان لە ھەمو کەس ئەمینترن، با خەرجی تەواویان بە دەقاتی خەرجی خێزانێکی ئاسای بێت بەحوکمی ئەوەی ئەرک و مەسرەفێکی قورسیان لەسەرشانە بەھۆی جموجوڵ و ھاتنی وەفد و میوانی زۆروە بۆ لایان، بەڵام باقی داھاتی کۆمپانیای وشە و ھەر سەرچاوەیەکی دارایی گۆڕان کە ھەیەتی لەلایەن لیژنەیەک سەرپەرشتی بکرێت کە جڤاتی نیشتیمانی ھەڵیبژاردبێت و ئەو لیژنەیە ئاگاداری ھەمو داھاتی گۆڕان بێت، ھەمو ئەو داھاتانە بگەیەنێتە ژوری کارگێڕی ودارایی، ئاگاداری ھەمو سەرفێکی ژوری کارگێڕی ودارایی بزوتنەوەی گۆڕان بێت و مانگانە ڕاپۆرتێک لەو بارەیەوە بدات بە جڤاتی نیشتیمانی.


میدیا و ژور و ھەمو ئۆرگانەکانیتری گۆڕان لەلایەن ژوری کارگێڕی ودارایەوە پارەی بۆ خەرج بکرێت.


بەمشێوەیە بزوتنەوەی گۆڕان گەورەتر و بەھێز تر دەبێت، بەرنامە و ڕێباز و مێژوی کاک نەوشیروان پەل دەکێشێت بۆ دەرەوەی کوردستان و جوانتر و پیرۆز تر دەبێت و خانەوادەکەشی سەربەرز و سەرفرازتر دەبن، ئەگەر وانەکرێت و لەپێناو تموحی دەسەڵات و پارە کۆکردنەوەدا کاک نەوشیروان بچوک بکرێتەوە بەوەی کە خێزانێکی چەند کەسی خاوەن و میراتگری ئەون، ئەوا خەبات و ڕێباز و مێژوی کاک نەوشیروان بچوک دەبێتەوە و بزوتنەوەکەش دەبێتە هێزێکی لاوازی بێ کاریگەر، سەدان ھەزار شوێن کەوتوی بەرنامەکەشی بێ ھیوا و ڕەنج بە خەسار دەبن، لەبەرامبەریشدا بەبارستایی کەمێک لە کتێبەکانی کاک نەوشیروان پارە کۆ دەکەنەوە.

 

زۆرترین خوێندراوە

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure