هۆشیار عەبدوڵا4/6/2018 1347 جار بینراوە

دەمیرتاش خەریکی تورکیاچێتیە

لام سەیرە فشە قەومیەکانیی باشور لە دەمیرتاش بێدەنگن؟! چۆنە تائێستا چەندین وتاری ئاگرینیان نە نوسیوە دژی سەرکردەی لاو و هەڵکەوتوی کورد و گەلانی تورکیا سەڵاحەدین دەمیرتاش دوای ئەوەی لە زیندانەوە خۆی کاندید کرد بۆ هەڵبژاردنە سەرۆکایەتیەکەی تورکیا ، چۆنە وەک چۆن بە ئێمە دەڵێن خەریکی عێراقچێتین بەویش ناڵێن سەرقاڵیی تورکیاچێتیە ؟!

 

چۆنە تا ئێستا قەومیە چەقبەستوەکانیی هەرێم پێی ناڵێن دەبو لە بری سەرقاڵبونی بە سەرۆکایەتی کۆماری تورکیاوە دەمیرتاش خەریکی دروستکردنی دەوڵەتیی کوردستانی باکور بوایە ؟! لام سەیرە هێشتا لێی بێدەنگن و جامیی غەزەبیی فشە قەومیەکانیانی بەسەردا ناڕێژن وەک ڕشتیان بەسەر نوسەری ئەم دێرانەدا لە گەرمەی بانگەشەکانی هەڵبژاردنی پەرلەمانی عێراقدا .

 

دەمیرتاش لە دوا هەڵبژاردندا كاتێک سەرۆکایەتی لیستیی هەدەپەی کرد لە حوزەیرانی ۲٠۱٥ ، نسبەتی لەسەدا ۱٠ و پۆینت ۷۳ دەنگەکانیی هێنا و بوە سێهەم گەورەترین فراکسێۆن ، گوتاری سەرەکیی دەمیرتاش پێکەوە ژیانیی گەلانیی تورکیا و ئاشتی بو ، بەو گوتارەش توانیی تێکرای نەتەوە و ئاین و چین و تویژەکان لەو چواردەوری سەرکەوتن کۆبکاتەوە ، لێرە لە باشور لە ناوچە جێناکۆکەکان باسیی بەیەکەوە ژیان بکەیت تەخوینت ئەکەن ، باسی ئەوە بکەی گەلان دەبێ پێکەوەکاربکەن بۆ ئێستا و ئایندەی خۆیان بۆ خۆسەری و بۆ دامەزراندنی ئەزمونی دیموکراسیی پێت دەلێن تۆ پیاوی عەرەب یا تورکمانیی ؟!

 

ئەوەی هەدەپە و دەمیرتاشیی لای من درەوشاوە کردوە ئەو فکرە ئینسانە باڵا و ئەو نەفەسە ئازادیخوازەیە کە هەیانە بۆ سیاسەت ، ئەوان کار بۆ ئازادی گەلانی تورکیا دەکەن لێرە لە باشور تەزویر لە عەرەب و تورکمان بە کوردایەتی دەزانن .

 

لە تورکیا شۆڤێنیەتیی تورکیی هێشتا لە لوتکەدایە بەڵام ئەوانە رێیان لە دەمیرتاش نەگرتوە لە زیندانەوە داوا بکات پەیامەکانیی بگەیەننە هەمو هاوڵاتیەکی تورکیا ، لە عێراقیش نابێ شوڤێنیەتی عەرەبیی و تورکیی بە شۆڤێنیەت وەڵام بدرێتەوە ، دواجار دەبێ گەلان لە دەرەوەی ویستی دەمارگیر و شۆڤینیەکان پێکەوە بژین .

 

ئەوەی ئێستا هەدەپە و دەمیرتاش تەرجەمەیان کردوە بۆ گوتاری سیاسیی بەناوی پێکەوە ژیانی گەلان و خۆسەری دیموکراتیی فکری سەرۆک ئاپۆیە ، بە دیدی من شانازی هەرە گەورە ئەوەیە سەرکردەیەکیی وەک ئاپۆ ئێستا لە سەرکردەی گەلیی کوردەوە بوە بە سەرکردەی گەلان ، بەمەش بۆتە موڵکی ئینسانیەت وەک هەر سەرکردەیەکیی تری مێژویی شیوەی گاندی و ماندێلا .

 

رون و ڕاشکاو دەیڵێم ؛ ئەو گوتارە فکریەی لە باشور لە شەست ساڵی رابردوو ئێمەی پێ گۆشکراوین گوتارێکی ئایندە پوچیی ئەوتۆیە کە بەرهەمەکەی یەکێتی و پارتی و عائیلە سیاسیەکان و شەستوشەش و حەفتاوچوار و سیویەکی ئاب و شانزەی ئۆکتۆبەر و دوانزەی ئایارە ، حەڤدەی شوبات و شەری ناوخۆ و تاڵانی نەوت و سیستمی چەتەگەریە بۆ حوکمڕانیی ، دەبێ لە ریشەوە ئەو گوتارە بگۆڕدرێ کە ناوی نراوە کوردایەتیی و هیچ پەیوەندیەکیی بە مافەکانیی گەلی کوردەوە نیە بەڵکو ناوێکە بە هۆیەوە عەقڵێکی خێلەکی و خێزانیی و حزبیی دەمارگیر نەک هەر توانای ئەوەی نیە مرۆڤ یەکسان ببینێ و شەری ئازادی مرۆڤ بکا بەڵکو مرۆڤ دەکاتە رۆبۆتێکی حزبیی دەمارگیری وا کە لەناو حزبەکەی خۆشیا ئەگەر لە تەکتولی خۆی نەبیت قبوڵی ناکات چ جای لە حزبێکی تر بێت یا لە نەتەوە و پێکهاتەیەکی تر ؟!.

 

باشور یا هەرێمی کوردستان پێش هەمو شت پێویستیی بە رەتکردنەوە و لە گۆڕنانیی ئەو فکرە بۆ گەنە نا ئینسانیە پڕ لە تەخوین و دەمارگیرە هەیە کە کاستە سیاسیە کۆنە تەقلیدیەکە لەسەری دەژین و کۆمەلێک فشەکەری قەومیی نۆستالجیای خۆیانی پێ ئاودەدەن .

 

دەمێکە وتومە باشور با لە باکور و دەمیرتاشەوە با لە خۆرئاوا و سالح موسلیمەوە فێر ببێ کە دەبێت فراوانتر بۆ سیاسەت بروانێ و فکری ویرانکەری کوردایەتی بگۆرێ بۆ فکری بەیەکەوە ژیانیی گەلان ، فکری دیکتاتۆریەتی حزبیی و بنەماڵەیی بگۆرێ بۆ خۆسەری دیموکراتیی .

 

هەتا کەی فشە قەومیەکان هەمو تاوانێکیان ناو بنێن کوردایەتیی و کوردایەتیش لە ئێوە بکەن بە کتێبی پیرۆز ؟!

 

کورد تەنها دەرگایی فکرێکی ئینسانیی بالاوە دەتوانێت بە گەشیی و گەورەیی برواتە مێژوەوە ، ئەوەی هەدەپە و پەیەدە هەوڵیی بۆ ئەدەن رێک ئەو چونە ناو مێژوەیە لە دەرگا فراوانەکەی فکرێکی ئینسانییەوە کە دور بێت لە دەمارگیری قەومیی و نەژادی و طائیفی ، ئەوان لەوێ ئاوا خەریکن ، لێرەش تازە بە تازە تەزویر لە کەرکوک ناو دەنێن کوردایەتی؟!

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure