كه‌مال چۆمانى18/4/2018 548 جار بینراوە

بۆچی گرنگە دەنگ بدەین؟ دەنگ بە کێ بدەین؟

- ئەگەر لە رابردودا دەنگت بە گۆڕان داوە و لە ئێستادا لێی نیگەرانی، دەنگی پێبدەوە، گۆڕان هەڵەی کردون بەڵام نەدۆڕاوە. هێزێک لە گۆڕان باشتر دروستنەبوە کە دەنگیپێبدەیت.
- ئەگەر نەزانیت دەنگ بە کێ بدەیت، ئاسایییە، بەڵام دەبێت باش بزانیت دەنگ بە کێ نەدەیت. لە مێژوی چوار ساڵی سیاسەت و حوکمڕانیی و چوار ساڵ سیاسەتی کوردیی لە بەغداد و لەگەڵ بەغداد، بەتایبەتتریش لە پڕۆسەی ریفراندۆمدا، ئینجا لە ٢٧ ساڵی رابردوش، تەنانەت لە ٧٠ ساڵی رابردوش، دەبێت باش ئەو هێز و کەسایەتییانەت ناسیبێت کە پێویستە دەنگیان پێندەیت. هەقت پێدەدەم کە پێتوابێت هێشتا کەسێک و هێزێک دروستنەبوە بەتەواوی لە ئاست چاوەڕوانییەکانی تۆ و من بێت، بەڵام ئەوە هەرگیز نابێت هۆکارێک بێت بۆ دەنگنەدان. بیرتنەچێت دەنگ بەو هێزانە نەدەیت کە گەندەڵن، نادیموکراتیکن، مەزهەبیی و نەژداپەرستن.


- ئەگەر لە هەمو ئەو هێزانەی رابردو نیگەرانیت، بە گۆڕانیشەوە، هێزی نوێ دروستبون، بڕۆ بۆ دەنگدان و دەنگبدە. مافێکی قانونیی خۆتە، دەتوانی مومارەسەی نەکەیت، بەڵام دڵنیابە مومارەسەنەکردنی ئەو مافەت لە قازانجی دۆخی هەنوکەیی دایە، هەوڵبدە ئەو دۆخە بگۆڕیت بۆ باشتر. هیچ هێزێک ناتوانێت بەتەنها سیاسەت لەگەڵ بەغداد بکات، ناشتوانێت لە هەرێمی کوردستانیش بەتەنها حکومەت پێکبێنێت، هەر بۆیە، گرنگە دۆخێک دروستبکەین کە ئەو بەرەی دژی دۆخی هەنوکەیییە، بەهێزتر بکەین تا پاسەوانانی سیستەمی کۆن نەتوانن بۆ ئەبەد روئیای نادیموکراتیک و تاکڕەوانەی خۆیان بەسەر تەواوی گەلدا بسەپێننن. راستە لە چەند ساڵی رابردودا هەڵبژاردن گۆڕانکاریی گەورەی دروستنەکردون، بەڵام نابێت لەبیرتبچێت هەڵبژاردن رێگریی هەرە سەرەکیی بوە بۆ ئەوەی کوردستان ببێتە عەڕەبستانی سعودیە و ئێران و زیمبابۆی. ئەوە دەنگدانی خەڵک بو بە گۆڕان وای کرد ئەو گۆمە مەنگەی کوردستان بشلەقێت. ئەوە دەنگدانی خەڵک بو بە گۆڕان وای کرد نەوەی نوێ و هاوپەیمانییش دروستبن بە هیوای گۆڕانکاریی. ئەگەر لە ٢٠٠٩ دەنگ بە گۆڕان و یەکگرتو و کۆمەڵ نەدرابوایە، هێزی دی جورئەتی دروستبونیان نەدەکرد.

 


- هیچ هێزێک لە هەرێمی کوردستان بەتەواوی دڵخوازی من نییە، بەڵام ئەو واقیعە سیاسییەی هەیە وا دەخوازێت هەڵوێستەیەک بکەین تا بەرەو قۆناغێکی دی هەنگاو بنێین.


- ئەوانەی لە دەوری نەوشیروان مستەفا بون لە شاخ، خوێندەوارییەکی باڵایان نەبو، نەمبیستوە کەسیان دۆکتۆرا و ماستەریان هەبێت، بەڵام چونکە لە شاخ رێباز و خۆشەویستیی نیشتیمان و ئایدیۆلۆژیایەک هەبو، ئەو گروپەی لە دەوری بون، زۆربەیان، تا دوا-ساتەکانی مردنی لەگەڵی مانەوە. لە کەسانێکی بێبڕوانامە، نەوشیروان مستەفا ئازاترین پێشمەرگەی دروستکرد، کادیری سەقامگیر و چاونەترسی بەرهەمهێنا. نە ترس و نە ماڵی دونیا کاری تێنەکردن تا نەوشیروان مستەفا بەتەنها جێبهێڵن. بەڵام لە شاردا، بەتایبەتییش دوای ٢٠٠٩ کاتێک نەوشیروان مستەفا بزوتنەوەی گۆڕان رادەگەیەنێت، بەشێک لەوانەی کە نەوشیروان مستەفا گرنگیی پێدان و پێشیخستن، بەجێیانهێشت. نەک هەر بەجێهێشتنێکی سادە، بەڵکو پەیوەندییشیان بە پارتییەوە کرد، یان گەڕانەوە ناو یەکێتیی. یان لە دەرەوەی گۆڕان کەوتنە هێرشکردنە سەر گۆڕان و خودی نەوشیروان مستەفاش. گۆڕان بزوتنەوەیەکی ئایدیۆلۆژیی نەبو تا بتوانێت کادیری جدیی دروستبکات، مێژوی دروستبونیشی کورت بو، لە شاریش ئاسان نییە وەک شاخ بتوانیت کادیری پەروەردەکراو کە ترس و ماڵی دونیا کاری تێنەکات دروستبکەیت. بەشێکیش لەو کەسانەی پەیوەندییان بە گۆڕانەوە کردوە، ئامانج لێی گۆڕان و چاکسازیی نەبوە، بەڵکو بزوتنەوەی گۆڕانیان وەک ئامانجێک بۆ خۆدەوڵەمەندکردن و خۆبەناوبانگکردن بەکارهێنا نەک گۆڕینی دونیای کوردستانی عێڕاق.


بەڵام ئەوەی گرنگە، ئەو بزوتنەوەیە لەژێر کاریگەریی خودی بیری نەوشیروان مستەفا دەمێنێتەوە، هەرکەسێکیش لەو هێڵانە لابدات کە نەوشێروان مستەفا دیاریکردون، لای جەماوەری ئەو بزوتنەوەیە زو فەرامۆش دەکرێت.


- ئەوەی بزوتنەوەی گۆڕان لە هەمو هێزەکانی دی جیادەکاتەوە، بزوتنەوەی گۆڕان هی کەس نییە، هی خەڵک نەبێت. خەڵک خاوەنی راستەقینەی بزوتنەوەی گۆڕانە. ئەوانەی بە هەرشێوەیەک لە خەتی پارتیی نزیک دەبنەوە، یان گەردێک لە دیدی پارتیی نزیک دەبنەوە، لای جەماوەری گۆڕان قبوڵکراو نین. بزوتنەوەی گۆڕان تەنانەت لە سەردەمی نەوشیروان مستەفاش، هەرگیز بە بزوتنەوەی نەوشیروان مستەفا نەناسرا وەک ئەوەی نەوەی نوێ بە بزوتنەوەی شاسوار عەبدولواحید و هاوپەیمانیی بۆ دیموکراسیی و دادپەروەریی بە هاوپەیمانیی د بەرهەم سالح ناسراون.


- تا خەڵک بتوانێت خاوەندارێتیی لە بزوتنەوەی گۆڕان بکات، ئەو بزوتنەوەیە پێویستیی بە پشتیوانییە و مانەوەشی خزمەت بە پڕۆسەی دیموکراسیی و چاکسازیی و حوکمڕانیی چاک دەکات. هەرکاتێک بزوتنەوەی گۆڕان بو بە بزوتنەوەی گروپێک کەس یان بنەماڵەیەک، ئەو بزوتنەوەیە مانەوەی پێویست نییە. لە ئێستا، ئەو بزوتنەوەیە تاکە حیزبی سیاسیی کوردییە لە کوردستانی عێڕاق کە لە هەمویان زیاتر بزوتنەوەی خەڵکە، بێگومان ئەمە مانای وانییە هیچ حیزبی ترمان نەبن کە لە خەڵک نزیک نەبن.


تێبینی: من کە ئەو قسانە دەکەم، باسی واقیعی سیاسیی و کەلتوریی هەرێمی کوردستان دەکەم. تۆ ئەگەر رەخنەیەکت هەبێت لە واقیعی ئەو هێزانەی کە من پێم باشە دەنگیان پێ بدەی، من سەدانم هەیە، بەڵام هێشتاش پێموایە پێویستە بەرەی گەل فراوان بکرێت دژی بەرەی گەندەڵان، مەزهەبگەرا و نەژادپەرست و خۆسەپێنان، ئەوانەی خاوەنی بەڵتەجیی و مافیای نەوتن.

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure