په‌يكه‌ر عوسمان2/2/2018 618 جار بینراوە

خیانەت و تەخوین

خیانەت ئەسڵەو تەخوین لێکەوتەی خیانەتە، ئەگەر خیانەت نەبووایە تەخوین نەئەبوو، یان ئەگەر خیانەت لە کارە باشەکان بووایە، ئێستا تەخوین لەبری ناشرینکردن، مەدح و جوانکاریی بوو.

 

جا بۆ ئەوەی لە تەخوین بدەین، ئەبێ لە خیانەت بدەین، بۆ ئەوەشی لە شتێك بدەین ئەبێ سەرەتا بیناسین، لێرەشدا کارەکەمان ئاسانە، چونکە خیانەت پێناسەش نەکرێ هەر ناسراوە!
یەعنی ئەمنی قەومی و یاساو دەستورو هۆشیاریی نوێش لەئارادا نەبێ، تۆ هەر بە هۆشیاریی سەرەتایی و ئەشکەوت، ئەزانیت کە دەستێکەڵکردن و هاوسۆزی لەگەڵ قەبیلەیەکی تر دژی قەبیلەکەی خۆت خیانەتە.

 

ڕێکنەخستن و کۆنترۆڵ نەکردنی خیانەت، ڕاستە دەرگا بۆ ڕوودانی جۆرەها خیانەت ئەکاتەوە، بەڵام ڕوودانەکان مانای ئەوەنیە کە کردەکان ئاسایین و خیانەت نین!


محاسەبە نەکردن و دەربازبوونی خائنەکان، مانای ئەوەنیە کە خائنەکان خائن نین.


لە هۆشیاری خەڵکدا خیانەت هەر خیانەتەو خائن هەر خائنە، ئەگەرچی هۆشیارییەکە سادەشبێ و تەیار نەبێت بە هۆشیاری مۆدێرن.

 

جا ئەم تەخوینە کە سەرەتا بوونێکی سەربەخۆی نیەو لێکەوتەی خیانەتە، دواتر ئەبێتە دەعبایەکی سەربەخۆ، دواتر ئەتوانێ بەتەنیا هەمان ئەو کارە بکات کە خیانەت ئەیکات!


خیانەت دامان ئەڕزێنێ و لەناوەوە توشی داخورانمان ئەکا، تەخوینیش هەمان کار ئەکا، خیانەت لە ئەمنی قەومی و ئاشتی کۆمەڵایەتی و پێکەوەژیان ئەدا تەخونیش هەمان شت ئەکات..

 

ئەسڵەن تەخوین گێڕێ خراپتریشە، چونکە خیانەت خزمەتگوزاریەکی بە بەرامبەرەو لە خیانەتدا دوژمن عەزێتێکی کێشاوەو شتێکی داوە بۆ ئەوەی هەنێکمان بکڕێ و بگرێ..


بەڵام لە تەخویندا دوژمن لەماڵی خۆی دانیشتووەو ئێمە لەناوەوە بەرئەبینە یەکترو قازانجەکەشی بۆ ئەوە بەبێ ئەوەی عەزێتێکی کێشابێ و شتێکی دابێت!

من دژی تەخوینم تا ئەو ڕادەیەی کە لە خراپیدا بیخەمە پێش خودی خیانەتەوە، بەڵام ئاگاداربە دژی ئەوەشم کە 'دژایەتی تەخوین' ببێتە غیتائی خیانەت!!


یەعنی ناکرێ خیانەت و خائنەکان بە بەردەمماندا تێپەڕن و ئێمەش بێدەنگبین لە ترسی ئەوەی کە تەخوینی ئەوانیتر نەکەین!


ئاخر تەخوین ئەوەیە کە خیانەت لەئارادانیە، کە خیانەت هەبوو، ئیتر قسە تەخوین نیە، ئیتر دەنگ هەڵبڕین خودی ژیانە، بەرامبەر شتانێك کە لە مێژوودا مەرگی گەلانن.

لە دنیای سیاسیی ئێمەدا (خیانەت و تەخوین) هەردوکی زۆر بە تۆخی ئامادەیەو ئەمەش تەواو پەرت و داوەشاوی کردوین.


بێ دەنگی لە خیانەت خیانەتە، تەخوینکردنیش هەر خیانەتە، وەستانەوەش بەڕووی هەردوکیاندا
ئەرکە.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure