هۆشیار عەبدوڵڵا30/1/2018 1015 جار بینراوە

قسەکەی خۆتان بوو ، ئێوە هاورێی باشی ئاپۆ نەبون

لە مەجلیسێکدا لەگەڵ دو هەڤاڵ کە هەڵگری فکری ئاپۆن ئەو پرسیارەم کرد ؟

بۆچی فکری ئاپۆ لەباکور دەتوانێ ئەزمونی درەوشاوەی وەک بەدەپە بەرهەمبهێنی و ئەو ئەزمونە شاکارەی پێکەوە کۆکردنەوەی گەلان لە هەڵبژاردنی تورکیا سەرپێ بخات و سەریبخات ! بۆچی لە رۆژئاڤا فکری عەبدوڵڵا ئۆجەلان دەتوانێ کانتۆنەکانی پێ دروست بکرێ و بەو شیوەیە سەرکەوتوو نمونەیی بێ لە ئاستی سیاسی و ئیداری و دبلۆماسیدا ، ئەی بۆ پەکەکە بە فکری هەمان ئەو سەرۆکە مەزنە لە باشوری وڵات لە هەرێمی کوردستان ئەزمونەکانیی لە دروستکردنی حزب و رێکخراو شکشت دەهێنێت و سەرکەوتوو نابێ ؟؟

 

لە وەڵامدا یەکێک لەو دو هەڤاڵە وتیی ، چەند هۆکارێک هەن دیارترینیان ئەوەیە ((ئێمە و ئەوانەی پێشتر ئیدیعای ئاپۆ چێتیمان کردوە لێرە لە باشور، هاوڕێیەکی باش و راستەقینەی ئاپۆ نەبوین)) قسەیەکی لە خۆبوردوانە بەلام قوڵ و دەقیق بوو، لە شەرحی ئەو جەملەیەشیدا وتی وەک پێویست لە فکری ئەو حاڵی نەبوین و کارمان پێنەکردوە .

 

ئەم رۆژانە بە چاوی خۆمان راستی قسەی ئەو هەڤاڵە دەبینین .

 

من ئیدیعای ئەوە ناکەم لە فکری ئاپۆ زۆر باش حاڵیم چونکە ماوەیەکی کەمە سەرقاڵی مانیفیستۆکانیم کە لە سجنەوە هاتونەتە دەرێ بە تایبەت کتێب یا مانفێستی پێنجەم کە لە راستیدا لە سەر شیوەی دیفاع و مورافەعە نوسیونی و دوای کراون بە کتێب .

 

دو نمونە بەسن بۆ ئەوەی بزانین بە فیعلی هاوڕێکانی ئاپۆ لە باشور زۆر لە فکری ئەو تێگەیشتون یان نا ؟

 

یەکیان ئەوەیە کە پەیوەستە بە کۆنگرەی نەتەوەییەوە ، پێم وایە ئەوانەی لە باشور سەرقاڵی ئەو کۆنگرانەن هێشتا پێیان وایە سالێ نەوەدەکانە ، هێشتا بە فکری ئاپۆی نەوەدەکان کار دەکەن ، لە کاتێکا ئێستا ئاپۆ گەیشتۆتە قەناعەتی ئەزمونی کاری هاوبەشی گەلان و خۆسەری دیموکراتیی و دورکەوتنەوە لە هەمو دەمارگیریەکی نەتەوەیی و نەژادی تازە بە تازە لێرە ئەو فکرە قەومیە چەقبەستوە کۆنگرەی بۆ دەگیرێ، لە کاتێکا ئاپۆ هەر وەک نەوشیروان مستەفا باوەری بە دروستکردنیی نیشتیمان هەیە لەدەرەوەی تاپۆی نەتەوەیی و بە دیدی نیشتیمانیی و هاولاتیبون بۆ پەیوەندیی نێوان گەلان دەروانێ ، تازە بە تازە لێرە قەومەچیەت تۆخ دەکەنەوە .

 

ئەوەی لە رۆژئاڤا جێبەجێدەکرێ کرۆکی دیدی ئۆجەلانە بۆ خۆسەری دیموکراتی گەلان و جێهێشتنی ئەو دەمارگیریە قەومیە ، هەر بۆیە دەبینی هەمو نەتەوە و گەلان لە روداوەکانی عفرین بونەتە شەڕڤان .

 

هەر لەو دیدە نیشتیمانیە باڵایەشەوە بو نەوشیروان مستەفا زۆرترین بایەخ و پەرۆشی بۆ سەرکەوتنی کانتۆنەکانی خۆرئاوا بوو چونکە دەیزانی لەسەر رێگایەکی راست ئەرۆن و لەگەڵ دیدە نیشتیمانیەکانیی یەکیان دەگرتەوە .

 

ئەوەی دوهەمیان ، لە کاتیکا پرۆژە فکریەکەی ئاپۆ کۆکردنەوە و دروستکردنیی چەترێکی گەورەی سەرو حزبیە بۆ تێکرای هیزە سیاسی و گروپە کۆمەلایەتی و چین و توێژ و دین و مەزهەب و پێکهاتەکانی تر وەک ئەوەی بەدەپە لە هەڵبژاردنەکان لە تورکیا کردی لەسەر بنەما و فکرێکی بالای ئینسانیی و ستراتیجی کە ئاپۆ دارێژەریەتی، کەچی لە باشور تازە بەتازە دەچنە سەنگەربەندی حزبی تەسکەوە بۆ هەڵبژاردن ، کە بە حساب ئامانجی سەرەکیان گۆرینی لوتکەی دەسەلاتە ، لە کاتێکا فەلسەفەی گۆرین لای ئاپۆ لە خوارەوەیە بۆ سەرەوە ، واتا گۆرین لە ئاستەکانی خوارێی کۆمەلگەوە دەکرێ نەک ئاستی سەرەوەی دەسەلات .

 

ئەوە خۆئەگەر بێتە سەر ئەدەبیاتی سیاسی و زمانی طرح و دونیابینی ، فکری ئاپۆ زمانێکی باڵا و بەرپرسیاری ئەوتۆیە کە پارچەیان لەگەڵ هەمو هێز و گروپ و حیزبێکدا بۆ یەک نابێت .

 

هیوادارم هەڤاڵانی باشور ، ئەو دێرانە بە دڵی فراوان وەربگرن ، بەوە وەریبگرن کە بە فیعلی خۆیان جوان دیاریانکردبوو ، هاوریێی باشی ئۆجەلان نین کە بەهیوام ببن چونکە بە دیدی من تێگیشتن لە دوا قۆناغە کامڵەکانیی فکری نەوشیروان مستەفا و ئاپۆ ، بەرپرسیارێتیە و پێویستە بۆ هەمو کەسێک کە خەمی ئەوەی هەبێ سیاسەت لە کوردستاندا نوێ بکاتەوە .

 

زۆرترین خوێندراوە

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure