ئارام قادر حەمەسور24/1/2018 437 جار بینراوە

عەفرین نیشتمانی پۆڵاکان


لەناو مێژودا چەندین گەل وشار هەبون کە مرۆڤیان سەرسامکردوە بە ئازایەتی. گەلێک بەملیۆنان شەهیدی داوە لە پێناوی خاکەکەیدا، گەلێکی تر چەندین ساڵ بەرگریکردوە بۆ مانەوە، ئامانجی هەمو ئازایەتیەکان پاراستنی خاکەکەیان بوە، چونکە لەدەستدانی خاک بە ئاسانی و بەقوماری ساسی کۆتایی ئەخلاقە. خەڵکی کۆبانێ جیهانی سەرسامکرد کاتێک توانی بەرگریبکات و کۆبانێ ڕزگار بکات لەدەستی چەتەکانی داعش، ئازایەتی مرۆڤە پۆڵاینەکانی کۆبانێ وایکرد ئەمریکاو ڕوسیا حساب بۆ (یەپەگە) بکەن. بەگشتی پەروەردەی ئاپۆی و پەکەکە پەروەردەیەکی پۆڵاینە لە بواری سەربازیدا، گەریلاکان ئەتۆمن و پڕن لە ئیرادەو خۆڕاگری، تورکیا زیاتر لە سی ساڵە شەڕی لەناوبردنی پەکەکە دەکات بەڵام تا ئەمڕۆش پەکەکە و لقەکانی بەپێوەن و بەهێزتر بون، پەروەردەی سیاسی وایکردوە مرۆڤێک لە گۆشت و ئێسک ببێتە پۆڵایەک، تورکیا بەهەمو چەکە پێشکەوتوەکانی شەڕ دەکات و واز لە کورد کوژی ناهێنێت، بەڵام ئیرادەی قوتابخانەی ئاپۆی هەر لەبەرزیدایە.

 

ئێستا تورکیا پەلاماری عەفرینی داوە و بەچەکی قورس هێرش دەکات، تورک لە مێژوی سەدساڵی ڕابردودا یەکەم پیلانی لاوازکردنی کوردبوە و بەردەوام کوردی بە چەقۆی ژەهراوی سەرسنگی ناسیۆنالیزمی تورک زانیوە، مێژو پێمان دەڵێت تورکیا خوێنمژی کوردەو لە ئازاردانی کوردان چێژ وەردەگرێت، سادیزمی تورکی بەڕەنگی عەلمانی و ئیسلامی یەک سیاسەتە، ئەو ئیسلامیانەی لەسەر شاشەی تیڤیەکان مایکیان کۆنتڕوڵکردبو بەزۆر بڵێی بۆ حیزبە ئیسلامیەکەی ئەردۆغان و باسی گەڕانەوەی خەلافەی عوسمانیان دەکرد، ئەوانە لینگەوقوچ لە مێژوی تورک تێگەیشتبون و ختوکەی دینی دور لە خوێندنەوەی عەقڵی توشی خەو خۆشی کردبون، بێئاگا لەوەی عەقڵی دەسەڵاتی تورکی بە ڕەنگی عەلمانی و ئیسلامی بریتیە لە کورد کوژی، حیزبە ئیسلامیەکەی ئەردۆغان هێرش دەکاتە سەر خاک و شارێک تەنیا لەبەر ئەوەی کوردن. ژن و منداڵ و پیر و گەنج دەکوژێت و سڵ لە دەقە دینیەکان ناکاتەوە کەدژی مرۆڤکوژین وەک خوا دەفەرموێت"ئەوەی مرۆڤێک بکوژێت وەک ئەوەیە هەمو خەڵکی کوشتبێت"یان " کەعبە بڕوخێت باشترە نەک کەسێک بکوژرێت" کەواتە ئیسلامیبونی ئەردۆغان ماسکێکە بۆ خڵەتاندن و جوڵاندنی ختوکەی دینی، دین دەبێت لەواقیعدا باشی خۆی نیشان بدات چونکە مرۆڤ گەورە ترە لە دین. ئەوانەی ئیمانیان بەهێز ببو بە ئەردۆغان دەبێت بەخۆیاندا بچنەوەو گومانیان لە ئیمانەکەی خۆیان هەبێت، چونکە فەلسەفەی سیاسی تورکی بریتیە لە کوردکوژی.

 

پۆڵاکانی عەفرین پڕن لە وزەو ئیرادە و خاکویستن نەک خاکفرۆش، ئەوان نیشتمان دەپارێزن نەک بیفرۆشن. سەیرە لێرە چەند هێزێک نیوەی کوردستانیان دۆڕاند لە شەو ڕۆژێکدا بەڵام رویاندێت بڵێن گەر عەفرین پێویستی بێت ئامادەین هێز بنێرین! خەڵکی عەفرین دەزانێت هێزێک خاکی خۆی نەپارێزێت چۆن خاکێکی تر دەپارێزێت. لێرە چارەگە سەدەیەکە نەتوانراوە هێزێکی تۆکمەی دور لەحیز دروستبکرێت و بکرێتە پۆڵا بۆ پاراستنی نیشتمان نەک حیزب. بەڵام ئەوان لە کانتۆنەکانی خۆرئاوا هێزێکی پۆڵا ئاسایان دروستکردوە و وڵاتانی زلهێزی جیهانیان ناچار بەهاوکاری کردوە. کورد بەردەوام قوربانی دەستی زلهێزەکانی جیهان بوە، بەردەوام لەکۆتایدا پشت لە کورد کراوە، دیموکراسی و مافی مرۆڤ تا ئەمڕۆش بۆ کورد دو درۆی گەورەبون، چونکە بەبەرچاوی دونیاوە کوردکوژی کراوەو دەکرێت، باشترین کار دروستکردنی نیشتمانێکی دادپەروەرو هێزێکی نیشتمانیە، ژن و پیاوی عەفرین چەکدارن و هەموان شەڕ دەکەن بۆ نیشتمانەکەیان بەبێ جیاوازی، هەمویان وەک پۆڵان و بەرگریدەکەن تا مردن، عەفرین لوتکەی خۆڕاگری و ئیرادەیە، بونی ئیرادە مرۆڤ گەورە دەکات و دەیکاتە پاڵەوان، زۆرجار ئەوەی شەڕ دەباتەوە جۆری چەک نیە بەڵکو چەندیەتی ئیرادەیە.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure