موحسین ئەدیب23/1/2018 434 جار بینراوە

ئایا ئەفرین ئەكەوێت؟

 

وەك چۆن ئاگر ناتوانێت ئاگر بسوتێنێت، ئاو ناتوانێت ئاو بخنكێنێت، ئاواش ئەو سوارەی بەسەر ئەسپی ئەفرینەوەیە هەرگیز ناگلێت.


پەكەكە وەك (خەتێكی پان) رێكخستنێكی سیاسی جیاواز‌و مەزنە، بەڵام هەرگیز بەتەنها هێزێكی سیاسی نییە. پەكەكە هێزێكی جەنگاوەری بێئەندازە دلێرە، بەڵام هەرگیز هێزێكی چەكداری نییە بەتەنها. پەكەكە دیاردەیەكە دژە سیستمی باوە لەسەر ئاستی جیهان، كەچی نەك توانیویەتی بوونی راستەقینەی خۆی بسەلمێنێت، بەڵكو توانیویشیەتی موعجیزەی بێوێنە بخولقێنێت، ئەم موعجیزەیەش چەندێك لەسەر ئاستێكی ئاسۆیی جێگەی گرتوە، ئەوەندەش لەسەر ئاستێكی شاقوڵی جێگەی گرتوە‌و بەمێژوودا رۆچوە، بەمانایەكی تر پەكەكە مێژوو ‌و جوگرافیای بەجۆرێك چڕكردۆتەوە(بێموبالەغە) لەمێژوی بەشەریدا نمونەی زۆر دەگمەنە.


بەڵام پرسە جەوهەرییەكە ئەوەیە پەكەكە ئەم هێزە سیاسی‌و چەكدارییە تۆكمە‌و بێوێنەیە لەكوێوە دێنێت؟ بێگومان وەڵامی ئەم پرسە لەسەروەستانێكی قووڵی دەوێت‌و لە پۆستێكی فەیسبووكدا ناتوانرێت حەقی پێبدرێت(رەنگە لەئایندەدا بگەڕێمەوە سەر ئەم بابەتە).


بەڵام ئەوەی بەڵگەنەویستە بەهێزی پەكەكە لەوەدا چڕدەبێتەوە كەبەر لەوەی رێكخستنێكی سیاسی‌و هێزێكی سەربازی بێت، دیاردەیەكی رۆحی‌و مەعنەوییە، هەربۆیەش زۆر سانا دەتوانێ‌ ئەوپەڕی مێژوو ببینێ‌‌و ئەوپەڕی جوگرافیاش تەی بكات‌و هەموو زەمەن‌و مەكانەكان بەهی خۆی بزانێت‌و ئازادانە كاریان تێدابكات. سنوری ئاین‌و ئاینزاو‌و تایفە‌و نەتەوە‌و جوگرافیا دەسكردەكان تێپەڕێنێت.


ئەو جووڵە رۆحییەیە وا لەپەكەكە دەكات لەسەرەوە سەیری خوارەوە بكات‌و هەموو رەنگ ‌و دەنگ‌و كلتورە جیاوازەكان وەك یەكببینێت‌و ئەوانیش ئەم قەبوڵبكەن، هەربۆیەش لەیەكەمین كاری پراكتێكیدا زۆر سانا توانی لەرۆژاڤا كورد‌و عەرەب‌و توركمان‌و موسڵمان‌و مەسیحی‌و ئیزدی لەچوارچێوەیەكی سیاسیدا كۆبكاتەوە‌و پێكەوە نمونەیەكی نایابی قارەمانی‌و دەوڵەتداری‌و كلتوری پێشكەشی دونیا بكەن.
هەر لەمڕوانگەیەوە پێتان سەیر نەبێت‌و بەفاڵگرتنەوەشی مەزانن، ئەگەر جەخت لەوە بكەمەوە ئەو رۆحەی پەكەكە ئەژێنێت‌و ئاڕاستەی دەكات، لەئایندەیەكی نزیكدا ئەردۆغان‌و ئەردۆغانیزم بەچۆكدا دەدات، لە ئایندەیەكی كەمێك دورتریشدا سەرجەم ناوچەی رۆژهەڵاتی ناوەڕاست لەم تایپە لەدەسەڵاتداری مشەخۆر پاكدەكاتەوە.


واتە پەكەكە لەبەر ئەوەی رەهەندێكی قوڵی رۆحی هەیە، زۆر سانا دەتوانێت مێژوو بەجۆرێكی دیكە دابڕێژێتەوە‌و (كورد بەو رۆحە ناوازەیەوە) نەك لەدەرەوە‌و پەراوێزی مێژوەوە ئەهێنێتەوە ناو مێژوو، بەڵكو لەرێگای ئەو رۆحەیەوە ئەیكاتە سەرداری مێژوو، بەڵام سەردارێكی خزمەتكار نەك سەردارێكی سەردار(بێگومان ئەمە بەلەبەرچاوگرتنی ئەوەی پەكەكە لەو خەتە رۆحانییەی لانەدات).
لەژێر روانگەی ئەمەی سەرەوەدا، وێڕای بێئەندازە ناچوونیەكی بەرەی جەنگی هەردولا (لەرووی زاهیرییەوە)، زۆر ساویلكەییە پێمان وابێت ئەفرین ئەكەوێت، چونكە هەركاتێك توانرا رۆح بكەوێنرێت‌و بكوژرێت ئەوكات دەتوانرێت ئەفرینیش بكەوێنرێت. ئێستا ئیدی رۆحی پەكەكە لەعەفرینە رۆح ناكوژرێت هەمیشە رۆح لەسەروو مردنەوەیە، ئاگر ئەتوانێت ئاگر بسوتێنێت؟ ئاو دەتوانێت ئاو بخنكێنێت؟ ئەمانە چەندە موستەحیلن كەوتنی ئەفرینیش ئەوەندە. هیوادارم خوێنەری بەڕێز ئەم گوزارشتانە وەك میتافۆر‌و زمانێكی شیعری وەرنەگرێت بەڵكو دەقاودەق لێموەرگرێت ئینگلیز واتەنی(I mean it)>
بۆ رونكردنەوەی ئەمە ئەم نمونەیە پێویستە:


ئەگەر بەنمونە (خێرڤان)نانی ئەفرین‌و رۆژاڤا ژمارەیان 100 خێرڤان بن، ئەوا لەبنەڕەتدا 101 خێرڤانن، ئەو (یەك)ەی بۆ ژمارە سەدەكە زیاد دەبێت توانای سەد هێندە لەو سەد كەسە زیاترە، چونكە ئەو (یەك)ە بریتییە لەپەیوەندی نێوان ئەو سەد كەسە، بەمانایەكی تر ئەو سەد كەسە بەهۆی ئەو (یەك)كەسەوە هەن، ئەگەر ئەو (یەك)ە نەبێت ئەو سەد كەسەش بوونیان نابێت، هاوكات ئەگەر ئەو سەد كەسەش لەناوببرێن ئەوا یەك كەسە سەدان سەد كەسی دی پێكەوە كۆدەكاتەوە، ئەو (یەك)ش ئەو رۆحەیە كە پەكەكە ئەژێنێت‌و ئاڕاستەی دەكات، هەر ئەو رۆحەشە كوردێك‌و توركێك‌و عەرەبێك‌و كلدانیەكەو ئەوروپیەكە‌و ئەمریكییەك‌و ئاسیاییەك لەژێر چادری پەكەكە كۆەدەكاتەوە‌و دژی ستەمی سیستمی جیهانی‌و رژێمە سەركوتكەرەكانی ناوچەكە دەجەنگن، بۆیە وەك چۆن ئاگر ناتوانێت ئاگر بسوتێنێت، ئاو ناتوانێت ئاو بخنكێنێت، ئاواش ئەو سوارەی بەسەر ئەسپی ئەفرینەوەیە ناگلێت.


ئەوەی لەكۆبانێ‌ موعجیزەی خولقاند سەد (خێرڤان)ەكە نەبوون، بەڵكو (یەك)ەكە بوو، ئێستا ئەو (یەك)ە لەئەفرینیش هەیە، بۆیە هەرگیز ئەفرینیش ناكەوێت، بەپێچەوانەوە ئەفرینیش وەك كۆبانێ‌ دەبێتە وانەیەكی دیكەی مێژوویی، مێژووی دورودرێژی پەراوێزخراوی ژن‌و نەتەوەو گەلە پەراوێزخراوەكانی دونیا(كەلەسەدا 99 مێژووی مرۆڤایەتییە) لەناو عەفریندا چڕ‌و كۆدەكاتەوە.
تێبینی: بەئەنقەست لەبری(شەڕڤان)، (خێرڤان)م بەكارهێناوە. 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure