په‌رله‌مانى كوردستان
302 جار بینراوە 21/5/2015 08:46 PM

ڕاپۆرتێكى KIE له‌سه‌ر هه‌رسێ سیسته‌مه‌ى ( سه‌رۆكایه‌تى , په‌رله‌مانى ، نیمچه‌ سه‌رۆكایه‌تى )




له‌م ڕاپۆرته‌  شیكاریه‌دا هه‌رسێ سیسته‌مى حكومڕانى  سه‌رۆكایه‌تى و په‌رله‌مانى و نیمچه‌ سه‌رۆكایه‌تى شیكراوه‌ته‌وه‌  , وه‌
ئه‌ڵته‌رناتیڤه‌كانى خراوه‌ته‌ ڕوو 

سروشتى سیسته‌مه‌ حكومڕانى هه‌رێمى كوردستان-

بۆئه‌وه‌ى سیسته‌مه‌ حومكڕانى هه‌رێمى كوردستان په‌رله‌مانى بێت : ئه‌وا ده‌بێت هه‌ردوو لایه‌نه‌كه‌ى ده‌سه‌ڵاتى جێبه‌جێ كرد ( ئه‌نجومه‌نى وه‌زیران و سه‌رۆكى هه‌رێم ) به‌رپرسیار بن له‌ به‌رده‌م په‌رله‌مانى كوردستاندا , به‌ڵام ئه‌وه‌ى له‌ ناو ده‌قى یاساكان و له‌سه‌ر ئه‌رزى واقیع هه‌یه‌ ، ئه‌وه‌یه‌ كه‌ ته‌نها ئه‌نجومه‌نى وه‌زیران به‌رپرسیارێتى سیاسى له‌ ئاست په‌رله‌ماندا هه‌یه‌ ( به‌و مه‌رجه‌ى سه‌رۆكى هه‌رێم بڕیارى متمانه‌ سه‌ندنه‌وه‌ى  په‌رله‌مان له‌ ئه‌نجومه‌نى وه‌زیران په‌سه‌ند بكات و ڤیتۆى له‌ به‌رامبه‌ردا به‌كارنه‌هێنرێت ). به‌ڵام سه‌رۆكى هه‌رێم ئه‌و به‌رپرسیارێتییه‌ى له‌به‌رده‌م په‌رله‌ماندا نییه‌ , كه‌واته‌ ده‌توانین بڵێین سیسته‌مى حكومڕانى هه‌رێمى كوردستان په‌رله‌مانى نییه‌ .

بۆئه‌وه‌ى سیسته‌مه‌ حكومڕانى هه‌رێمى كوردستان سه‌رۆكایه‌تى بێت : ئه‌وا ده‌بێت ده‌سه‌ڵاتى جێبه‌جێ كردن له‌به‌ده‌م په‌رله‌مانى كوردستان دا به‌رپرسیارێتى نه‌بێت , به‌ڵام ئه‌وه‌ى له‌هه‌رێمى كوردستان دا هه‌یه‌ ، ئه‌نجومه‌نى وه‌زیران به‌رپرسیارێتى سیاسى له‌به‌رده‌م په‌رله‌ماندا هه‌یه‌ ( به‌و مه‌رجه‌وه‌ كه‌ خاڵى سه‌ره‌وه‌ دا باسكراوه‌ ) , له‌به‌رئه‌وه‌ى ده‌توانین بڵێن سیسته‌مى حكومڕانى هه‌رێمى كوردستانى سه‌رۆكایه‌تى نییه‌ .

بۆئه‌وه‌ى سیسته‌مه‌ حكومڕانى هه‌رێمى كوردستان نیمچه‌ سه‌رۆكایه‌تى بێت : ئه‌وا ده‌بێت ئه‌نجومه‌نى وه‌زیران به‌رپرسیارێتى سیاسى له‌به‌ده‌م هه‌ریه‌ك له‌ په‌رله‌مانى كوردستان و سه‌رۆكایه‌تى هه‌رێمدا هه‌بێت , به‌ڵام ئه‌وه‌ى هه‌یه‌ ئه‌نجومه‌نى وه‌زیران به‌رپرسیارێتى سیاسى له‌به‌رده‌م په‌ره‌له‌ماندا هه‌یه‌ ( به‌و مه‌رجه‌ى كه‌ له‌خاڵى سه‌ره‌وه‌دا باسكرا ) , به‌ڵام ئه‌نجومه‌نى وه‌زیران به‌رپرسیارێتى سیاسى له‌به‌ده‌م سه‌رۆكایه‌تى هه‌رێمدا نییه‌ ، كه‌واته‌ لێره‌وه‌ ده‌گه‌ینه‌ ئه‌و ده‌ر ئه‌نجامه‌ى كه‌ سیسته‌مى حكومڕانى له‌ هه‌رێمى كوردستان ناجۆر .

ئه‌لته‌ر ناتیڤه‌كان :

بۆ ئه‌وه‌ى ناجۆریی سیسته‌مى حكومڕانى هه‌رێمى كوردستان له‌به‌ر ڕۆشتایی یاساى سه‌رۆكایه‌تى هه‌رێمى كوردستاندا ڕاستبكه‌ینه‌وه‌ ئه‌وا چه‌ند ئه‌ڵته‌رناتیڤێك ده‌خه‌ینه‌ ڕوو :-

ئه‌لته‌رناتیڤی یه‌كه‌م (سیسته‌مى په‌رله‌مانى ):  بۆ ئه‌وه‌ى سیسته‌مى حوكمڕانى له‌ هه‌رێمى كوردستاندا ببێته‌ په‌رله‌مانى ، ئه‌وا ده‌بێت سه‌رۆكى هه‌رێمیش وه‌كو ئه‌نجومه‌نى وه‌زیران به‌رپرسیارێتى سیاسى له‌ به‌ده‌م په‌رله‌مانى كوردستاندا هه‌بێت ، ئه‌مه‌ش به‌واتاى ئه‌وه‌ دێت كه‌ - سه‌رۆكى هه‌رێم له‌لایه‌ن په‌رله‌مانه‌وه‌ هه‌ڵبژێردرێت و متمانه‌ى لێ ده‌سێنرێته‌وه‌ .- سه‌رۆكى هه‌رێم مافى به‌كارهێنانى ڤیتۆى نابێت به‌رامبه‌ر ئه‌و پرۆژه‌ یاسانه‌ى كه‌ په‌رله‌مان په‌سه‌ندیان ده‌كات - سه‌رۆكى هه‌رێم مافى هه‌ڵوه‌شاندنه‌وه‌ى ته‌قدیرى , په‌رله‌مانى كوردستان نامێنێت - سه‌رۆكى هه‌رێم به‌شێكى به‌رچاو له‌ده‌سه‌ڵاته‌كانى جێبه‌جێكردنى لێده‌سه‌نرێته‌وه‌ و به‌پێى تایبه‌ت مه‌ندى وه‌زاره‌ته‌كان , به‌سه‌ر ئه‌نجومه‌نى وه‌زیران دا دابه‌ش ده‌كرێت . له‌و ده‌سه‌ڵاتانه‌ى له‌ سه‌رۆكى هه‌رێم ده‌سه‌نرێنه‌وه‌ - وه‌ك : فه‌رمانده‌ى گشتى هێزى پێشمه‌رگه‌, ئه‌نجومه‌نى ئاسایش ڕاگه‌یاندنى باریی نائاسیی ، لێبوردنى تایبه‌ت به‌به‌ندكراوه‌كان ، سه‌رۆكایه‌تیكردنى كۆبوونه‌وه‌ ، ناچاریه‌كانى ئه‌نجومه‌نى وه‌زیران ، مه‌رسوماكانى دامه‌زراندنى پله‌تایبه‌ته‌كان ..... هتد - سه‌رۆكى هه‌رێم مافى دامه‌زراندنى دادوه‌ران و سه‌رۆك و ئه‌ندامانى داواكارى گشتى لێ ده‌سه‌نرێته‌وه‌ ئه‌و مافه‌ بۆ ئه‌نجومه‌نى دادوه‌رى كوردستان ده‌گه‌ڕێنرێته‌وه‌ - سه‌رۆكى هه‌رێم ده‌ركردنى مه‌رسومه‌كانى وه‌ك ئه‌ركى هونه‌رى و كارگێڕى جیبه‌جێ ده‌كات نه‌ك هێزى ڤیتۆى هه‌بێت - له‌ سیسته‌مى په‌رله‌ماندا سه‌رۆك وه‌زیران ناتوانێت سیاسه‌تى خۆى به‌سه‌ر وه‌زیراندا بسه‌پێنێت هه‌ربۆیه‌ به‌رپرسیارێتیه‌كه‌ى له‌ ئاست په‌رله‌ماندا ده‌سته‌ جه‌معیه‌ .

ئه‌لته‌رناتیڤى دووه‌م ( سیسته‌مى سه‌رۆكایه‌تى ): بۆئه‌وه‌ى سیسته‌مى حكومڕانى له‌ هه‌رێمى كوردستان بكرێته‌ سه‌رۆكایه‌تى ئه‌وا ده‌بێت : - سه‌رۆكى هه‌رێم له‌ ڕێگه‌ى هه‌ڵبژاردنى ڕاسته‌وخۆى خه‌ڵكه‌وه‌ هه‌ڵبژێردرێت - سه‌رۆكى هه‌رێم ته‌نها له‌ ڕێگه‌ى ساغبوونه‌وه‌ى به‌رپرسیارێتى تاوانكاریه‌وه‌ ده‌ست له‌كار ده‌كێشێته‌وه‌ - سه‌رۆكى هه‌رێم و وه‌زیره‌كانى به‌رپرسیارى سیاسییان  له‌به‌رده‌م په‌رله‌مانى كوردستان نه‌بێت - سه‌رۆكى هه‌رێم متمانه‌ بداته‌ وه‌زیره‌كان و لێیان بسێنێته‌وه‌ به‌بێ ئه‌وه‌ى په‌رله‌مان هیچ ڕۆڵێكى له‌مه‌دا هه‌بێت - سه‌رۆكى هه‌رێم مافى به‌كارهێنانى ڤیتۆى ده‌بێت  بۆ ئه‌و پرۆژه‌ یاسایه‌ى كه‌ په‌رله‌مان په‌سه‌ندیان ده‌كات ، جا كۆى ناوه‌ڕۆكى پرۆژه‌ یاساكان بێت یان به‌شێكى پرۆژه‌ یاساكان - سه‌رۆكى هه‌رێم ده‌سه‌ڵاتى ئاماده‌كردنى بوودجه‌ى هه‌رێمى ده‌بێت - سه‌رۆكى هه‌رێم ئه‌م ده‌سه‌ڵاتانه‌ى ده‌بێت : فه‌رمانده‌ى گشتى هێزى پێشمه‌رگه‌ى كوردستان ، ڕاگه‌یاندنى بارى نائاسیی ، لێبوردنى تایبه‌ت به‌ به‌ندكراوان ، سه‌رۆكایه‌تیكردنى كۆبوونه‌وه‌ خولییه‌كانى ئه‌نجومه‌نى وه‌زیران .. هتد

ئه‌ڵته‌رناتیڤى سێیه‌م ( سیسته‌مى نیمچه‌ سه‌رۆكایه‌تى :بۆ ئه‌وه‌ى سیسته‌مى حكومڕانى له‌ هه‌رێمى كوردستاندا ببێته‌ نیمچه‌ سه‌رۆكایه‌تى ئه‌وا ده‌بێت : - ئه‌نجومه‌نى وه‌زیران به‌رپرسیارێتى سیاسییان له‌به‌رده‌م هه‌ریه‌ك له‌په‌رله‌مان و سه‌رۆكى هه‌رێمى كوردستاندا هه‌بێت - سه‌رۆكى هه‌رێم ته‌نها له‌ ڕێگه‌ى هه‌ڵبژاردنى ڕاسته‌خۆى خه‌ڵكه‌وه‌ هه‌ڵبژێردرێت - سه‌رۆكى هه‌رێمى مافى به‌كارهێنانى ڤیتۆى به‌رامبه‌ر هه‌موو یان به‌شێك له‌ده‌قى ئه‌و پرۆژه‌ یاسایانه‌ ده‌بێت كه‌ په‌رله‌مان په‌سه‌ندیان ده‌كات - سه‌رۆكى هه‌رێم هه‌مان ئه‌و ده‌سه‌ڵاتانه‌ى هه‌یه‌ كه‌ سیسته‌مى سه‌رۆكایه‌تى له‌ ئه‌لته‌رناتیڤى دووه‌دا هه‌یه‌تى 

 

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure