عه‌لى حه‌مه‌ ساڵح
520 جار بینراوە 26/1/2020 10:44 PM

عه‌لى حه‌مه‌ ساڵح فه‌زاحه‌تى نوێ ئاشكرا ده‌كات



سنور ميديا 

ئەندامێکی پەرلەمانی کوردستان رایدەگەیەنێت، خاڵە سنوریەکان بونەتە ناوەندێک بۆ "قاچاغچێتی و قۆرخکاری" و بە ملیۆنێرکردنی چەند بەرپرس و کەسێک، دەشڵێت، "لە 80٪‏ جگەرە بە قاچاخ دەهێنرێتە هەرێمی کوردستان و مانگانە 10 ملیۆن دۆلار قازانجی قاچاغی جگەرەیە".

 

عەلی حەمە ساڵح، ئەندامی پەرلەمانی کوردستان لە نوسینێکدا لە هەژماری تایبەتی خۆی لە تۆڕی کۆمەڵایەتی فەیسبوکی بڵاویکردەوە، "خاڵە سنوریەکان بوە ناوەندێک بۆ قاچاخچێتی و قۆرخکاری و بە ملیۆنێرکردنی چەند بەرپرس وکەسێک، ئەم دۆخی گەندەڵیە لەسەرجەم خاڵە سنوریەکاندا ھەیە، ھەریەکە بە شێوازی جیا".

ئاماژەی بەوەشکردوە، بەدواداچونیان بۆ ھەمو دۆسیەکان کردوە، لە ئیبراھیم خەلیل و سمێلکاوە تا باشماخ، "ئەوەی دیومە، لوتکەی فەسادو گەندەڵی، کۆی بەرپرسانی حکومەت لەم دۆسیە مەترسیدارانە ئاگادار کراونەتەوە، بەڵام تاوەکو ئێستا بەردەوامە".

ئەو وتانەی عەلی حەمە ساڵح لەکاتێکدایە ئەمڕۆ ئاوات شێخ جەناب، وەزیری دارایی و ئابوری حکومەتی هەرێمی کوردستان لە نوسراوێکدا سوپاس و پێزانین ئاراستەی سەرجەم کارمەندانی بەڕێوەبەرایەتی گومرک لە هەرێمی کوردستان کرد.

 

عەلی حەمە ساڵح باسی لەوەشکردوە، "ئەوەی لە خاڵی سنوری سمێلکا، حومکمڕانەو بڕیاری بازرگانی دەدات چی بڕوات و چی بێت کۆمپانیای ستێرە، نەک حکومەت ئەم دۆسیەش بە وەزارەتی دارایی و ئەنجومەنی وەزیران وتراوە".

رونیشیکردوەتەوە، "ئێستا لە دەرەوەی گومرگی باشماخ، بە پشتبەستن بە ھێزی ئەمنی جگەرە بە قاچاخ دێت و بە ھیچ گومرگ و پشکنینێک تێناپەڕێت، قەبارەی ئەم قاچاغی جگەرە بەشێوەیەکی مەترسیدار زیادیکردوە، 80 ٪‏ جگەرە ئێستا بە قاچاخ لەلایەن بەرپرسانەوە بە ھێزی ئەمنی داخڵدەکرێت، مانگێکە بە نوسراوی فەرمی سەرجەم دامەزراوە فەرمیەکانمان ئاگادارکردوەتەوە، بەڵام تا ئێستا بەردەوامە".

 

ئەندامەکەی پەرلەمانی کوردستان ئەوەشی خستوەتەڕو، بەراوردی ھاتنی جگەرە لە نێوان شەش مانگی کۆتایی 2018 بە شەش مانگی کۆتایی 2019 دەریدەخات مانگانە 200 ھەزار کارتۆن جگەرە بە قاچاخ دێت، جگەرەی هاتو بە گومرگی باشماخ حوزەیران مانگی کۆتایی 2018، یەک ملیۆن و 682 ھەزار و 226 کارتۆنە.

 

عەلی حەمە ساڵح دەشڵێت، "لە 2019 قاچاغ دەستپێدەکات و گومرگی فەرمی 80٪‏ کەمدەکات، جگەرەی هاتو لە مانگی حوزەیرانی 2019 بریتی لە 322 هەزار و 547 کارتۆن، جیاوازی رەسمی گومرگی لە نێوان هەردوکیان 54 ملیۆن و 786 هەزار و 80 دۆلارە.

 

عەلی حەمە ساڵح پەیامێکی ئاڕاستەی حکومەتی هەرێمی کوردستان کردوە و دەڵێت، "تەنها لە باشماخ، قازانجی مانگێکی قاچاخی ھێلکە، جگەرە، مەشروب و دوگ 25 ملیۆن دۆلارە، بەڕێزان سەرۆکی حکومەت و جێگرەکەی، ئەم 25 ملیۆن دۆلارە ھەمو مانگێک 25 قوتابخانەی پێدروست دەکرێت، ئەمە یەک رێگای گەندەڵییە".

ئەوەشی ئاشکراکردوە، "بەھۆی ئەم دۆسیەی خاڵە سنوریانە، فشارێکی ئێجگار زۆرمان لەسەرە بۆ ئەوەی بێدەنگ بین، بەنیەتی چاکسازی ھاتینە حکومەت، بەدڵنیای ئەگەر لە ڕێگا لەم تاڵانیە نەگرێت، بێدەنگ دانانیشین، و ئەوانەی بەرپرسن لەم تاڵانیەو بە گرێبەست کۆمەڵێک کەس و کۆمپانیایان کردە ملیۆنێر دەبێت دادگایی بکرێت، نەک دەستخۆشیان لێبکرێت".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure