قاسم سوله‌يمانى
1066 جار بینراوە 12/1/2020 09:18 PM

به‌ڵێنێكى قاسمى سوله‌يمانى له‌ كاتى ڕيفرادۆمه‌كه‌ ئاشكرا ده‌بێت



سنور ميديا 

سکرتێری حیزبی سۆسیالیستی دیموکراتی کوردستان، ئاماژەبە مامەڵەی قاسم سولەیمانی فەرماندەی پێشووی سوپای قودسی ئێران لەگەڵ حیزبە کوردیەکاندا دەکات، جەخت لەسەر ئاڵۆزی دۆخی عێراق و ناوچەکەش دەکاته‌وه‌.

 

محەمەدی حاجی مەحمود، سکرتێری حیزبی سۆسیالیستی دیموکراتی کوردستان، به‌ده‌نگی ئه‌مریكای راگه‌یاندووه‌، "دۆخی عێراق و ناوچەکە ئاڵۆزە، عێراق سه‌ره‌وه‌ری لەدەستداوە و ئێراق و ئەمەریکا لەسەر خاکەکەی ململانێیانە."

 

باسی له‌وه‌شكردووه‌، "مامەڵەی کورد تا ئێستا لەگەڵ دۆخی عێراق دا باشبووە، کورد نایەوێت ببێتە بەشێک لەکێشە مەزهەبی و تایەفیەکانی عێراق؛ پێویستە ئەمەریکا وئێران و لایەنەکانیش موراعاتی کورد بکەن، چونکە کورد تەنها لایەنە لە شایی و شیوەندا سەربڕدراوە، لەشەڕی عێراق و داعشیشدا هەر لێی کوژراوە."

 

محەمەدی حاجی مەحمود یەکێکبوو لەو سیاسیانەی پشتگیری ریفراندۆمی هەرێمی کوردستانی لە ساڵی 2017 کرد، لەکاتێکدا هەفتەی رابردوو سیناتۆرێکی ئەمەریکی پشتگیری بۆ سەربەخۆیی کوردستان ڕاگەیاند.

 

لەمبارەیەوە محەمەدی حاجی مەحمود وتی، "بەرپرسانی ئەمەریکا تا لە پۆستدا نین، پشتگیری سەربەخۆیی کورد دەکەن، کە چوونە پۆستەوە بێ دەنگن، ئێمە ڕێزی ڕای سیناتۆرەکە دەگرین، بەڵام بۆ پێشتر پشتگیرمان نەبوو، بۆیە ئەمەریکیەکان دەبێت لەگەڵ مەسەلەی کورددا واقیعی بن نەک عاتفی".

 

دوای بە ئامانج کردنی قاسمی سولەیمانی فەرماندەی هێزی قودس لەلایەن ئەمەریکاییەکانەوە، سکرتێری حیزبی سۆسیالیستی دیموکراتی کوردستان، فەرماندەی هێزی قودسی بەقوربانی ناوبرد، لێرەدا مەبەستەکەی روونتردەکاتەوە، دەڵێت، "حوکمڕانی لەعێراقدا ناعەدالەتی تیایە، ئەم ناعەدالەتیەش عێراقی خستەگێژاوەوە، خەڵک هاتە سەر جادە، حەشد تەداخولی کرد و ئەمەریکا لێیدا، قاسمی سولەیمانی هات بۆ چارەسەری کێشەکە و بووە قوربانی خراپ کارکردنی عێراقیەکان، گەر خراپ حوکمڕانی عێراق نەبێت، سولەیمانی بۆ دێ؟."

 

سەبارەت بە مامەڵەی قاسمی سولەیمانی لەگەڵ بەرپرسانی حیزب و لایەنە کوردیەکاندا، محەمەدی حاجی مەحمود وتی، "بەتەنها و بەکۆمەڵیش قاسمی سولەیمانیم بینیووە، پیاوێکی هێمن و لەسەرخۆبوو، شتی فەرز نەدەکرد و گوێی دەگرت، هەڕەشەم لێ نەبیستووە."

 

لەبەشێکی تری وته‌كانیدا محەمەدی حاجی مەحمود باسی هەڵوێستی قاسمی سولەیمانی لەهەمبەر ریفراندۆمی هەرێمی کوردستان کرد، وتی، "سولەیمانی دژی ریفراندۆم بوو لەکەرکوک، پێیوتین، ئه‌گەر ریفراندۆم لەکەرکوک نەکەن، تا حەمرینتان ڕادەست دەکەین. تەنانەت وتی، داوام لە شێخ جەعفەر کردووە هێز بێنن بۆ حەمرین، بەڵام شێخ جەعفەر وتویەتی: ئێستا بۆمان ناکرێت".

 

هەروەها وتیشی، "خۆم گوێم لێبوو، قاسم سولەیمانی وتی: ریفراندۆم نەکەن، تا حەمرینتان رادەست دەکەین".

 

محەمەدی حاجی مەحمود روونیکردەوە، "قاسمی سولەیمانی، عێراق و وڵاتانی یەمەن و سوریا و لوبنانی بەیەکتریەوە بەستبوویەوە، بەڵام دوای ئەو ئەو یەکخستنەوەیە نامێنێت، نێوانی ئێران و ئەمەریکاش بەرەو هێوربوونەوە و رێککەوتن دەڕوات".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure