ڕێباز حه‌ملان
2096 جار بینراوە 4/12/2019 10:43 AM

لێکۆڵینەوە لە ڕێباز حەملان و ستافەکەی دەکات



سنور ميديا 

لیژنەی لێپرسینەوە و هەڵسەنگاندنی بزوتنەوەی گۆڕان بە تۆمەتی ״گەندەڵی و خیانەتکردن لە گۆڕان״ لێکۆڵینەوە لە ڕێباز حەملان، یاریدەدەری سەرۆکی حکومەت بۆ کاروباری چاکسازی دەکات و لە ئێستاشدا سەرقاڵی کۆکردنەوەی مەلەفن لەسەری.

 

کۆتایی مانگی ڕابردوو، بزووتنەوەی گۆڕان لیژنەی لێپرسینەوە و هەڵسەنگاندنی بۆ ئەو کادرانەی پێک هێنا کە ئەرکی حکومییان وەرگرتووە، چ ئەوانەی ئێستاش لە ناو گۆڕانن چ ئەوانەی گۆڕانیان جێ هێشتووە. بڕیاریان داوە هەرکەس گەندەڵیی بەسەردا ساغ ببێتەوە ڕاستەوخۆ مەلەفەکەی دەدەنە دادگا.

 

خەلیل سەركانی، ئەندامی جڤاتی گشتیی بزووتنەوەی گۆڕان بۆ هه‌فته‌نامه‌ى ״ئاژانس״ وتی: ״لیژنەی لێپیچینەوەی بزووتنەوەی گۆڕان بۆ ئەوەیە چیتر باجی ئەو كەسانەش نەدات كە لەسەر پشكی بزووتنەوەكە پۆستی حكومی و ڕێكخراوەییان وەرگرتووە و گەندەڵییان كردووە یاخود گومانیان لەسەر هەیە، چونكە ئەگەر گۆڕان لێچێینەوە لەگەڵ نوێنەران و بەرپرسانی نەكات، دەبێت فاتیحە لەسەر خۆی بخوێنێت.״

 

وتیشی: ״لیژنەكەی گۆڕان لە لایەن چەند كەسێكی یاساییەوە سەرجەم دیكۆمێنتەكان كۆ دەكاتەوە بە مەبەستی لێپرسینەوە لە ڕێباز حەملان و ستافەكەی، لە ڕووی گەندەڵی و خیانەتكردنیان لە ڕۆحی كاك نەوشیروان و دەنگدەران، لەبەر ئەوە تا ئێستا گۆڕان لە دادگا سكاڵای یاسایی لەسەر ناوبراو نەكشاندووەتەوە.״

 

هه‌فتانه‌كه‌ چەند جارێك پەیوەندیی كرد بە ڕێباز حەملان، وەزیری پێشووی دارایی و ئابووریی هەرێم، بەڵام پەیوەندییەكە سەری نەگرت.

 

ئەندامێكی خانەی ڕاپەڕاندنی بزووتنەوەی گۆڕان، کە نەیویست ناوی بهێندرێت بۆ ״ئاژانس״ دەڵێت: ״لیژنەی هەڵسەنگاندن لێكۆڵینەوە لەگەڵ ئەو كەسانە دەكات كە لەسەر حسابی بزووتنەوەی گۆڕان پۆستیان وەرگرتووە و كارنامەی هەڵبژاردنەكان و سیاسەتی بزووتنەوەكەیان پێشێل كردووە لە پێناو بەرژەوەندیی خۆیان.״

 

وتیشی: ״سەرەتا هەڵسەنگاندن و لێكۆڵینەوە لە كار و چالاكیی ئەو كەسانە دەكرێت، كە ئێستا بە نوێنەرایەتیی گۆڕان لە حكومەتدان بۆ ئەوەی بزانین تا چەند توانیویانە بەڵێنەكان بۆ جەماوەرمان جێبەجێ‌ بكەن، تاكو زیاتر بەرچاومان ڕوون بێت لە بڕیاری بەردەوامی یاخود كشانەوەمان لە حكومەتی هەرێم.״

 

״ئەوانەش كە پێشتر لەسەر حسابی ئێمە پۆستیان وەرگرتووە و بۆ دەربازبوون وازیان لە گۆڕان هێناوە، لە دەرەوەی حزب لە لایەن لیژنەی یاساییەوە بە پێی جۆری دۆسیەكانیان سكاڵایان لەسەر تۆمار دەكەین و ڕووبەڕووی دادگا و لیژنەی نەزاهە و دیوانی چاودێریی داراییان دەكەینەوە.״ ئەندامەکەی خانەی ڕاپەڕاندنی گۆڕان وای وت.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure