سنور ميديا
1038 جار بینراوە 27/10/2019 01:50 PM

له‌سه‌ر سكاڵايى مه‌تين بارزانى فه‌رمانى گرتن بۆ ژماره‌يه‌ك ڕۆژنامه‌نووس ده‌ركراوه‌



سنور ميديا 

لەسەر سکاڵایەکی مەتین بارزانی، فەرمانی دەستگیرکردن بۆ پێنج ڕۆژنامەنووس دەرکرا و هەریەک لە نیاز عەبدوڵا ڕۆژنامه‌ نووس و هێمن مامەند بۆ بەرگرییکردن لەخۆیان، دەچنە بەردەم دادگای هەولێر، نیاز عەبدوڵا دەڵێت: تۆمەتبارکردنم پێچەوانەی یاسایە و بۆ تۆڵەکردنەوەیە لەبەرامبەر ڕەخنەگرتنم لە داگیرکارییەکانی تورکیا.

 

لەسەر سکاڵای مەتین بارزانی، برازای نێچیرڤان بارزانی سەرۆکی هەرێمی کوردستان، فەرمانی دەستگیرکردن هەریەک لە ڕۆژنامەنووسان 'نیاز عەبدوڵا، هێمن مامەند، محەمەد ڕەئوف، نامق ڕەسوڵ، فازڵ حەمەڕەفعەت' دەرچووە و هەریەک لە نیاز عەبدوڵا و هێمن مانەد هاوكات ئه‌ندامى ده‌سته‌ى نووسه‌ران له‌ سايتى مه‌ودا پرێس بە مەبەستیی بەرگرییکردن لەخۆیان، ئەمڕۆ دەچنە بەردەم دادگای هەولێر.

 

سکاڵاکەی مەتین بارزانی، بە تۆمەتی خراپ بەکارهێنانی ئامێرە ئەلیکترۆنییەکان و گواستنەوەی هەواڵ و ڕاپۆرتی ڕووداوی تەقەکردنەکەی ڕێستۆرانتی هۆقەباز-ی شاری هەولێرە، کە تیایدا بەرپرسێکی باڵای میتی تورک کوژرا و گوایە ئەو ڕۆژنامەنووسانە مەتین بارزانی-یان وەک بکوژی بەرپرسەکەی میتی تورک تۆمەتبارکردووە.

 

نیاز عەبدوڵا، ئەندامی دەستەی نووسەرانی ماڵپەڕی درەو میدیایە و وەک خۆی دەڵێت"نە بەشێوەیەکی زارەکی نە لە ھیچ نووسینێک ناوی ئەو نەوەیەی مەلا مستەفا بارزانی و برازاکەی نێچیرڤان بارزانیم نەھێناوە، بەڵکو ئەندامبوونم وەک دەستەی نووسەرانی "درەو میدیا" کراوەتە پاساوی یاسایی تەنیا لەبەرئەوەی سێ ھاوڕێی ئازا و بەڕێز و ئازادیخوازم لە سەرنووسەر و دەستەی نووسەران ڕاپۆرتێکی رۆژنامەوانیان ئەنجام داوە".

 

نیاز عەبدوڵا، بە سايتى ڕۆژنیوزی ڕاگەیاندوه‌ :"فەرمانی دەستگیرکردنم وەک تۆڵەکردنەوەیە لەبەرامبەر ڕەخنەگرتنمان لە سیستمی سیاسیی و داگیرکارییەکانی دەوڵەتی تورک لەناو خاکی هەرێمی کوردستان، ئەگەرنا من بە هیچ شێوەیەک نە بەزارەکیی و نە بە نووسین، باسی برازای نێچیرڤان بارزانیم نەکردووە".

 

نیاز عەبدوڵا، وتیشی:"ئەو بیانووەی ئێمەی وەک "تۆمەتبار" پێ ناوزەدکراوە، جگە لەوەی بەپێی ماددەی ٩ی یاسای ژمارە ٣٥ی ساڵی ٢٠٠٧ تۆمارنەکراوە و بە پێی ماددەی ٢ی خراپ بەکارھێنانی ئامێرە ئەلیکترۆنییەکان تۆمارکراوە، ئەوەی سەرنجی یاساییە "تۆمەتبارکردنمان" تەنانەت پێچەوانەی بنەمای یاسای خراپ بەکارھێنانی ئامێرە ئەلیکترۆنییەکان (مۆبایل) و یاسای کاری ڕۆژنامەنووسیشە".

 

باسی لەوەشکرد"بەپێی یاسای خراپ بەکارھێنانی ئامێرە ئەلیکترۆنییەکان دەبێ بەڵگەی تاوان ھەبێت، بەڵام لەم دۆسیەیەدا ھێند یاسا و دادگا بەکارھێندراون بۆ پێکانی ئامانجی سیاسی و حیزبی و دەستڕۆیشتوویی بنەماڵەیی، ئازادی رۆژنامەوانی و یاسای رۆژنامەوانی لە فەرھەنگی یاسایی بە تەواوی دەرکراون".

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure