سنور ميديا
2127 جار بینراوە 14/10/2019 08:34 PM

هه‌سه‌ده‌ هه‌واڵى سه‌ركه‌وتنى گه‌وره‌ى ڕاگه‌ياند



سنور ميديا 

ناوەندی ڕاگەیاندنی هێزەکانی سوریای دیموکرات (هه‌سه‌ده‌) ئاماری شەڕی 24 كاتژمێری رابردووی بڵاوكرده‌وه‌ و رایگه‌یاند، لە ئەنجامی شەڕی دوێنێ شەو تا ئێستا لە دژی داگیرکەران بەدرێژایی سنورەکان 78 چەتە و سەربازی تورک کوژراون، هەروەها 20 شەڕڤان و 15 هاوڵاتی مەدەنی شەهیدبوونە.

 

گرێسپی

سوپای داگیرکەری تورکیا و چەتە هاوپەیمانەکانی لە دوو قۆڵەوە هێرشێکی فراوانیان بۆسەر شارەکە کرد، بەهەزاران شەڕڤان وەڵامی ئەو هێرشانەیان دایەوە، هەروەها فڕۆکە جەنگییەکان بەشێوەیەکی بەردەوام تەواوی شارەکەی بۆردوومان کرد، لەئەنجامی شەڕی دوێنێ کە لە کاتژمێرەکانی بەیانیدا دەستی پێکرد چەندین چەتەو سەربازی تورک کوژران.

 

هەروەها لەئەنجامی شەڕی قورس و بەردەوامی تۆپباران و بۆردوومانی فڕۆکە جەنگیەکان و سوڕانەوەی فڕۆکەی سیخوڕی بەسەر ناوچەکە، پەیوەندیمان لەگەڵ گروپێک لە شەڕڤانەکانمان نەما.

 

لە قۆڵی عەین عیساوە کۆمەڵێک چەتە بە هاوکاری شانە نوستووەکان خۆیان گەیاندە نزیک کەمپی عەین عیسا کە ژمارەیەکی زۆری بنەماڵەی چەتەکانی داعشی تێدایە، لەنێوان ئەوان و شەڕڤانانی ئیمە شەڕ ڕوویدا، ئاڵۆزی لە کەمپەکە درووستبوو بەمهۆیەشەوە ژمارەیەک لە بنەماڵەی چەتەکانی داعش لە کەمپەکە هەڵهاتن.

 

سیلۆک

دوێنێ دواینیوەڕۆ، دوای ئەوەی سوپای داگیرکەری تورک بەتانک و تۆپ شارۆچکەکەی تۆپباران و بۆردومان کرد، هێرشی سەر شارۆچکەکەی دەستپێکرد، لەناوخۆی شارۆچکەکەدا شەڕ ڕوویدا، هەروەها لە گوندی نیس تەل کاتێک هێزی داگیرکەر ویستی بەرەوپێشەوە بچێت لەنیوان ئێمەو چەتەکاندا شەڕ ڕوویداو هێزەکانمان وەڵامیان دانەوە و داگیرکەران بە ناچاری کشانەوە، پاش ئەو شەڕە، هەرێمەکە بەتەواوی بۆردوومان و تۆپباران کرا.

 

لە قۆڵی گوندی سکەرێ لەنێوان شەڕڤانانی ئێمەو چەتەکاندا شەڕ ڕوویدا و 2 چالاکی ئەنجامدرا، تێیدا 10 چەتە کوژران و چەندین چەک و جبەخانە دەستی بەسەرداگیرا.

 

دێرک

سوپای داگیرکەری تورک بە فڕۆکەی کەشف و فڕۆکەی جەنگی گوندەکانی خراب ڕەشکە، برکێ و ریهانیکێ ی بۆردوومان کرد، لەئەنجامدا 3 هاوڵاتی مەدەنی ئەو گوندانە شەهیدبوون.

 

هێزەکانی ئێمە دژی خاڵێکی سوپای داگیرکەری تورک کەرستە سەربازییەکان چالاکیان ئەنجامدا و تێیدا بەلایەنی کەم 3 سەرباز کوژران و ئۆتۆمبێلێکی سەربازی تێکشکێنرا، باس لەوەدەکرێت لەنێو کوژراواندا ئەندامی دەزگای سیخوڕی میت هەیە.

 

عامودێ

 

گوندەکانی عامودێ و درباسییە لەلایەن سوپای داگیرکەری تورک تۆپباران دەکرێت و لەلایەن هێزەکانی ئێمەوە وەڵام دەدرێنەوە.

 

سەرێکانی

هێزەکانی ئێمە لە چالاکیەکی تایبەتدا لە گەڕەکی پیشەسازی 8 چەتەیان کوشت، چەتەکانی دیکەش هەڵهاتن و گەڕەکەکە بەتەواوی لە چەتەکان ڕزگارکرا.

 

سوپای داگیرکەری تورک هەوڵیدا لە دەروازەی سنوری و گوندی تل حەلەف بەرەو پێشەوە بچێت، لەنێوان هێزەکانی ئێمەو داگیرکەراندا شەڕ ڕوویداو بەمهۆیەشەوە بەرەو دواوە کشانەوە.

 

دوێنێ لە کاتژمێرەکانی ئێوارە کاروانێکی هاوڵاتیانی مەدەنی هاتنە نێو شارەکەوە تاوەکو بانگی ڕاوەستانی شەڕ بکەن، لەلایەن فڕۆکەی کەشفی دەوڵەتی تورکەوە بۆردوومان کران، لەئەنجامی ئەو هێرشە دڕندەیەدا هاوڵاتیانی مەدەنی کۆمەڵکوژکران و تێیدا 12 هاوڵاتی مەدەنی شەهیدبوون و 64 مەدەنی دیکەش بە قورسی برینداربوون.

کۆبانێ

گوندەکانی کۆبانێ لەلایەن سوپای داگیرکەری تورکەوە تۆپباران کران، هێزەکانی ئێمەش وەڵامیان دانەوە، هەروەها هێزەکانی ئێمە وەڵامی ئەو گولەبارانەیان دایەوە کەلە ئاراستەی دەرگای سنوری موشد پینار-ەوە دەهات و تێیدا 3 سەربازی تورک کوژران.

 

لە دوێنێ شەوەوە تاوەکو ئێستا لە ئەنجامی ئەو شەڕانەدا بەدرێژایی سنور 78 چەتە و سەربازی تورک کوژراون و هەروەها 28ی دیکەش برینداربوونە.

هەروەها 20 شەڕڤانی ئێمە و 15 هاوڵاتی مەدەنی شەهیدبوونەو 58 شەڕڤان و 64 هاوڵاتی مەدەنی برینداربوونە.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure