نازم ده‌باغ
63 جار بینراوە 7/10/2019 10:55 AM

نازم ده‌باغ: ده‌بێت كورد له‌گه‌ڵ ئه‌و هێڵه‌ی عیراق بێت كه‌ ده‌توانێت مافه‌كانی دابین بكات



سنور ميديا 

نازم ده‌باغ، نوێنه‌ری حكومه‌تی هه‌رێمی كوردستان له‌ تاران باس له‌ خۆپیشاندانه‌كانی به‌غدا و کاریگەرییەکانی ده‌كات و رایده‌گه‌یه‌نێت، دەبێت کورد لەم کاتەدا وریا بێت، ئەزمون وەربگرێت کێ بەهێزە، كێ دەتوانێت ئاسایشی عیراق بپارێزێت کێ دەتوانێت بەپێی دەستووری عیراقی مافەکانی کورد دابین له‌گه‌ڵ ئه‌و هێڵه‌یان بێت.

 

نازم دەباغ، له‌ لێدوانێكیدا بۆ ده‌نگی ئه‌مریكا وتى: "بەبۆچونی خۆم ئەم خۆپیشاندانانەی ئێستای عیراق دەرئەنجامە، دەرئەنجامی ئەوەی کە حکومەتە یەک لەدوایەکەکانی عیراق نەیانتوانیووە داواکاری خەڵکی عیراق جێ بەجێ بکەن بۆیە هیچ کەس ناتوانێت بڵێت داواکاری خۆپیشاندەران ڕەوا نیە".

 

هه‌روه‌ك ئاماژه‌ به‌وه‌شده‌كات: "خاڵی دووەم من پێم وانیە ئێران دەستی لەپشت ئەم خۆپیشاندانانەوە هەبێت چونکە دروستبوونی نا ئارامی لەناوچەکەدا لەم کاتەدا رەنگدانەوەی لەسەر کۆماری ئیسڵامی ئێران دەبێت، ئارامی عیراق، ئارامی ئێرانە وە بەپێچەوانەشەوە، خاڵێکی تر ئەوەیە کە عیراق توانیوێتی بێ لایەنی خۆی بپارێزێت بۆیە پرسیارێک دێتە ئاراوە کێ قازانج دەکات کێ زیان دەکات لەو بێ لایەنیەی عیراق؟ بەبۆچوونی من ئەوانەی بیانەوێت دژایەتی توندی ئێران بکەن ئەم جۆرە بێ لایەنیە لەبەرژەوەندییان نیە".

 

دەباغ وتیشی: "کاتێک کە جادەی دوو ساید دروست دەبێت، زۆر جاریش ئەم لایانە خۆڕسکن بەوەی کەسەیر دەکەیت بۆ ماوەیەکی درێژ کەچەند رۆژێک تێدەپەڕێت هەست ناکرێت کە سەرکردایەتیەکی ئاڕاستەکراوی هەبێت بۆ ئەوەی بتوانێت بەدوای مافەکانی خۆیدا بڕوات، ئەمە نیشانەی دەوێت بەڵام لێرە ئەم فەزایە کەدروست بوو ئەوجا خاوەن بەرژەوەندییەکان دەکەونە ناو بابەتەکان و دەکەونە ناو شەقامەوە تا بتوانرێت هەریەکە بەلای خۆیدا رایبکێشێت، کە من پێم وانیە وا بە ئاسانی هێزی ئاسایش و پۆلیس و سوپای عیراقی دەستیان بچێتە گیانی ئەو کەسانەی کە لەسەر شه‌قامەکان خۆپیشاندان دەکەن، بۆیە دەکرێت نیشانەیەکی پرسیار دابنێین کەکەسانێک بۆ ناشرین کردنی ڕووی زیاتری حکومەت لەڕووی سەربازی و داپڵۆسینەوە جگە لە نەبوونی خزمەتگوزاری و چاکسازی و گەندەڵی ئەمەشی بهێننەسەر کە ئەوەتا بەشێوەیەکی نا دیموکراسیانە خۆپیشاندەران سەرکوت دەکرێن".

 

باشە ئەو کەسانە هی ناوخۆی عیراقن یا دەرەوە، وەک خۆت دەڵێی کەسانێک هەن؟

نازم دەباغ دەڵێت: "ئەو کەسانە لەناوخۆی عیراقن بەڵام ئەوە دوور نیە کە لەدەرەوە بجوڵێنرێن، بەڵام هەست ناکەم دەستوەردانی راستەوخۆی حکومەتی ئێرانی هەبێت لەم خۆپیشاندانانە بەڵام بەدڵنیایی خوێندنەوەم بۆ سیاسەتی حکومەتی ئێرانی ئەوەیە لەگەڵ ئەوەنیە نائارامی دروست ببێت واتە لەجیاتی لەپشتی خۆپیشاندەران بێت بۆ ئەم بارودۆخەی کەهەیە پێچەوانەکەی راستە، چونکە حکومەتی عیراقی بەرهەمی ئەو هەوڵانەیە کەدرا بۆ پێکهێنانی حکومەت ئێستا بەرژەوەندی کێی تێدایە کە ئەم حکومەتە بڕوخێت؟ تەنها بەرژەوەندی ئەوانەی تێدایە کەنایانەوێت جارێکی تر عیراق ببێتەوە پێشەوا بۆ پڕۆسەی ئاشتی و ئارامی بۆ ناوچەکە، بەڵام پرسیارەکە ئەوەیە ئەم سیاسەتەی سەرۆکی ئەمریکا پەیڕەوی دەکات کەدەڵێت، پارەم بدەرێ بەرگریت لێبکەم، دەکرێت ڕەوابێت لەڕووی ستراتیژیەت و ئایندەدا؟".

 

نوێنەری حکومەتی هەرێمی کوردستان لەبارەی ئەوەی ئایا پێتان وایە ئێران پشتگیری مانەوەی کابینەی عادل عەبدولمەهدی بکات؟ دەڵێت، "من پێم وایە مانەوەی کابینەکەی عادل عەبدولمەهدی لەبەرژەوەندی هەموو لایەکدایە".

 

سایتی مەشرەق نیوز کەنزیکە لە سوپای پاسدارانی ئێرانەوە وتارێکی سەرنوسەری جیهان نیوزی بڵاوکردوه‌تەوە، بەناونیشانی "کلیلی چارەسەری خۆپیشاندانەکانی بەغدا لە تارانە".

 

بەڵام نازم دەباغ دەڵێت: "هەرکەس ئازادە لە دەربڕینی بۆچونی خۆی، بەڵام بەبڕوای من کلیلی چارەسەر لەدەستی سەرکردە عیراقیەکان خۆیاندایە، جا ئەو سەرکردانە هەریەکەی خۆی دەبەستێتەوە بەیەکێکەوە، یەکێک خۆی دەبەستێتەوە بە ئێران یا ئەمریکا، یا تورکیا، واتە بەڕاستی کلیلی چارەسەرەکە لەدەست خۆمانە، جا هەرکەس پەیوەندیدار بێت بە چ بیروباوەڕێکەوە زیاتر لەخزمەتی ئەو کەناڵە دەبێت".

 

لەوەڵامی ئەو پرسیارەی ئایا ئێران هیچ پەیامێکی راستەوخۆ یا ناڕاستەوخۆی داوەتێ بۆ کوردەکان سەبارەت بەم خۆپیشاندانەی بەغدا؟

 

نوێنەری حکومەتی هەرێمی کوردستان وتی: "هیچ پەیامێکی راستەوخۆ بەمن نەدراوە، بەڵام بینیمان باڵیۆزی ئێران لەبەغدا سەردانی هەرێمی کوردستانی کرد و لەگەڵ سەرۆکی حکومەت و سەرۆکی هەرێم کۆبوەوە، سەرۆکی هەرێم "جەنابی کاک نێچیرڤان" پەیامێکی بڵاوکردەوە کە داوادەکەین کێشە رەواکانی خەڵک چارەسەر بکرێت".

 

ئایا سەردانی باڵیۆزی ئێرانی بۆ لای کاربەدەستانی کورد بۆ ئەوەبوو کە کورد پشتیوانی مانەوەی حکومەتەکەی عادل عەبدولمەهدی بکات؟

 

لەوەڵامدا نازم دەباغ وتی" من ناتوانم بەو وردیەی تۆ باسی دەکەی بیڵێم، بەڵام دەتوانم بۆچونی خۆم بڵێم جەخت دەکەمەوە پەیامی ئێران پەیامی ئارامی و ئاسایشە، پەیامی ئه‌وەیە کە حکومەتەکە بەهێز بێت تابتوانێت بەدەم داخوازییەکانی خەڵکی عیراقەوە بڕوات کە رەنگە بەشێک لەو داخوازییانە کوردیش بگرێتەوە."

 

نازم دەباغ ئەوەشی وت: "دەبێت کورد لەم کاتەدا وریا بێت، چونکە لەڕابردوودا هەر ڕاپەڕین و خۆپیشاندانێک کرابێت لەبەغدا لەسەردەمی روخانی پادشایەتی تا ئێستا کە کورد بەشداربووە، بەڵام کامیان توانیویانە بەپێی ئەو بەرنامەیەی کە دانرابوو پێشتر داواکارییەکانی کورد جێ بەجێ بکات؟ بۆیە دەبێت ئێمە ئەزمون وەربگرین کێ بەهێزە، كێ دەتوانێت ئاسایشی عیراق بپارێزێت کێ دەتوانێت بەپێی دەستووری عیراقی مافەکانی کورد دابین بکات ئێمە دەبێت لەگەڵ ئەو خەتە بین، وریا بین بەزوویی نەکەوینە ئەو پڕۆژانەوە کەهەم ئایندەی کورد دەخاتە مەترسیەوە وە هەم ئایندەی عیراقیش بەرەو چارەنوسێکی نادیار دەبات، بیرمان نەچێت ئەزمونی سوریا چۆن بوو کە چۆن بۆ هەڵخەڵەتاندنی کورد سەرۆکی ئەنجومەنیان کورد دانا دواتر گۆڕییان بە "مەسیحیەک".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure