گۆڕان و يه‌كێتى
650 جار بینراوە 27/9/2019 03:30 PM

گۆڕان دۆخى خراپى نێوانيان له‌گةڵ پارتى ئاشكرا ده‌كات



سنور ميديا 

په‌رله‌مانتارێكی بزوتنه‌وه‌ی گۆڕان باس له‌ دروستبوونی سێ درز له‌ رێككه‌وتنی نێوان بزوتنه‌وه‌كه‌ی و پارتی دیموكراتی كوردستان ده‌كات و ده‌ڵێت: "لە دانوستاندا پارتی بەڵێنی بێ گومرگ و قسەی حسابی زۆر ده‌كات، هەنگوینی لەدەم ده‌باریت، بەڵام لەم سەرەتایەی کابینەی 9دا، پارتی لانیکەم لە سێ لاوە رێکەوتنەکەی لەگەڵ گۆڕان شکاندوە".

 

هۆشیار عه‌بدوڵا، په‌رلمانتاری بزوتنه‌وه‌ی گۆڕان له‌ په‌رله‌مانی عیراق رایگه‌یاندوه‌: نە ئێستا هەر لە شاخەوە پارتی لە رێککەوتنەکاندا ئینتیقائی مامەڵەی کردوە،تا رێکەوتن دەسازێنێ زۆر دێتە پێشەوە،کە واژۆ کرا چیی لە بەرژەوەندەی خۆی بێت جێبەجێی ئەکا،چیی لە سودی ئەو نەبێت ئیهمالی ئەکا،ئەمە راستیەکە لە هەمو رێکەوتنەکانی پارتیدا لە شاخ و شار،لە شەڕ و ئاشتیدا،زەق و ڕونە.

 

به‌وته‌ی ئه‌و په‌رله‌مانتاره‌: لە دانوستاندا پارتی بەڵێنی بێ گومرگ و قسەی حسابی زۆر دەکات، بەهار دێنێتە چۆکان، هیچ رستەیەکی نییە گوڵگوڵی نەبێت، هەنگوینی لەدەم دەبارێت، بەڵام هەر تا رێکكەوتن کرا، ئیدی چاوی بەرژەوەندی خۆی نەبێ هیچ شتێک نابینێت، رونیشیكردوه‌ته‌وه‌ كه‌ پارتی لە سەرەتای ئه‌م کابینەی نۆ دا، لانیکەم لە سێ لاوە رێکەوتنەکەی لەگەڵ گۆڕان شکاندوە:

 

یەک: بە گوێرەی هەمو جەولەکانی گفتوگۆی نێوان گۆڕان و پارتی،لە باسیی نەوتدا پارتی واینیشانداوە و بەڵێنی وابوە کە ئەوان دەیانەوێ بە پەلە ڕێکبکەون لەگەڵ بەغداد و نەوتەکە بە زویی رادەست ئەکەن و تاکە چارەسەر لایان سازانە لەگەڵ بەغدا.

 

هەتا ئێستا نە نەوتیان رادەست کردوە و نە رێککەوتون لەگەڵ بەغداد،بەمەش مەترسیان بۆسەر بودجە و موچەی خەڵک دروستکردوە.

 

دوو: بریار وابو لە مانگی یەکەمی کاری پەرلەماندا یاسای چاکسازی موچە بێتە پەرلەمان و تێبپەرێنرێت، بە گوێرەی زانیاریەکان ماوەی زیاتر لە مانگێکە ئەنجومەنی وەزیران بڕیاریداوە یاساکە بێتە پەرلەمان لیژنەیەکیش پێکھاتوە، بەڵام تائێستا لیژنەکە کۆنەبوەتەوە! ئەمە لە کاتێکدا ئیرادە و ئیدارەی هەردو سەرۆکایەتی حکومەت و پەرلەمان بە تەواوی و لە سەدا سەد لای پارتیە.

 

سێ: بریار وابو جگە لە جێگری سەرۆکی حکومەت،سەرۆکی ئەنجومەنی وەزیران یەک یاریدەدەری هەبێت بۆ کاروباری چاکسازی و ئەوەش لە پشکی گۆڕان بێت و یاسای بۆ دەربکرێ و بە یاسا ئەرک و فەرمانی بۆ دیاری بکرێت، کەچی ئێستا رۆژانە سەرۆکی حکومەت بە نایاسایی و بێ ئەوەی دەسەڵاتی ئەوەی هەبێت و یاسا ریگەی پێبدا،خەڵکانێكی پارتی (لە هەڵبژاردنی دەموچاوەکانیشدا بێ هیچ جۆرە موراعاتێکی گۆڕان)، دەکاتە یاریدەدەری خۆی!

 

وه‌ك هۆشیار عه‌بدوڵا ده‌ڵێت: پێویست بو یەکێتی کە بە حساب لە سەرۆکایەتی حکومەتدا جێگری هەیە لە گۆڕان زیاتر گرفتی لەگەڵ دانانی نایاسایانەی ئەو یاریدەدەرانە هەبێت بە تایبەت کە هێشتا جێگرەکەی لەسەر کورسی یەدەگ دانیشێنراوە و دەسەڵاتێکی ئەوتۆی نییە و دانانی هەمو یاریدەدەرێکیش کەمکردنەوەی روبەر و دەرفەتی دەسەڵاتەکانی جێگرە،بەڵام تائێستا هەست ناکرێ کە گرفت بێت لایان و وەک زۆر شتی تر بە گیانی وەرزشی وەریانگرتوە.

 

ده‌شڵێت: "من ناڵێم ئەو سێ درزە کۆتایی رێکەوتنی نێوان پارتی و گۆڕانە، لەگەڵ ئەوەشدام گۆڕان نەفەسی درێژ بێت و پەلە نەکات، بەڵام گرنگە دیسان بەڵێن شکێنیەکەی پارتی بۆ ئەم رێکەوتنەش دۆکۆمێنت بکرێت، لە نێوان شەش مانگ بۆ ساڵی یەکەمیی تەمەنی ئەم کابینەیە زۆر شت بۆ بزوتنەوەی گۆڕان یەکلا دەبێتەوە و لە هەمو بارێکدا من لایەنگری ئەوەم کە گۆڕان بەرپرسیارانە مامەڵە بکات چونکە ئەرکی سەرشانی گۆڕان لە هاوکیشەی سیاسی هەرێمدا لە زۆر لایەن قورسترە،ئەمە ئەمری واقعە نەک دیعایەیەکی حزبی."

 

له‌ به‌شێكی دیكه‌ی باسكردنی ئه‌و سێ درزه‌دا په‌رله‌مانتاره‌كه‌ی بزوتنه‌وه‌ی گۆڕان رایگه‌یاندووه‌: بڕوانن کە گۆڕان لە هاوکێشەی ئۆپۆزسێۆندا نامێنێت دۆخی ئۆپۆزسێۆن چۆنە؟ دیقەت لە سەنگ و رۆڵ و جوڵەی ئۆپۆزسێۆنی ئێستا بدەن چەند بزرو و لاوازە،کاتێکیش گۆڕان دەچێتە حکومەتەوە چاوەروانی خەلک لێی گەورەیە و زۆر جار لە حەجمی خۆی زیاتر فشاری دەخاتە سەر و چاوی لەوەیە شتێک بکا، شتێک بگۆرێ،چونکە ئەو بزوتنەوەیە بە دەنگی خەلك بۆ گۆڕانکاری و چاکسازی دروست بووە، خۆی لەو دوو ئەرکە بێبەری بکات نامێنێ.

 

ئاماژه‌ی به‌وه‌شداوه‌ كه‌ ئەو سێ درزە کە سێ دۆسییه‌ی گرنگن بریتین لە (دۆسییه‌ی نەوت) و (چاکسازی موچە) و (بە نا یاسایی بەخشینەوەی پۆست و پایە) سێ دۆسیه‌ت پەیوەندی راستەوخۆیان بە ژیانی خەلکەوە هەیە، گرفتی حزبی و سیاسیی نین و چاکسازی تێیاندا بۆ چاوی رەشی گۆڕان نییە بۆ سەرکەوتنی حوکمڕانییە.

 

له‌ دوا سه‌رنجی خۆشیدا هۆشیار عه‌بدوڵا رایگه‌یاندووه‌: وەفدی دانوستاندنی گۆڕان باسی دەرفەتێکی سەرەتایی شەش مانگیان دەکرد بۆ ئەم کابینەیە بزانین لە شەش مانگ و تەنانەت ساڵی یەکەمی تەمەنی ئەم کابینەیە هەنگاوەکانی گۆڕین و چاکسازی دەگەن بەکوێ؟ تا ئەو کاتەش بە هەموو تواناوە پشتیوانی هەمو هەوڵێک دەبین بە ئاراستەی چاکسازیدا و بێگومان بەدەنگی بەرزیش دژی هەر لادان و چەقبەستنێک دەبین کە رێگر بێت لە گۆڕانکاری.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure