سامان گەرمیانی
462 جار بینراوە 30/8/2019 01:37 PM

سامان گەرمیانی ڕاگەیەندراوێكی بڵاوكردەوە



سنور ميديا 

سامان گەرمیانی، ئەندامی سەركردایەتی یەكێتی نیشتیمانی كوردستان ڕاگەیەندراوێكی بڵاوكردەوە و ئاماژەی بەوەكردووە، كەسانێك تۆمەت بۆ خۆی و خێزانەكەی دروستدەكەن و داواشی لە جێگری سكرتێری گشتی و مەكتەبی سیاسی حزبەكەی كردووە، لێكۆڵینەوە بكەن بۆ دەرخستنی ڕاستییەكان"داواكارم لە بەڕێزتان بفەرموون بە دروستكردنی لیژنەیەك بۆ دەستكەوتنی ڕاستیەكان وبەسزاگەیاندنی تاوانبار و ڕوونكردنەوەی ڕاستیەكان بۆ ڕای گشتی و هەڤاڵان و ئەندامانی یەكێتی نیشتمانی كوردستان."

 

سامان گەرمیانی هەر لە ڕاگەیەندراوەكەدا باسی لەوەكردووە، ئەوە بۆ دووەمجارە پڕوپاگەندەی لەوشێوەیەی بۆ دروستدەكەن و پێشتریش جێگری سكرتێری گشتی بە دواداچوونی بۆ بابەتەكە كردووە و بێتاوان بووە.

 

‎دەقی ڕاگەیەندراوەكە:

دوێنی خەبات ،ئەمڕۆ خەبات ، سبەی خەبات ! نامەیەكی كراوە:

 

‎كاتێك شۆڕشی ئەیلول بڕیاری دا چیتر


‎مقاوەمەت نەكات و ئاشبەتاڵی ڕاگەیاند، لە ساڵی ۱۹۷٦ بەندە بەشانازیەوە یەكێك بووم لە مەفرەزە سەرەتاییەكانی شۆرشی نوێ و یەكێك لەو پێشمەرگانەی كە ژمارەمان لە پەنجەكانی دەست تێپەڕی نەدەكرد. بە ڕابەڕایەتی سەركردەو ڕابەر هەڤاڵ "مام جەلال" كە لە پێناو داكۆكی كردن لە مافەڕەواكانی میللەتەكەمان و پاراستنی هەیبەتی تاكی كورد بەگژ مەحاڵدا دەچووینەوە، ئەمە لە كاتێكدا كە مێژوو خۆی گەواهی دەرە كە لەو ڕۆژانەدا وەستانەوە لە بەرامبەر ڕژێمی فاشیستی بەعس چ جۆرە تەحەدایەك بوو!

 

‎هاوڕێكانم و خەڵكی ناوچە جیاوازەكانی مەیدانی خەبات و بە تایبەتی دەڤەری گەرمیان شاهیدو زیندوون كە بە هەموو تەمەنی پێشمەرگایەتیم یەكێك بووم لەو پێشمەرگانەی كە پرانسیپەكانی شۆڕش و كۆمەڵەم لە جێگەی هەموو ڕێساو یاساكانی باقی ژیان جێبەجێ كردووە. بە تاڵە مویەكیش لە پەیڕەوو پرۆگرامی یەكێتی و شۆڕش لامنەداوەو لە پێناو گەیشتن بە مافە ڕەواكانی گەلەكەمان سەرسەختانە دژی هەموو كەس و لایەن و گروپێك ڕاوەستاوم كە بە ووشەیەكیش خیانەتیان لەم خاك و نیشتمانە كردبێت. بەڵگەش بۆ ئەم قسانەم زۆرە بۆ نموونە لە دانووستاندنەكەی ساڵی ١٩٨٤ حكومەتی بەعس لە هەموو پێشمەرگەی كوردستان خۆش بوو تەنها لە (شەهید سەید كەریم،مامە ڕیشە ،ئازادی سەگرمەو بەندە) نەبێت، چونكە هەرشوێنێك بەعس و بەكرێگیراوانی بەعسی لێ بووبێت بەبێ سڵەمینەوە بەسزای گەل و شۆڕشمان گەیاندوون.

 

‎مامی گەورە وای فێركردین خۆمان پێشەكی بۆ سەگوەڕ بنووسین. بەهەموو تەمەنی پێشمەرگایەتی و سیاسیم بە یەك ووشەش نەك فایل
‎خیانەتم لە خاك و وڵات و یەكێتی نەكردووە! ڕووخانی ڕژێم زۆر شتی ڕوونكردەوە. ئێستاش لێرەوە تەحەدای هەرچی ڕاپۆرت نووس و جاسوس و مەوقیف فرۆش و هتد ، دەكەم بەهەموو تەمەنی پێشمەرگایەتی و سیاسیم و ئەمڕۆشی پێوەبێت ئەگەر شتێكیان لایە لەسەر ئەخلاقی سیاسی و كۆمەڵایەتی و تەهریب وتاڵانفرۆشی ونەوت فرۆشی و پەیوەندی ژێربەژێری ئەملا وئەولام بێ یەك ودوو بڵاوی بكەنەوەو ئامادەی دادگایی گەل دەبم لە پێش دادگایی پەروەردگار.

 

‎بەڕێزان جێگرانی سكرتێری گشتی، ئەندامانی
‎مەكتەبی سیاسی، ئەنجومەنی سەركردایەتی، ئەنجومەنی ناوەند،
‎هەڤاڵانی هێژاو ئازیز لە هەر ئۆرگانێك و شوێنێك بن:


‎ماوەیەكە ژان و بایی كۆنگرەوە و هەستانەوەی یەكێتی كاریگەری نەرێنی كردۆتە سەر چەندین نەیارو خۆ بەیارزانی نێو یەكێتی نیشتمانی كوردستان. ئەمەو بەبێ لە بەرچاوگرتنی مێژوو و خەباتی من هەستاون بە بڵاو كردنەوەی پڕوپاگەندەو درۆی بێبنەما لەسەر بەندەو خێزانەكەم. ئەمەش كاری یەكەمجاریان نییە بەڵكو ماوەیەك لەمەوبەرو كاتێك كاندید بووم بۆ پۆستێكی باڵا لە حوكمەتی نوێدا هەستان بە تۆمەتباركردنم بە تۆمەتی هەڕەشە و پەلاماردان كە خوودی جێگری سكرتێری گشتی بە سووپاسەوە بەدواداچوونی بۆ بابەتەكە كردوو بێتاوانیم پشتڕاست كرایەوە. ئێستاش كە بەرەو كۆنگرە دەڕۆین بۆ جاری دووەم دەستكراوە بە هێرشێكی تر بەرامبەرم وەكو بەشێك لە پیلانگێڕی بۆ تێپەڕاندنی دۆخی كۆنگرەو دروستكردنی دووبەرەكی لە نێوان دڵسۆزانی یەكێتیەكەمان كە ئەمەش شێوازێكی زۆر قێزەونە بۆ بەدەستهێنانی مەرامە گڵاوەكانیان كە یەكێتی وەك كۆمپانیایەك ئەبینن بۆ تێركردنی ئارەزووەكانیان یاخوود بۆ بەش بەش كردنی یەكێتییەكەمان و ڕێگریكردن لە پرۆسەی نوێبوونەوەو گەڕانەوە بۆ لووتكە.

 

‎بۆیە من لێرەوە داواكارم لە بەڕێزتان بفەرموون بە دروستكردنی لیژنەیەك بۆ دەستكەوتنی ڕاستیەكان وبەسزاگەیاندنی تاوانبار و ڕوونكردنەوەی ڕاستیەكان بۆ ڕای گشتی و هەڤاڵان و ئەندامانی یەكێتی نیشتمانی كوردستان.

 

پەیامیشم بۆ ئەو كەسانەی كە پێیانوایە بەم جۆرە هێرشانە دڵسۆزی و وەفای من بۆ گەلەكەم و یەكێتیەكەم كاڵ دەبێتەوە، پێیان دەڵێم خەیاڵتان خاوە، شۆڕشگێڕی، كوردپەروەری و یەكێتی بوونی من لە ساڵی ۱۹۷٦ وە ڕەگی داكوتاوە و تا ئەمڕۆ بە یەك ئاڕاستە خەباتم كردووە و بۆ تەنها ڕۆژێكیش ڕیزەكانی یەكێتی نیشتمانی كوردستانم جێنەهێشتووە. وە دڵنیاتان دەكەمەوە كە تادوا نەفەسیش ڕێبارزی مامی گەورەو یەكێتیەكەم بەرنادەم.

براتان سامان گەرمیانی
۲۹_۸_۲٠۱۹

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure