ئارێز عه‌بدوڵا
986 جار بینراوە 17/7/2019 12:51 PM

بۆيه‌كه‌مجار ئارێز عه‌بدوڵا له‌ چاوپێكه‌وتنێكا چه‌ندين زانيارى ئاشكرا ده‌كات



سنور ميديا 

ئارێز عه‌بدوڵڵا، ئه‌ندامی سه‌رکردایه‌تیی یه‌کێتیی نیشتیمانیی کوردستان ڕایده‌گه‌یه‌نێت، فشارێکی جددی جه‌ماوه‌ر هه‌یه‌ ئه‌مجاره‌ بۆ به‌ستنی کۆنگره‌ و ده‌شڵێت، ״له‌ کۆنگره‌ی داهاتوودا یه‌کێتیی ئه‌نجوومه‌نێکی ده‌بێت بۆ لێپرسینه‌وه‌ له‌ سه‌رکردایه‌تییه‌که‌ی.״

 

ئارێز عه‌بدوڵڵا، له‌ چاوپێکه‌وتنێکی هه‌فته‌نامه‌ى ״ئاژانس״دا پێی وایه‌ یه‌کێتیی و گۆڕان دره‌نگ بێت یان زوو ده‌بێت ڕێک بکه‌ون و یه‌ک بگرنه‌وه‌ و ڕاشیده‌گه‌یه‌نێت، ״یه‌کێتیی و گۆڕان پێویستیان به‌ یه‌که‌.״

ده‌قى چاوپيكه‌وتنه‌كه‌

 ئاژانس: با له‌و پرسیاره‌وه‌ ده‌ست پێ بکه‌ین، پرسی پێكهێنانی حكومەت و پارێزگاری كەركوكیش بەرەو كۆتایی دەچێت، ئێستا قسەتان سەبارەت بە كۆنگرە چییە؟

 

ئارێز عەبدوڵڵا: ئەمجارەیان فشارێكی زۆر گەورە و جددی لە لایەن ئەندامان و كادران و قاعیدەی یەكێـتیی هه‌یه‌ بۆ ئەوەی سەركردایەتیی حزب بە زووترین كات بڕیار بدات بە زووترین كات كۆنگرە ببەستێت.

 

ئاژانس: ئەم ماوەیە فشارێكی زۆری كادر و جەماوەری كرا بۆ بەستنی كۆنگرە، پێت وایە ئەم پرسە ئیتر پرسێكی جددی بێت لەناو سەركردایەتیی یەكێتیی؟

 

ئارێز عەبدوڵڵا: ئەگەر ئەمجارەیان یەكێـتیی كۆنگرە نەبەستێت ئەوە خودی یەكێتیی باجێكی گەورە دەدات.

 

ئاژانس: بە پێی ڕاپۆرتی لیژنەكان كە زۆر بەرپرسی یەكێتیی دەڵێن تەواو بوون، چ گۆڕانكارییەك لەناو یەكێتییدا دەكرێت، بە تایبەت لە ئاستی مەكتەبی سیاسی و سەركردایەتی و سكرتێری گشتیدا؟

ئارێز عەبدوڵڵا: بە پێی ئەو پڕۆژەیەی كە ئامادە كراوە، وا دەكرێت كە یەكێتیی بكرێـتە یەكێتییەكی دامەزراوەیی، دەسەڵاتەكانی وەكو جاران دەسەڵاتی شۆڕشگێڕی نەبن، دەسەڵاتەكان دەسەڵاتی یاسایی بن، دەسەڵاتی ئۆرگانەكان بن، هی كەسەكان نەبن، چاودێری ئۆرگانەكان بەسەر لایەنی جێبەجێكار یان سەركردایەتیی بەهێزتر دەبێت، واتە بە گشتی بیر لەوە كراوەتەوە یەكێـتیی ئەنجوومەنێكی گشتی یان ئەنجوومەنی ناوەندی هەبێت بۆ ئەوەی سەركردایەتی لەناو ئەو ئەنجوومەنە هەڵبژێردرێت، بۆ ئەوەی ئەم ئەنجوومەنە دواتر بتوانێت سەركردایەتییەكە بگۆڕێت و بتوانێت لێپێچینەوە لەگەڵ سەركردایەتی بكات، ئەمە یەكێكە لە گۆڕانكارییەكان، گۆڕانكارییەكی تر ئەوەیە كە دەسەڵاتەكانی یەكێـتیی تەنیا لە مەركەز نەمێنێتەوە، بەڵكوو بدرێت بە پارێزگاكان، پارێزگاكان سەركردایەتیی تایبەت بە خۆیان هەبێت، سەركردایەتیی سلێمانی، سەركردایەتیی هەولێر، سەركردایەتیی موسڵ، بەم شێوەیە.


ئاژانس: واتە هاوشێوەی ئەوەی كە پارتی بە ناوی ئەنجوومەنی سەركردایەتیی پارێزگاكان هەیەتی؟

ئارێز عەبدوڵڵا: نەخێر هاوشێوەی ئەوان نییە، چونكە ئەوان مەركەزییەتییەكەیان زۆر توندە، ڕەنگە شێواز و شكڵه‌كه‌ی وەك ئەوان بێت، بەڵام ئێمە دەمانەوێت دەسەڵاتەكان بدرێن بە پارێزگاکان.

 

ئاژانس: باس لەوە دەكرێت كە ئەمجارە پۆستی سكرتێر له‌ناو یەكێتیی نامێنێت ڕەنگە دەستەیەك یان هاوسەرۆك هەبێت ئەمە تا چەند ڕاستە؟

ئارێز عەبدوڵڵا: پێشووتر كە دەمانوت سكرتێر هەر بۆ مام جەلال بوو، بەڵام ئەمجارەیان ڕەنگە سەرۆك، ڕەنگە دەستەیەك بۆ بەڕێوەبردن هه‌بێت، پێشووتر مام جەلال بوو هەموو دەسەڵاتێكی هەبوو بۆیە ناوی سكرتێرمان دانابوو، بەڵام ڕەنگە ئەمجارە سەرۆك یان دەستە بێت، بەڵام دەبێت كەسی یەكەمی حزب هەر هەبێت.

 

ئاژانس: لاهور شێخ جەنگی دەڵێت تا شەش مانگی تر كۆنگرە دەبەستین، پێتان وایە ئیدی یەكێتیی دەبێت لە شەش مانگی داهاتوودا یەكێتیی كۆنگرە ببەستێت؟

 

ئارێز عەبدوڵڵا: ئەگەر ئیرادە هەبێت كەمتر لە شەش مانگ دەتوانرێت كۆنگرە ببەستین، لەبەر ئەوەی كۆنگرە بووه‌تە پێویستییەكی ژیان بۆ یەكێتیی، ئەگەر یەكێتیی كۆنگرە نەبەستێت و خۆی ڕێك نەخاتەوە و ئۆرگانەكانی ڕێك نەخاتەوە و سەركرایەتییەكی نوێ هەڵنەبژێرێت بەرنامە و دیدێكی نوێ‌ نەخاتە ڕوو ئێمە ڕۆژ بە ڕۆژ كێشەكانمان زۆرتر دەبن و بەرەو دواوە دەگەڕێینەوە، هەڵومەرجەكانی ژیان گۆڕاون، بۆیە پێویستە ئێمەش بگۆڕێین.

 

ئاژانس: پێتان وایە كۆنگرە مەترسیی بۆ یەكێتیی هه‌بێت، بە تایبەت باس لە ناكۆكییەكانی ناو یەكێتیی دەكرێت لە كۆنگرەدا بتەقنەوە؟

 

ئارێز عەبدوڵڵا: نەخێر بە هیچ شێوەیەك، چونكە زۆربەی زۆری ئەوانەی بەشداریی كۆنگرە دەكەن و دەیانەوێت كۆنگرە ببەسترێت، ئەوانەن هەموویان دەیانەوێت یەكێتیی بپارێزن، ئەگەر كەسانێكیش پێش كۆنگرە یان پاش كۆنگرە لە بەرژەوەندییەكانی خۆیان دەترسن و نایانەوێت كۆنگرە بكرێت، ئەوە ئەگەر كۆنگرەش نەكرێت ئەوانە هەر مەترسین.


ئاژانس: لە پرسی پێكهێنانی حكومەت و دانانی پارێزگاری كەركوك، وەك ئەوەی لەگەڵ پارتی ڕێك كەوتبوون هەنگاوەكان چوونەتە پێشەوە؟

 

ئارێز عەبدوڵڵا: ڕێككەوتنمان كردووە تازە حكومەتەكە پێك هاتووە، ئەو شاندەی چوونەتە بەغدا باسی پرسی كەركوكیش دەكەن، چونكە كەركوك هەر لە دەست پارتی و یەكێتیی نییە دەبێت ڕەزامەندیی عێراقیشی بۆ وەرگیرێت، ئەوەی گرنگە یەكێتیی و پارتی لەسەر دانانی پارێزگارێك ڕێك كەوتوون.


ئاژانس: كەی بە دیاریكراوی پارێزگاری كەركوك دادەندرێت؟

 

ئارێز عەبدوڵڵا: بە دەستی ئێمە نییە، دەبێت ئەنجوومەنی پارێزگا كۆ ببێتەوە و هەروەها حكومەتی عێراقیش ڕەزامەند بێت.

 

ئاژانس: ئایا وەك یەكێتیی چەند پۆستی ترتان لە حكومەتدا بەردەكەوێت؟

 

ئارێز عەبدوڵڵا: جگە لەوەی چەند وەزارەتێك و دەستەیەكمان وەرگرتووە، چەند وەكیل وەزیرێك و بەڕێوەبەرێكی گشتیش وەردەگرین.


ئاژانس: لەسەر پرسی یەكلاییكردنەوەی كاندیدی پۆستەكان بۆ حكومەت لەناو یەكێتیی هیچ ناڕەزایەتی و كێشەیەك درووست نەبووە؟

 

ئارێز عەبدوڵڵا: بەڵێ‌ كە بڕیارەكە لە سەركردایەتییەوە درا لە دەرەوەی سەركردایەتی ناڕەزایەتییەكی زۆر زۆر هەیە.

 

ئاژانس: ناڕه‌زایه‌تییه‌کان چی بوون؟

ئارێز عەبدوڵڵا: بۆ نموونە خەڵك داوای پێوەری تری دەكرد بۆ دانانی كاندیدەكان یان دەسەڵات بدرابایە پارێزگاكان بۆ دەستنیشانكردنی كاندیدەكان، دەبوایە پارێزگاكان پشكیان پێ بدرایە و خۆیان پشكەكانیان یەكلایی بكردایه‌ته‌وه‌. ناڕەزایەتییەكەش ئەوەیە كە كەسانێك پۆستیان پێ نەدراوە و پێیان وایە دەبوایە پۆستیان پێ بدرایە.


ئاژانس: دانیشتنی نهێنی هەیە بۆ ئەوەی ڕێككەوتنی نێوان یەكێـتیی و گۆڕان زیندوو بكرێتەوە؟

ئارێز عەبدولڵا: شتێكی وا نییە، بەڵام گۆڕان پێویستی بە ئێمەیە و ئێمەش پێویستمان بە گۆڕانە، خەڵكیش پێویستی بە هاوكاری و هەماهەنگیی هەردوولامان هەیە، ئەمڕۆ بێت یان سبەی هەر دەبێت لەگەڵ گۆڕان یەكگرتوو بین و یەك بگرینەوە، هەڵومەرجەكانی كوردستان وا دەخوازێت.


ئاژانس: یەكێتیی زۆر پێداگری لەسەر ئەوە كرد كە ئەمجارە حكومەتێكی شەراكەتی ڕاستەقینە بێتە ئاراوە، ئەگەر ئەمجارە ئەمە نه‌كرا هەڵوێستتان چی دەبێت؟

 

ئارێز عەبدولڵا: ئێمە ئەوەمان وتووە، بەڵام ئەوەی ئەم خواستەی یەكێتیی بێهێز كرد، ڕێككەوتنی زووی نێوان گۆڕان بوو لەگەڵ پارتی، بە هەر حاڵ ئێمە هیوامان وایە حكومەتێكی شەراكەتی ڕاستەقینە بێت، چونكە ئەگەر وا نەبێـت كێشەكان قووڵ ده‌بن، بۆ گۆڕانیش هەر كێشەیە، پێشم وایە سەرۆكی حكومەتیش دەیەوێت سەركەوتوو بێت.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure