عەبدوڵای مەلا نوری
111 جار بینراوە 10/7/2019 08:12 AM

عەبدوڵای مەلا نوری لەسەر هەمواركردنەوەی یاسای هەڵبژاردنی ئەنجومەنی پارێزگاكان هاتەدەنگ



سنور ميديا 

په‌رله‌مانتارێكى پێشووى په‌رله‌مانى كوردستان له‌ فراكسيۆنى گۆڕان رایگەیاند،گەیشتوین بە دۆخێک زۆرینەی هێزەکان لە یەک دەچن، دەشڵێت،"دەسەڵات لەوەدا سەرکەوت هێزەکانی تریش بکات بە خۆی".

 

عەبدوڵای مەلا نوری، لە پۆستێكدا بەناونیشانی"خەڵک مردن قبوڵ دەکات، نوسیویەتی،"بێ دەنگی لە ئاست درێژکردنەوەی ویلایەتی ئەنجومەنی پارێزگاکانی هەولێر، سلێمانی، دهۆک لە لایەن پەرلەمانەوە، ئاماژەن بۆ ئەوەی لە ناو خەڵکدا هیچ رەدفعلێکی کاریگەر نەماوە تا حیزبەکان و دەسەڵات سڵی لێ بکەنەوە، حیزبەکان وەک جەستەیەکی سڕو بێ گیان لە خەڵکی کوردستان دەڕوانن و بە ئارەزوی خۆیان بێ بەزەییانە چەقۆی دەسەڵاتخوازی و خۆسەپێنی لە وردە دەمارەکانی دیموکراسی و ئازادی و ئیرادەی ناو خەڵک دەدەن و نایانەوێت جارێکی تر ئەم جەستە شەکەتە ببزوێت و بکەوێتەوە سەر پێ".

 

ئه‌و په‌رله‌مانتاره‌،"سەرنج بدەن؛ گەیشتوین بە دۆخێک زۆرینەی هێزەکان لە یەک دەچن، هێندە فریودەرانەو بە خوێن ساردیەوە قسە لەسەر پرسەکان دەکەن هەست دەکەی یەکن. هەست دەکەی دەسەڵات زیاد لە دەمێکی بۆ درۆکردن و زیاد لە ناو و رەنگێکی بۆ چاوبەستکردنی خەڵک هەیە. هەست دەکەی ئێستا روە راستەقینەکەی دەسەڵات لە پشودایەوە روە ساختەو بەردەستەکانی کارەکانی ئەو هەڵدەسوڕێنن.

 

عەبدوڵای مەلا نوری رایوایە دەسەڵات لەوەدا سەرکەوت هێزەکانی تریش بکات بە خۆی، خەڵکیش بکات بە بارمتەی نانی رۆژ، ئێستا خەمی سەرەکی زۆرینەی خەڵک پەیداکردنی نانە.خەمی قوت و بێ کاری وای لە خەڵک کردوە لە خەمی دیموکراسی و ئازادیدا نەبێ، لە خەمی داگیرکاری و شکاندنی کەرامەتدا نەبێ، چیتر سیستمێکی حکومڕانی دادپەروەر لە ئەولەوێتی ئەودا نەبێ.

 

ئەو پەرلەمانتارەی پێشوتری گۆڕان دەشڵێت،"ئێستا دەسەڵات بە چاوی منداڵێکی برسی و لاوازەوە لە خەڵک دەڕوانێ، کە چاوەڕێی تیکەیەک نانە.دەیەوێت ئەم منداڵە برسیە بە جۆرێک پەروەردە بکاتەوە جارێکی تر بیر لە سەرکێشی نەکاتەوە. دەیەوێت ئەو قەناعەتە لە ناخی خەڵکدا بچەسپێت یان دەبێ قبوڵی ئەم دەسەڵاتە بکەن یان برسێتی و مردنێک کە لە سێ ساڵی رابردودا پیشانمان دراو هێشتا لە بەرچاومانە".

 

لە كۆتایی نوسینەكەیدا، عەبدوڵای مەلا نوری دەڵێت،"ئەوەی ئێستا رودەدات ویستی گروپێکی سەردەستە، دۆخێکی دروستکراوی بە زۆر سەپێنراوە".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure