قه‌ريلان
583 جار بینراوە 4/7/2019 08:54 AM

قەرەیلان: ناهێڵین دەوڵەتی تورك باشوری كوردستان داگیربكات



سنور ميديا

قەرەیلان ڕایگەیاند، هەتا بەرخۆدانی گەریلا هەبێت دەوڵەتی تورك ناتوانێت بەگوێرەی ویستی خۆی پێشڕەوی بكات وتیشی، ئێمە ناهێڵین باشوری كوردستان داگیربكرێت.

 

فەرماندەی بڕیارگەی ناوەندی پاراستنی گەل(نەپەگە)موراد قەرەیلان لە میانەی بەشداریكردن لە بەرنامەیەكی تایبەتی ڕادیۆی دەنگی وڵات سەرنجی خستە سەر داگیركاریی دەوڵەتی تورك لە باشوری كوردستان، سیاسەتی شەڕی تایبەت لە دێرسم و پڕۆژەی سەرلەنوێ بونیادنانەوەی گەریلا.

 

قەرەیلان ڕایگەیاند، دوژمن بە كۆنسێپتی خۆی دەیەوێت گردە ستراتیژییەكان بەدەست بێنێت و باشوری كوردستان بخاتە ژێر ڕكێفی خۆیەوە، بەڵام ئەمە بەو مانایە نییە كە ئەو شتە‌ سەردەگرێت چونكە بەشی ئەوە هێزیان نییە.

 

دەیانەوێت كۆنسێپتەكەیان هەنگاو بە هەنگاو جێبەجێ بكەن، چونكە لە بەرانبەریان بەرخۆدانێكی بەهێزی گەریلا هەیە بۆ نمونە ئێستا هاتوون گردی شەكیف-یان گرتووە، بەڵام لە ناوچەكانی گەلیشیم، قەبری زاهیر، شەهید ئەحمەد، شەهید بێریتان و خنێرە گەریلای لێیە، واتە دوژمن هەموو شوێنێكی خواكوركی پێ داگیر نەكراوە، لە گردە چۆڵەكان دوژمن دەچێت خۆی جێگیر دەكات، تا ئێستا دۆڵی ئارێ و پشتەوەی ئەرمووشێ و گردەكانی دەوروبەری شەكیف-یان گرتووە، هەوڵ دەدەن لەو شوێنانە جێگیر بن، بەر لە چەند ڕۆژێك لە گردی شەهید ساریا لە پشتەوەی ئەرمووش گەریلاكان چالاكییان كرد، ئەم شوێنانە لە پشتەوەی شەكیف-ن، بەڵام چالاكییەكانی گەریلا تیایاندا بەردەوامن لەبەرئەوە دوژمن ناتوانێت بەئاسانی جموجۆڵ بكات، لەو شوێنانەی كە داگیری كردوون، دەیانەوێت خۆیان جێگیر بكەن، كاتێك لە شوێنێك دەبینن گەریلا لێیان نزیك دەبێتەوە، بە فڕۆكەی سیخوڕی و كۆپتەر خۆیان دەپارێزن، ئەگەر ئاوا نەبوایە، ئەو سەربازانە نەیاندەتوانی لەوێ بمێننەوە، گەریلا هەمووی لەناو دەبردن.

 

 

موراد قەرەیلان وتی:"ئامانجی دەوڵەتی تورك ئەوەیە باشوری كوردستان داگیر بكات، بەڵام لە بەرانبەریان بەرخۆدانێكی بەهێز هەیە، ناتوانن بچنە هەموو شوێنێك، من بۆچی ئەمە دەڵێم؟ هەندێك كەس وەها شرۆڤەی دەكەن وەك ئەوەی دوژمن چووەتە شوێنێك و لە شوێنێكی دیكە دەردەكەوێت، بەڵام دەوڵەتی تورك ئەو هێزەی نییە، حیسابی ئەوان ئەوەیە لە باشوری كوردستان ڕێكخستنەكانی كورد بەگژ یەكدا بكەن و لاوازیان بكەن".

 

قەرەیلان ئاماژەی بۆ ئەوە كرد، هەتا بەرخۆدانی گەریلا هەبێت دەوڵەتی تورك ناتوانێت ئەوەندەی دەیەوێت پێشڕەوی بكات، وتیشی، هەتا ئێستا گەریلا كیلۆمەترێكیش لێیان دوور نەكەوتووەتەوە و هەمیشە لە دەور و پشتیانە، گەریلا لەنێو سنووری دوژمندایە، دوژمن شوێنێكیشی گرتبێت، گەریلا لەوێ هەر هەیە، داگیركردنی باشوری كوردستان ئاسان نییە، دەوڵەتی تورك دەزانێت ئەگەر لە ماوەیەكی كورتدا هەموو باشور داگیر بكات، شكست دێنێت، جەنەڕاڵەكانیان بەباشی ئەم شتە دەزانن، لەبەرئەوە هەر جارێك شوێنێك داگیر دەكەن و دەیانەوێت پارچە بە پارچە پێشڕەوی بكەن، بەم شێوەیە شەكیف و دۆڵی ئارێ-یان داگیر كرد، من دەمەوێت بڵێم، دوژمن بەئەنقەست ئەو شوێنەی كردە ئامانج. لەبەرئەوەی دەیزانی گەریلا لەم شوێنە ئامادەكاری باشی نەكردووە، هێرشی كردە سەر ئەو شوێنانە ئەگەر هەڤاڵان پێشتر ئامادەكارییان كردبوایە، دوژمن بەئاسانی نەیدەتوانی لەوێ جێگیر بێت دوژمن دەتوانێت لە چەند شوێنێك جێگیر بێت، بەڵام ئێمە گەریلاین، بۆ ئێمە ئەوە‌ گرنگ نییە، ئێمە بە تەرزی شەڕی نوێی گەریلایی، بە شەڕی تیمە پڕۆفیشناڵەكان، بە تەرز و تاكتیكی جیاواز دوژمن پێكدا دەدەین، ئێمە دەتوانین هەر هەنگاوێكی دوژمن بوەستێنین و ڕێگری لێ بكەین، لە خواكورك هەوڵی گەریلا لە ئارادایە من ناتوانم بڵێم ئەو هەوڵانە زۆر باشن یان خراپ. هەڤاڵان هەوڵ دەدەن و لە ئاستێكی بەرچاودا بەرخۆدانێكی واتادار هەیە، گرنگترین شتیش ئامادەكاریی ماوە درێژی هەڤاڵانە. ئەمە زۆر واتادار و گرنگە.

 

موراد قەرەیلان وتیشی، جارێكی دیكە ڕایدەگەیەنم، دوژمن تەنیا بەشێكی خواكوركی داگیر كردووە و لێی جێگیر بووە، دوژمن دوای ئەوەش لەوانەیە پێشڕەوی بكات، لەوانەیە بیەوێت بەشەكانی دیكەی خواكورك داگیر بكات و ڕوو لە خنێرە بكات، لەوانەیە ڕوو لە هێڵەكانی دیكەش بكات، ئەگەری لەو جۆرە هەن، بەڵام ئێمە هەتا كۆتایی لە بەرانبەر دەوڵەتی تورك بەرخۆدان دەكەین.

 

بەتایبەتی پێویستە گەلەكەمان لە باشوری كوردستان و هەموو گەلەكەمان بزانێت كە ئێمە وەك پەكەكە و هەپەگەی هێزی فیدایی پەكەكە، ڕێگە بە دەوڵەتی تورك نادەین باشووری كوردستان داگیر بكات ئێمە لێرە شەڕێكی ستراتیژی دەكەین ئەمە شەڕێكی ئاسایی نابێت، بەڵكو زۆر سەخت دەبێت، هێشتا دوژمن نەهاتووەتە ئەو شوێنە ستراتیژییانەی كە بۆ ئێمە گرنگە، ئەگەر نزیك ببنەوە لەو شوێنانە شەڕ گەورە دەبێت، لەو چێوەیەدا هەڤاڵانی ئێمە ئامادەكارییان كردووە، ئێستا نامەوێت شتە گەورەكان بڵێم بەڵام بەرخۆدانەكەمان دەكەینە بەرخۆدانێكی مێژوویی، بەم بەرخۆدانە دەمانەوێت لە بەرانبەر دەوڵەتی تورك سەركەوتنێكی گەورە بەدەست بێنین پلانسازی ئێمە لەسەر ئەوەیە.

 

 

لە درێژەی لێدوانەكەیدا قەرەیلان گوتی، دوژمن لە ئۆتۆمبێلی هاوڵاتییانی سیڤیل دەدات، بە ئاڵۆزی و ناكۆكی هەوڵ دەدات گێرە شێوێنی بكات پێویستە هەموو سیاسەتمەدارانی باشوری كوردستان، گەلی وڵاتپارێز و هەموو گەنجانی كوردستان بزانن كە ئێمە لە بەرانبەر داگیركاری بەرخۆدانێكی مێژوویی و مۆدێرن دەكەین با هیچ كەس نەبێتە بەربەست ئەوانەی دەتوانن با پشتگیریمان بكەن ئەوانەشی پشتگیریمان ناكەن، با بەربەستمان بۆ دروست نەكەن.

 

ئێستا میتی تورك دەیەوێت لە هەموو لایەكەوە زانیاریی هەواڵگری لەسەر ئێمە كۆبكاتەوە، بەگوێرەی ئەو زانیارییانە هێرشی ئاسمانی دەكەن، بۆیە نابێ هیچ كەس زانیاری بە دوژمن بدات ئەوانەشی زانیاری دەدەن نابێ ڕێیان پێ بدرێت. لە بەرانبەر ئەو كەسانەی سیخوڕی بۆ دەوڵەتی تورك دەكەن، پێویستە خاوەن هەڵوێست بن لەو لایەنەوە ئەگەر گەلەكەمان لە پشتی ئێمەوە بێت، ئێمە لە زاپ و خواكورك دەوڵەتی فاشیست تێكدەشكێنین تۆڵەیەكی مێژووییان لێ دەكەینەوە، بۆ ئەو مەبەستەش ئامادەكاریمان كردووە ئێمە لە هەڕەشە و فڕۆكەكانی دوژمن ناترسین، دەوڵەتی تورك تەنیا بە فڕۆكە دژی ئێمە شەڕ دەكات، ئێمەش لەسەر ئەمە دەوەستین كە چۆن بتوانین ئەو هێرشە ئاسمانییانە پووچەڵ بكەینەوە و شكستیان پێ بهێنین ئێمە لەسەر ئەم تەرزە دەوەستین لەسەر ئەم بنەمایە هەتا كۆتایی بەرخۆدان دەكەین و بەرخۆدانەكەشمان گەشتر دەبێت.

 

موراد قەرەیلان باسی لە سەرلەنوێ ڕێكخستنەوە و بونیادنانەوەی گەریلا كرد و گوتی: لەم سەردەمەدا بەهایەكی زۆر بۆ پڕۆژەی سەرلەنوێ بونیادنانەوە دادەنێین قۆناغی پێشوو دەریخست كە ئەگەر لەنێو گەریلادا گۆڕانكارییەكی گەورە بكەین، ڕێ و ڕێبازی كلاسیك تێپەڕێنین و هێڵی گەریلایەتیی نوێ بخەینە بواری كردارییەوە، دەتوانین سەركەوین لەبەرئەوەش گرنگییەكی گەورە بەم پڕۆژەیە دەدەین ماوەی ساڵێكە كار لەسەر ئەمە دەكەین ئێمە دەزانین كە زۆر هاوڕێی هێژامان ئاگایان لەم شتە هەیە نوێبوونەوە لەنێو گەریلاكان لە ڕۆژەڤی ئێمەدایە، ئەم تەرزە نوێیەی گەریلاكان كە نیمچە ئۆتۆنۆم هەڵسوكەوت بكات، لە شەڕدا گەورەتر دەبێت نمونەی زیندووی ئەمە لە كرداردا دەركەوتوون. چالاكییەكەی بێزۆكێ لە ئاڤاشین نموونەیەكی باشە لە شوێنێك كە دوژمنی زۆری لێیە، بە تەرزی تیمی ڕێكخراو، گەریلا لە ڕۆژدا گورزێكی گەورەیان لە دوژمن دا و شەش چەكیان لەسەر دوژمنان هەڵگرتە‌وە لە شوێنی دیكەش نمونەی ئەم شتە هەن، بە قوڵبوونەوە و بەهێزبوون لە تەرزی تازەدا، ئەنجامی زیاتر بەدەست دەهێنرێن، لەسەر ئەم بنەمایە كاریگەرترین بەرگری، بەرگریی چالاكە، هێزێك كە هەمیشە لەنێو چالاكیدا بێت، هەم دوژمن سەرقاڵ دەكات و هەم هێزی خۆی مسۆگەر دەكات.

(دوژمن دەیەوێت دێرسم لە كوردستان داببڕێت)

قەرەیلان ڕایگەیاند، دەوڵەتی تورك بە بانگەوازێك ڕایگەیاندووە كە لە ناوچەی دێرسم لەنێوان ١ی تەمووز و ١٥ی تەمووز هاتوچۆ قەدەغەیە، وتیشی: دوژمن بە پیلانێكی تایبەت دەیەوێت دێرسم لە كوردستان داببرێت دەیەوێت گەریلاكان لە دێرسم دوورخاتەوە، ئاسیمیلاسیۆن قووڵتر بكاتەوە و دێرسم لە كوردستان جیابكاتەوە بەتایبەتی ئەرگەنەكۆن لەسەر ئەم كۆنسێپتە دەوەستێت.

هەندێك خەباتكاری ئەرگەنەكۆن لە دێرسم و دەوروبەری هەن هەندێك پاشماوەی شۆڤێنیستەكانی(كزل ئەلماجی)هەن، دەیانەوێت تۆڕێكی سیخوڕی لەو كەسانە دروست بكەن دەزانرێت كە ئەم كەسانە هەندێك جار بە ماسكی چەپڕەوی ڕەفتار دەكەن، ڕۆڵێكی مەترسیداریان وەرگرتووە هەم بۆ بزووتنەوە چەپڕەوەكانی توركیا و هەمیش بۆ بزوتنەوەی ئازادیی كوردستان، بە هەواڵگری هەوڵ دەدەن گورز لە هاوڕێیانی بزووتنەوەی شۆڕشگێڕیی یەكگرتووی گەلان (HBDH) بدەن، لە شۆڕشگێڕانی چەپڕەو و هەپەگە بدەن پێویستە دۆستە شۆڕشگێڕەكانمان و گەلەكەمان لە دێرسم ئاگاداری ئەمە بن دەوڵەتی توركی داگیركەر پیلانێكی تایبەتی لەسەر دێرسم هەیە وەك ئەوەی فەرماندەی هێژای دێرسم ئاتاكان ماهیر-یش دەیگوت، ئێمە لە سەردەمی فەزادا دەژین دەبێ ببینە گەریلای مۆدێرنی ئەم سەردەمە دەبێ هەڤاڵانمان لە دێرسم لەم سیاسەتە تایبەتەی دوژمن تێبگەن و لە بەرانبەر ئەو سیاسەتانە، تەرزی نوێ پێشخەن.

 

 

لە درێژەی چاوپێكەوتنەكەدا موراد قەرەیلان وتی، دوژمن دەڵێت، ئەگەر گورز لە گەریلاكانی دێرسم بدەم شكست بە گەریلاكانی دەریای ڕەش-یش دێنم گوایە گەریلایان لە دەریای ڕەش نەهێشتووە بەڵام ئەگەر گەریلا لەو شوێنانە نەبوایە، لە سەرانسەری دەریای ڕەش چەندین مانگ ئۆپەراسیۆنیان دەكرد؟ بەم بۆنەیەوە سڵاو ئاراستەی هاوڕێیانی دەریای ڕەش دەكەم ئەم هەڤاڵانە بە فیداكاری و تێكۆشانی خۆیان بوونەتە كابووسی دەوڵەتی تورك. ئەم هاوڕێیانەمان ڕۆڵێكی گرنگ دەگێڕن هێزەكانی شەڕی تایبەتی توركی فاشیست بە هەموو دەرفەتەكانی خۆیان بەدوایان كەوتوون، بەڵام هیچ ئەنجامێكیان بەدەست نەهێناوە.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure