پڕۆژەی ڕیسایکلینی سلێمانی
404 جار بینراوە 1/6/2019 10:15 PM

کۆمەڵێک گەنج پڕۆژەیەک بۆپاراستنی ژینگە ئەنجام دەدەن



سنورمیدیا- زانیار محەمەد

گروپی ڕەنگ کە لە کۆمەڵێک خوێندکار و گەنجی شاری سلێمانی پێکدێت،پڕۆژەی ڕیسایکلینی سلێمانیان ڕاگەیاندووە و وەک خۆیان ئاماژەی بۆ دەکەن،ئامانجیان لە ئەنجامدانی ئەم پڕۆژەیە بە کلتورکردنی ریسایکلینە لەناو کۆمەڵگەی کوردیدا.

 

 

"دەرهێنانی خەڵکە لەو ژیانە بێ هەستە بەرامبەر بە کێشەکانی کۆمەڵگا"

 

سەبارەت بە ئامانجی سەرەکی دامەزراندنی گروپەکە،ڕەوا قوربانی سەرپەرشتیاری گروپی ڕەنگ بۆ سنورمیدیا وتی:"ئامانجی ئێمە وەک گروپی (ڕەنگ) پەروەدەکردنی تاکی کۆمەڵگەیە لە پێناو ئاوڕدانەوە بۆ ئەو کێشانەی کە زۆرێک لە خەڵکی ئێمە بە کێشەی خۆیانی نازانن و بەڵام یەکێکە لە گەورەترین کێشەکانیان, وە دەرهێنانی خەڵکە لەو ژیانە تاکڕەو و بێ هەستە بەرامبەر بە کێشەکانی گۆمەڵگە بۆناو واقیعی کۆمەڵگای کوردی".

 

 

یەکەم هەنگاویی پڕۆژەکە

 

یەکەم هەنگاویی گروپەکە بۆ بەجێگەیاندنی پرۆژەکەیان بریتی بووە لە دانانی نزیک لە 40 سەلەی خۆڵ لە ناو زانکۆی سلێمانیدا کە تەنها تایبەت بوون بە دەبە و جامی ئاو کە سپۆنسەری ئەم کارەش لەلایەن پڕۆگرامی IYLEPوە بووە،وە بڕیارە دوای هەر جارێک لە پڕبوونیان بنێردرێت بۆ شوێنی پەیوەست بە ڕیسایکلین و هەرچی سەبارەت بەو داهاتە کەمەشی کە هەیەتی بەکاردەهێنرێتەوە بۆ فراوانکردنی پڕۆژەکە.


سەرپەرشتیاری گروپەکە لەبارەی یەکەمین پڕۆژەی گروپەکەیانەوە زیاتر ڕونیکردەوە:"ڕیسایکلینی سلێمانی،(Sulaymaniyah Recylcing Project) یەکەم پڕۆژەمانە و ئامانجی ئێمە لە ئێستادا بە کلتورکردنی ریسایکلینگە لەناو کۆمەڵگەی کوردیدا تاوەکو ئێمەش وەکو زۆرێک لە کۆمەڵگە پێشکەوتووەکان گرنگی بدەین بە کێشە جیهانییەکان کە کاریگەریان لەسەر ئێمە هەیە و ئێمە بە کێشەیان نازانین بەڵام کێشەن و هەن".

 

 

"دانانی نزیکەی 40 تەنەکەی زبڵ تایبەت بە دەبەی ئاو"

 

زۆزک ڕۆبیتەن،ئەندامی گروپی ڕەنگ و یەکێک لەڕێکخەرانی پڕۆژەکە سەبارەت بە شێوازی دەستپێکردنیان بۆ سنورمیدیا وتی:"یەکەم هەنگاومان بریتی بووە لە دانانی نزیکەی 40 تەنەکەی زبڵ لە ناو زانکۆی سلێمانی-کەمپە کۆنەکەو هەندێک لە بەشە ناوخۆییەکانی نزیک زانکۆی سلێمانی کە ئەم تەنەکانە تەنها تایبەت بوون بە دەبەی ئاو و جامی ئاو، کە دواتر ئەم مادانە نێردراون بۆ کارگەی ورد کردن لە سلێمانی و لێوێوە بۆ کارگەی ریسایکلینگ کە بەرامبەر بەم پلاستیکە بڕێک پارە وەردەگرین کە دواتر بۆ مەبەستی گەورەکردنی پڕۆژەکە و کاری خێرخوازی بەکاردەهێنرێت".

 


" لە یەک مانگدا توانیومانە نزیکەی 100 کگم پلاستیک ریسایکلینگ بکەین"

 

سەبارەت بە بەدەمەوەهاتن و بەشداریکردنی خوێندکاران لە یەکەمین هەنگاوی پڕۆژەکەدا زۆزک ڕۆبیتەن ئاشکرای کرد:":پڕۆژەکەمان کە تەمەنی 1 مانگ و 10 ڕۆژە و سپاس بۆخوا لەم دەست پێکەدا توانیومانە نزیکەی 100 کگم پلاستیک ریسایکلینگ بکەین کە دەکاتە نزیکەی 8330 دەبەی پلاستیک، وە ئامانجمان گەورەکردنی پڕۆژەکەمانە و گەیاندنی پڕۆژەکەمانە بۆ چەندین زانکۆ و شوێنی دیکە لە شارەکەماندا بەڵام بۆ ئەوە پێویستمان بە هاوکاری مادی و مرۆیی زیاتر هەیە".

 

 

شوێنەکانی دەرەوەی زانکۆش

 

وابڕیارە هەنگاوی دواتری پرۆژەی ڕیسایکلینی سلێمانی شوێنەکانی دەرەوەی زانکۆش بگرێتەوە لەوانە، هۆڵەکانی لەش جوانی و هۆڵی ئاهەنگ و قوتابخانەکان،بەڵام ئەندامانی گروپەکە ئەوە ڕووندەکەنەوە بەجێگەیاندن و بە کردەییکردنی کارەکانی ئەم گروپە بێ بەربەست و ڕێگر نییە و لەوبارەیەوە زۆزک ڕۆبیتەن بۆ سنورمیدیا ئاماژەی بەوەکرد:"گەورەترین ڕێگرمان لە ئێستادا نەبوونی پارەیە چونکە پارەکەی پێمان درابوو لەلایان پڕۆگرامی IYLEPوە تەنها بەشی کڕینی ئەو کۆمەڵە تەنەکەی خۆڵە بوو و بۆیە ئەمەش وای کردووە زۆرێک لە کارەکان وەک گواستنەوەی تەنەکەکان و پلاستیکەکە بکەوێتە ئەستۆی خۆمان و داواکارین لەو کەسانەی توانایان هەیە هاوکارمان بن".

 

ریسایکلین پڕۆسەیەکە لە گۆڕینی پاشماوەی بەفیڕۆدراو بۆ مادە و بەرهەمی نوێ، کە ئەمەش ئەلتەرناتیڤێکە بۆ پرۆسەی فڕێدانی "تەقلیدی" و دەتوانێت مادە بپارێزێت، ریسایکلین دەتوانێت رێگریی بکات لە بەفیڕۆدانی مادە و کەرەستەی بەسود و کەمکردنەوەی بەکارهێنانی کەرەستەی خاو و تازە، کە ئەمەش دەبێتە هۆی کەمکردنەوەی بەکارهێنانی وزە و کەبونەوەی پیسبونی هەوا و ئاو.

 

سەرباریی زۆربوون و کەڵەکەبوونی زیاتری رۆژانەیی خۆڵ و خاشاک لە هەرێمی کوردستان،بەڵام تاکوو ئێستا هیچ هەوڵێکی حکومی و ئەهلی لەو بوارەدا سەرکەوتوو نەبووە بە مەبەستی پاراستنی ژینگە و کەمکردنەوەی خاشاکی کۆکراوە و دەستکەوتنی بڕێک لە داهات لە دووبارە بەکارهێنانەوەوە.

 

145017162019_hi.jpg

 

 

295017162019_noopip.jpg

 

 

395017162019_nweya.jpg

 

 

565017162019_cx.jpg

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure