باهۆز ئەرداڵ
182 جار بینراوە 9/5/2019 08:12 PM

باهۆز ئه‌رداڵ: سوپای توركیا به‌هاوكاری ده‌زگای پاراستنی پارتی هێرشده‌كه‌نه‌ سه‌ر گه‌ریلا



سنور ميديا 

باهۆز ئه‌رداڵ، ئه‌ندامی فه‌رمانده‌یی ناوه‌ندی بڕیارگه‌ی پاراستنی گه‌ل(نه‌په‌گه‌) رایگه‌یاند"بارەگا سەربازییەکانی تورکیا بە هاوکاری دەزگای پاراستنی پارتی هێرش دەکەنە سەر گەریلا"و داوا لە مەسعود بارزانی دەکات، کە بەر بەو هه‌نگاوانه‌ بگرێت، هۆشدارییش دەدات، "ئەوەی دەستی لە خوێنی گەریلادا هەبێت، بێ وەڵام نامێنێتەوە."

 

باهۆز ئەرداڵ، لە چاوپێكه‌وتنێكدا له‌گه‌ڵ ستێرک تی ڤی، سه‌باره‌ت به‌ سه‌ردانه‌كه‌ی ئه‌م دواییه‌ی وه‌زیری ده‌ره‌وه‌ی توركیا بۆ هه‌رێمی كوردستان رایگه‌یاند كه‌ چاوشئۆغلۆو حكومه‌ته‌كه‌ی له‌باكوری كوردستان خه‌ڵك ده‌ستگیردەکەن، زیندانیی دەکەن، دایکانی ٧٠ ساڵە ئەشکەنجە دەدەن، ڕۆژانە مرۆڤ دەکوژن، بەڵام کاتێک دێنە باشوری کوردستان وەک پادشا پێشوازیان لێدەکرێت.

 

وتوشیه‌تی"خەڵکی ئێمە لە باشوری کوردستان بەوە ئازاریان پێدەگات، دەشکێن و لەمە توڕەیە، باوەڕیش ناکەم پێی دڵخۆش بن."

 

ئاماژه‌ی به‌وه‌شداوه‌ كه‌ مه‌حاڵه‌ حكومه‌تی توركیا وه‌ك ئه‌وه‌ی هه‌ندێك بانگه‌شه‌ی بۆ ده‌كه‌ن ببێته‌ دۆستی كوردو له‌ئێستاشدا ئه‌مه‌ به‌ته‌واوه‌تی رونبۆته‌وه‌.

 

باهۆز ئەرداڵ، هەڵوێست و سیاسەتی دەسەڵاتدارانی باشوری کوردستانی لەسەر پارچەکانی دیکەی کوردستان به‌ سیاسەتێکی "تەسک و ناکوردستانی" له‌قه‌ڵه‌م داوه‌و وتویه‌تی"ئەو لایەنانەی سەرکردایەتی باشوری کوردستان دەکەن لە سیاسەتدا تێڕوانینێکی تەسکیان لەسەر کورد و کوردستان هەیە، سیاسەتێک کە خۆی لە قاڵبێکدا قەتیس کردوە، بەو سیاسەتە دەڵێت: من کارم بەسەر پارچەکانی دیکەوە نییە."

 

باهۆز ئەرداڵ، باسی لەوە کردوه‌، کە ئەوان بە لەبەرچاوگرتنی بەرژەوەندیی گشتیی و نەتەوەیی و بۆئەوەی هێزە کوردییەکان لەبەرامبەریەک ڕانەوەستن، بەدەنگی بەرز ڕەخنە لە هەندێک حزب ناگرن، کە هاوکاریی دەوڵەتی تورکیا دەکەن و وتویه‌تی"ئێستا بۆ شۆڕشی کوردستان زۆر گونجاوە، کاتی ئەوە نییە دژایەتیی یەکتر بکەین، پێویستە لەیەکتر نزیکببینەوە، ئێمە هەتا ئێستاش هەوڵ بۆ ئەمە دەدەین."

 

هەر لە بەردەوامیی قسەکانیدا باهۆز ئەرداڵ وتویه‌تی"بارەگاکانی دەوڵەتی تورکیا لەسەر خاکی باشور هێرش دەکەنە سەر گەریلا، پێشتر لەنێوان ئێمە و پارتی دیموکراتی کوردستاندا لێکتێگەشتن هەبو، بۆیە نەماندەکردنە ئامانج، بەڵام دەبێت (پ.د.ک)ش ڕێگا نەدا کە ببنە هێرش لەسەر ئێمە، خەمی ئێمە ئەوە بو، کە ئاسایشی کوردستان تێکنەچێت، ئەگەر ئێوە هاوکاریی ئێمەش ناکەن، با دوژمن نەکەوێتە نێوانمانەوە."

 

ئەرداڵ، له‌وباره‌یه‌وه‌ زیاتر دواوه‌و وتویه‌تی"ئێمە دەزانین، کە لەو بارەگایانەدا چەند سەرباز، چەند تانک و چەند فەرماندەی ئەوان هەیە، کە دەستیان لە خوێنی هەڤاڵانماندایە، بۆ پاراستنی ئارامیی هەرێمی کوردستان چەند ساڵە بێدەنگ بوین، ئێستاش بەڕێکخستنی ئەوان هێرش دەکرێتە سەر هەڤاڵانمان، زۆر ئامێری نوێیان بردوتە بارەگاکان، سیخوڕ کۆدەکەنەوە، لەبەرامبەر ئێمەدا بونەتە بڕیارگەکانی شەڕ لە باشوری کوردستان، ئەوەی ئارامیی باشوری کوردستان تێکدەدات، بارەگاکانی دەوڵەتی تورکن."

 

ئەرداڵ، باسی لەوەشکردوه"پارتی و پاراستن شەڕێکی هەواڵگرییان دژ بە گەریلا دەستپێکردوە و چەندین کەسیان بۆ ئەو مەبەستە ئەرکدار کردوە، بە نمونە لێیان دەپرسن، جەمیل بایک لە کوردستان دەمێنێتەوە؟ ئەو شوێنەی ئەوی تیایە ئەشکەوتە؟، شوێنێکی چۆنە؟، موراد قەرەیلان لەکوێیە؟ چەند کەس دەیپارێزن؟ چۆنیەکتر دەبینن؟، بە هەمان شێواز دەیانەوێت سیخوڕیی بکەن بەسەر هەڤاڵانی ترمانەوە، پاشان زانیارییەکان دەدەنە میتی تورک و ئەو سەرباگانەی دەوڵەتی تورک، کە لەسەر خاکی باشورن، بەوهۆیەشەوە فڕۆکە جەنگییەکان دەست بە بۆردومان دەکەن، بە گوندنشینانی بادینانیان وتوە، کە ئەگەر لەسەر پەکەکە زانیارییمان نەدەنێ، لە گوند دەرتان دەکەین، ئێمە باش دەزانین کێن ئەو کەسانەی ئەوکارانە دەکەن و سەرپەرشتیی دەکەن، لەکوێ دەمێننەوە و چی دەکەن، ئەمە راستییە."

 

لە بەردوامیی قسەکانیدا، باهۆز ئەرداڵ، ۆایگەیاندوه‌"ئێمە ویستمان لە دۆخەکە تێبگەین، بۆیە زانیارییمان بۆ مەسعود بارزانی نارد و پێمانوت 'دۆخێکی بەجۆرە هەیە، ئێوە ئاگادارن؟، ئەگەر ئاگادار نین، دەبێت بەری پێبگرن'، هەرکەس دەربارەی هەڤاڵەکانمان سیخوڕیی بکات و زانیاریی بداتە دەزگا سیخوڕییەکان و فڕۆکەی جەنگیی بێنێت هەڤاڵەکانمان شەهید بکات، کاری دوژمنایەتیی دەکات، هیچ پەیوەندییەکیان بە کورد و کوردستان و وڵاتپارێزییەوە نییە، ئەوە دوژمنایەتییە، ئێستاش بانگەوازیی لە بارزانیی دەکەین، بەر بەو کارە خراپانە بگرێت، ئەمە پەیوەندیی نێوان هێزە کوردستانییەکان دەتەقێنێتەوە، ئەوەی دوژمنایەتیی دەکات، با ئاشکرا بە گەل بڵێت، ئێوە بۆچی جاسوسیی بۆ دەوڵەتی تورک دەکەن؟ چ بەرژەوەندییەکی کوردستانی تێدایە؟، چ بەرژەوەندییەکی گەلی باشوری تێدایە؟، ئەگەر وانییە، دەست لەو کارە هەڵگرن."

 

وتوشیه‌تی"دەست لەو سیاستە بەرنەدەن ئارامیی هەرێم دەخەنە ژێر مەترسییەوە، وەکو پەکەکە بۆ ئارامیی هەرێمی کوردستان ئەوەی کەوتوەتە ئەستۆی ئێمە کەمتەرخەمییمان نەکردوە و لەمەودواش نایکەین، بەڵام بارەگاکانی دەوڵەتی تورک لەسەر خاکی باشور بونەتە بارەگای شەڕ، هەروەها کاری سیخوڕیی دوای سەردانەکەی وەزیری دەرەوەی تورکیا چالاکتر بوە، ئیتر زۆر بەئاشکرا سیخوڕیی دەکەن، ئەگەر ئەمە بەردەوام بێت هەرێم هەروا ئارام نامێنێتەوە و مەترسیی دەکەوێتە سەر، خوێنی گەریلاکانی کوردستان هەروا هەرزان نییە، منداڵی ئەم گەلەن، بۆ پاراستنی خەڵک گیانی خۆیان دەبەخشن، بۆ پاراستنی خەڵکی هەولێر هاتنە مەخمور، لە گوێر و شەنگال گیانی خۆیان فیداکرد، پێمان دەڵێن، 'با ئێمە زانیاریی بدەینە دەوڵەتی تورک و ئەویش بە فڕۆکە شەهیدتان بکات، بەس ئێوە هیچ مەڵێن، ئەوە بۆ ئێمە باش نییە' بەڵام ئەوەی ئێوە دەیکەن بۆ هەمو کەس خراپە، دەمانەوێت گەلەکەمان بزانێت، دۆخەکە مەترسیدارە، دەبێت شەریکایەتیی سیخوڕیی ڕابگیردرێت.

 

ئەرداڵ، جەختیکردۆتەوە، کە دەستی هەر کەس لە خوێنی گەریلادا هەبێت، بێ وەڵام نابن و وتی"گەلی باشور زۆر ئازاری چەشتوە، گەلێکی وڵاتپارێزە، ئەم کارە گەلی باشوری لەناودا نییە، گەل دژی ئەو سیاسەتەیە، هەتا پێشمەرگەش لەگەڵ ئەوەدا نییە، ئێمە زۆر فەرماندەی پێشمەرگە دەناسین، پێسمەرگە و گەریلا چەندین مانگ لەیەک سەنگەردا بون و دژی داعش شەڕیان کردوە، دو بۆ سێ ساڵ لە کەرکوک لە پەناییەکدا بون، من باوەڕناکەم هێزی پێشمەرگە ئاگاداری ئەو دۆخە بێت و لەگەڵیدا بێت، لەبەر ئەوە ئێمە متمانەمان بە گەلەکەمان هەیە لە باشور، بەڵام دەمانەوێت لەبەرامبەر ئەو سیاستەدا هۆشیار بن، با بزانن، کە هەر کەس پرسیاری شوێنی گەریلای لێکرد، ئەو کەسە بکوژ و دوژمنی گەریلایە، چونكە گەریلا نێچیرێک نییە کەسێک شەهیدی بکات و ئەویش بێدەنگ بێت، دەستی هەرکەس بکەوێتە خوێنی گەریلا، گەریلاش بێ وەڵام نابێت."

 

باهۆز ئەرداڵ ناڕاستەوخۆ، هۆشیاریی داوه‌ته‌وه‌ بەرپرسان و ئەو کەسانەی سیخوڕیی دەکەن بۆ سوپای تورکیا و ڕایگەیاندوه‌"ئێمە دەزانین ئه‌ولنه‌ کێن، لەگەڵ میتی تورک دیدار ئەنجام دەدەن، ئەگەر پێویستی کرد، دەتوانین ناوەکانیان بڵاوکەینەوە."

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure