مه‌لا به‌ختيار
465 جار بینراوە 1/2/2019 08:16 AM

مەلابەختیار لەیادی شەھید ئارام ھێرش دەکاتە سەر ھاوڕێکانی و گومان دەخاتە سەر تۆمارە مێژوییەکانی یەکێتی



سنور ميديا 

مەلا بەختیار لە وتارێکدا وێڕاى ستایشى رۆڵى شەهید ئارام، هێرشى توندى کردە سەر بەشێک لە سەرکردە دیارەکانى یەکێتى، ئەوانەى لە بەراییەکانى دامەزراندنى یەکێتى و کۆمەڵە و هەڵگیرساندنى شۆڕشى نوێدا بەشداربوون، بەبێ ئەوەى ئاماژە بە ناوى ئەو سەرکردە دیارانە بکات کە ئەو رەخنەى لێگرتون.

 

دوێنێ پێنج شه‌مه‌ , لەدواى پەردە لادان لەسەر پەیکەرى شەهید ئارام لە وتارەکەیدا مەلابەختیار رایگەیاند: گرنگی كاك ئارام هەرئەوە نەبوو وەك شۆڕشگێڕێك هەڵكەوتبوو، بەڵكو گرنگی كاك ئارام لەوەدا بوو كە ئەوكاتە لەكوردستاندا ئومێد نەمابوو بۆ هەڵگیرسانەوەی شۆڕش، تەنانەت بەشێك لە سەركردایەتی یەكێتی و كۆمەڵەش لەو كاتە باوەڕیان بە هەڵگیرسانەوەی شۆڕش نەمابوو.

 

هەر لە وتارەکەیدا مەلابەختیار گومانى خستە سەر تەواوى ئەو دۆکیۆمێنت و یاداشت و بیرەوەریانەى کە لە مێژووى شەهید ئارام تا ئەمڕۆ لەلایەن سەرکردە دیارەکانى ترى یەکێتى و بەشێک لەو کەسانە نوسراونەتەوە کە لەو سەردەمەدا بەشداربوون لە هەڵگیرساندنەوەى شۆڕشى نوێدا، بەشێک لەو کەسانەش هاوڕێى نزیکى شەهید ئارام و شایەتحاڵى روداوەکانن، مەلا بەختیار بەبێ ناوهێنانى هیچ کەسێک وتى: "هیوادارم نامە نهێنییەکانى جەنابى مام جەلال کە بەناوى جوتیارەوە ناردویەتى بۆ شەهید ئارام لەو کاتەدا بە هەوڵى خانەوادەکەى و هەموان بیاندۆزینەوە و تاکو بتوانین راستییە مێژویەکان وەک خۆى بزانرێت و نەک وەک ئەوەى هەندێک کەس بە مەرام نامەکانیان نوسیوەو شەهید ئارامیان کردوە بە عێراقى، ئەو کەسانە ئەو درۆنامانەیان نوسیوە ترسنۆکترین کەسەکانى ئەو سەردەمە بون، ئێستا بونەتە پەرلەمانتارو خانەنشینى پەرلەمان وەردەگرن و درۆنامە لەسەر شەهید ئارام و هاوڕێکانى دەنوسن".

 

لەبەشێكی دیكەی وتارەكەدا، مەلا بەختیار، باسی لەو روداوە نەخوازراو و سیاسەتە هەڵانە كرد كە بەهۆی شەهید بونی كاك ئارامەوە دوچاری یەكێتی و كۆمەڵە بوە و لەوبارەیەوە وتی: ئەگەر كاك ئارام بمایە، كۆمەڵە هەڵنەدەوەشایەوە و ئەو روداوانەش رویان نەدەدا کە لەدواى هەڵوەشانەوەى کۆمەڵە دروستبون، کە هەموى بە زیانى یەکێتى و کۆمەڵەى رەنجدەران کۆتایی هات.

 

لە کۆتایی وتارەکەیدا مەلا بەختیار وتى: "یەک رێگە لەبەردەممان ماوە کە بتوانین متمانە بۆ یەکێتى بگێڕینەوە، ئەویش تەنها بەستنى کۆنگرەى گۆڕانکارییە، ئەگەر یەکێتى کۆنگرەى گۆڕانکارى، کۆنگرەى رەخنە لە سیاسەت و رەفتارى خراپ نەبەستێت، کۆنگرەى نوێکردنەوەى یەکێتى نەبەستێت، دڵنیاتان دەکەم لە ساڵانى ئایندە یەکێتى دۆخى خراپى بەسەردێت".

 

دواى وتارەکەشى لە لێدوانێکدا بۆ ژمارەیەک لە رۆژنامەنوسان لێپرسراوی دەستەی كارگێڕی مەكتەبی سیاسی یەكێتی رایگەیاند، تاوەکو بڕیاری بەستنی کۆنگرە نەدرێت بەشداری کۆبونەوەکانی مەکتەبی سیاسی و سەرکردایەتی ناکات و وتى:"ماڵگێڕی خۆم دەبم".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure