کیم جۆنگ ئون و دۆناڵد ترەمپ
738 جار بینراوە 18/9/2017 09:23 AM

نیمچە دورگەى گوام؛ دەروازەیەک بۆ جەنگی ئەتۆمی



ئامادەکردن: هاوکار ڕەفیق
بەکالۆریۆس لە زانستەڕامیارییەکان

پوختەیەک پێش باسەکان

کیم جۆنگ ئون و دۆناڵد ترەمپ، دووسەرکردەی زبر ڕەفتار، خولیای جەنگ و شەڕانگێزی، بە زمانی چەک و موشەک و ئەتۆم هەڕەشە لەیەکتر دەکەن، بەشێوەیەک بواریان بۆ دیبەیت و دانوستاندن و زمانی دبلۆماسی نەهێشتۆتەوە، ئەمە لەکاتێکدا هەرپێکدادانێکی سەبازی، ئەگەری جەنگێکی فراوان و وێرانکەری لێدەکەوێتەوە، خاوەندارێتی هەردوولا بۆ چەکی ئەتۆمی و بوونی میحوەر وهاوپەیمانی بە‌هێز لێکەوتەکانی جەنگەکە دە هێندەی تر قورستر دەکەن، لە هەمبەر سزا نوێکانی ئەمریکا و پەسەندکردنی لە کۆنگرێسدا، کیم جۆنگ بە هەڵدانی دوو موشەکی بالیستی وەڵامی ئەمریکای دایەوە، تا ئەوەی لێدوانە توندەکانی ترەمپ و پەسەندکردنی سزا نوێکان لە ئەنجومەنی ئاسایشدا، وای لە کۆریایی باکورکرد هەڕەشەی هەڵدانی چوار مووشەکی بالیستی کە خاوەنی کڵاوەی ناوەکین، بە ئاراستەی نیمچە دوورگەی "گوام" بکات، کە بنکەیەکی سەربازی گرنگی هێزەکانی ئەمریکای لێیە. لەم توێژینەوەیەدا گریمانەی ئەوە دەکەین" هەڕەشەکانی کۆریایی باکور نابن بە کردار و لە ئێستادا ئەگەری پێکدادانی سەربازییش لەگەڵ ئەمریکا ئەگەرێکی نەکردەیە". 

توانا موشەکییەکانى کۆریای باکور
ئەو تاقیکردنەوانەى کە کۆریاى باکور لەم دواییانەدا ئەنجامیداون، لە بوارى هەڵدانى موشەکى کیشوەربڕدا، مەودایەکى نوێیان تۆمارکرد، بەشێوەیەک بەرگە هەواى زەویان بەزاند، سەربارى ئەوەى لە هەوڵى وەرگۆڕانى بەردەوامدایە، بۆ گۆڕینى ئاستى بەرزایی موشەکەکانى، بەئاراستە و مەودای ئاسۆیی، ئەمەش واتاى ئەوە دەگەیەنێت موشەکەکانى دەتوانن بگەن بە مەوداى دورتر، ئەم توانایەش لە موشەکى (هواسونغ14) بەرجەستەیە، کە دەتوانێت بگات بە دورى 6600کم، واتا ویلایەتى ئالاسکای ئەمریکا، لە چواچێوەى مەوداى ئەم موشەکەدایە. (1)، ئەم موشەکە دەتوانێت بە کەمتر لە ١٨خولەک ٣٣٥٦کم ببرێت، سەرباری خاوەنداری مووشه‌كی بالیستی كیشوه‌ربڕ، له‌جۆری "KN-20، كه‌ توانای هه‌ڵگرتنی 600-650 كیلۆگرامی هه‌یه‌ و هه‌ڵگری كڵاوه‌ی ئه‌تۆمییه‌.

گرنگترین جۆرەکانى موشەکى کۆریای باکور
(کەى ئین 2، 120کم مەوداکەیەتى- سکود سى ئی ئار، 300 بۆ 1000کم - کەى ئین 11، 1000کم- نودونغ، 1300کم - موسودان، نزیکەى 3500کم - کەى ئین 14، 10000کم - کەى ئین 08، 11500کم - کەى ئین 15، 1250کم- کەى ئێن 17، 100کم مەودا دەبرێت). بەم شێوەیە لە گەڵ هەر هەڕەشەیەکى ئەمریکا، کۆریا بە هەڵدانى موشەکێکى نوێ وەڵامى دەداتەوە، هەروەک چۆن لە 28ی تەموزى ئەمساڵدا دوای تاقیکردنەوەی موشەکێکی دیکەی کیشوەربڕ کیم جۆن ئون ڕایگەیاند تاقیکردنەوەکە سەلماندی کە هەموو خاکی ئەمریکا لە مەودای موشەکەکانیاندایە. (2)

ترەمپ و کیم جۆنگ ... خولیاى جەنگ و پێکدادان 

لە بانگەشەى هەڵبژاردنەکانیدا ترەمپ، بەتوندى هەڵوێستى بەرامبەر کۆریا وەرگرت، لەگەڵ هاتنە سەرکاریش زیاتر لێدوانەکانى لەبەرامبەر کۆریاى باکور توندکردەوە، لە کاردانەوەشدا کیم جونگ ئون، زبرتر لەجاران بە مانۆڕى سەربازى و هەڵدانى موشەک و هەڕەشەى زبرى ئاگرین وەڵامى ترەمپى دەدایەوە، بەم شێوەیە لە دواى هاتنە سەرکارى ترەمپ، پەیوەندییەکانى ئەمریکا و کۆریاى باکور ئاڵۆزى و گرژى زیاترى بەخۆوە بینیووە و بەرپرسانى باڵاى ئیدارەى ئەمریکا نەیانشاردووەتەوە کە هەموو بژاردەکان، لەنێویشاندا بژاردەى سەربازیى بۆ بەرەنگاربوونەوەی پرۆگرامە ئەتۆمییەکەى کۆریاى باکور کراوەیە، بەڵام لەگەڵ ئەوەشدا ئاماژە بەوە دەکەن تائێستا ڕێگەى دیبلۆماسى و سزاکان بە ڕێگایەکى دروست دەزانن، لێدوانەکانى ئەم دوواییە ئەم دووسەرۆکە شەڕانگێزە سنورى زمانى دبلۆماسى تێپەڕاندووە، هۆکارى ئەمەش ئەوەیە هیچ یەکێک لەم دووسەرۆکە نایانەوێت زمانى دبلۆماسى بەرامبەر یەکتر بەکاربهێنن. (3)
شانازیی دولایەنە بە سوپا و چەکى ئەتۆمییەوە
لە هەمبەر هەڕەشەکانی کۆریا ، ترەمپ پەیامێکی دۆخهەژێنی ئاراستەی کۆریای کرد و ڕایگەیاند"ئێمە وەک ئەمریکا هەرگیز وەکو ئێستا بەهێزترین وڵاتی جیهان نەبوین، ئێمە پیشتر پلانی بەهێزکردنی ئەمریکامان داناوە، یەکەم فەرمان وەکو سەرۆک داومە نۆژەنکردنەوەی کۆگای چەکە ناوکیـیەکانمان بووە". سەرۆکی کۆریاش بێجگە لە شانازی بە سوپا و موشەک و چەکی ئەتۆمییەوە شانازییەکی دیکەی نیە، وەزیری دەرەوەی ئەمریکاش ڕایگەیاند ترەمپ پەیامێکی بە هێزی ئاراستەی کۆریایی باکور کرد، کە کیم جۆنگ باش لەم پەیامە تێدەگات، چونکە ئەو لە زمانی دبلۆماسی و دانوستان تێناگات. ئەم لێدوانەی تیلرسۆن، تەواو ڕاستە چونکە کۆریا لەسەر ئاستى باڵا چەندین جار ڕایگەیاندووە هەرگیز بابەتی بەرنامە ئەتۆمی و موشەکییەکەمان ناخەینە سەر مێزی گفتوگۆ و بە هیچ جۆرێک لە گەشەپێدانی چەکی ئەتۆمی ناوەستین، بەلام بۆ دەستپێکی جەنگی و پێکدادانی سەربازی چەندینجار ئامادەباشی دەربڕییووە، هەر لەم چوارچێوەیەشدا موشەکە کیشوەربڕەکانی تاقی دەکاتەوە. (4)
نیمچە دورگەى گوام، لەژێر هەڕەشەى موشەکەکانى کۆریادا
ترەمپ لە سەرەتای ئابی ئەمساڵدا، لەبەرامبەر هەڕەشەکانی کۆریا ڕایگەیاند، وا باشترە کۆریای باکور چیتر هەڕەشە لە ئەمریکا نەکات، چونکە ڕووبەڕووی ئاگر و توڕەیی دەبێتەوە، بە جۆرێک کە پێشتر جیهان نەیبینیوە، کۆریای باکوریش بە بیرکردنەوەی لە هێرشی موشەکی بۆ سەر بنکەیەکی سەربازی ئەمریکا، لە نیمچەدورگەی گوام وەڵامی هەڕەشەکەی ترەمپی دایەوە. لە هەمووی ترسناکتر ئەم دورگەیە گەورەترین عەنباری چەکی ناوکی ئەمریکای لێیە، موشەکبارانکردنى نیمچە دورگەى گوام، وەک ئەوەى لە لایەن سەرۆکى کۆریایی باکورەوە باس دەکرێت، دورنیە بۆ جەنگى ئەتۆمی وێرانکەر پەلبکێشێت، دورگەکە 3.500کم لە پینگ یانگەوە دورە، کە موشەکەکانی دەتوانن چەند هێندە زیاتر مەودا ببڕن. سەربارى ئەوەى ئەمریکا لەم دورگەیەدا لەئێستاوە لە ئامادەباشیدایە بۆ وەڵامدانەوەى هەر هەڕەشەیەکى نەخوازراو لە لایەن کۆریاوە . (5)
هەڵکەوتە و تایبەتمەندى نیمچە دورگەى گوام؛ دورگەیەکی بچوک، بەلام ستراتیژیی
گوام دوورگەیەکە لە زەریای هێمن و دەکەوێتە نیوان ئەمریکای باکوور و وڵاتانی رۆژهەڵاتی ئاسیا، بەلام ١٢٠ ساڵە هەرێمێکی سەر بە ئەمریکایە، زۆرینەی دانیشتووانی بە رەچەڵەک ئەمریکین، ٦هەزار سەربازی ئەمریکی لە بنکەی ئندەرسۆنی ئاسمانی و گوامی دەریایی لە جەزیرەکە دەگرێتەخۆ، لە جەنگی جیهانی دووەمیشدا یەکێک بووە لەو بنکانەی ئەمریکا بەکاریهێناوە. ئەو کەسانەشی لە دورگەکە لە دایکدەبن، وەک هاوڵاتی ئەمریکی دادەنرێن، ئەوان فەرمانڕەوایەکی هەڵبژێردراو و ئەنجومەنی نوێنەرانی تایبەت بە خۆیان هەیە، بەڵام مافی دەنگدانیان نیە لە هەڵبژاردنی سەرۆکایەتی ئەمریکادا.ڕووبەرەکەی 541 کم چوارگۆشەیە، ژمارەی دانیشتووانی 163 هەزار کەسە، ئەگەر بەر مووشەکە ناوەکییەکانی کۆریای باکووری بکەوێت، دوورگەکە بە تەواوی وێران دەبێت، (6)
ئەمریکا چۆن بەر بە موشەکە بالیستیەکانی کۆریا دەگرێت
لەوەڵامى هەر گورزێکى موشەکى بۆ ئەم دورگەیە، ئەمریکا سود لە فرۆکەى بۆمبهاوێژى ستراتیژى (بى -1بى) دەبینێت، کە یەکێکە لە خێراترین جۆرەکانى فرۆکەى بۆمهاوێژ، کە لە ئێستادا لە ئامادەباشیدایە بۆ وەڵامى موشەکە بالیستیەکانى ئەمریکا، بۆ ئەوەى ئامانجى خۆیان نەپێکن، لە توانایدایە بە ئاستى 1.2لەسەرو خێراى دەنگەوە بجوڵێت، هەروەها تواناى بەرزبوونەوەى بۆ 9144م هەیە، تواناى هەڵگرتنى 34000کگم هەیە و ئەمەش واتا دەتوانێت 24 موشەکى کروز هەڵبگرێت. ئەم فرۆکە بۆمهاوێژە وەک بەشێک لە سوپاى ئاسمانى ئەمریکا، لە ئۆپەراسیۆنە سەربازییەکانى سوریا و لیبیا و ئەفغانستان و عێراق، بەسەرکەوتوویی بەکار هاتووە(7). بێجگە لەوەی ئەمریکا سیستەمی بەرگری موشەکی (THAAD)ی دامەزراندووە، بۆ وەڵامدانەوەی هەڕەشە موشەکییەکان.
کاردانەوە ناوخۆییەکان لە هەمبەر قەیرانی نیمچە دورگەی گوام
ئەندامى لیژنەى کاروبارى دەرەوە لە ئەنجومەنى نوێنەران، سەربە دیموکراتەکان ئلیوت ئەنگل، پێی وایە ئەو هێڵە سورە شێتانەیەیی کە ترەمپ کێشاوییەتی لە بەرامبەر هەڕەشەکانی بیونگ یانگ بەردەامی هەیە، هەروەها پێی وایە ئاسایشی ئەمریکا بەتەنیا لەسەر هێزی سوپاکەی ناوەستێت، بەڵکو ئەوە پێویستی بە سەرکردەی لێهاتووی هێزەچەکدارەکان هەیە، لەسەر پشکی پارتی کۆمارییەکانیش جۆن مەکین، هەڕەشەکانی ترەمپی دایە بەرڕەخنە و ڕایگەیاند سەرکردە گەورەکان هەڕەشە لە دوژمنەکانیان ناکەن، هەتا ئەوکاتەی خۆیان ئامادە دەکەن بۆ جوڵەکردن، چونکە بە بڕوای مەکین، ترەمپ لە ئێستادا ئامادەیی جوڵەکردن نیە بە ئاراستەی جەنگ. جێمس ماتیس وەزیرى بەرگرى، سەبارەت بە کێشەى نیمچە دورگەى کوریا ڕایگەیاندووە، لە ئێستادا ڕێگە چارەى دیمپلۆماسی دەگرینە بەر، چونکە هەڵگیرسانى جەنگ لەگەڵ کۆریاى باکور کارەساتێکى گەورەى لێدەکەوێتەوە. وەزیری دەرەوەی ئەمریکاش دەڵێت، هەڕەشەکانی کۆریای باکوور جێگەی مەترسی نین. (8)

کاردانەوە ناوچەیی و نێودەوڵەتییەکان لە هەمبەر ئەم قەیرانە 

وتەبێژى حکومەتى فەرەِنسا کریستۆف کاستانیر، داواى لە لایەنەکان کردووە، لە هەڵوێستیاندا بەرامبەر کۆریای باکور هەست بە بەپرسیارێتى بکەن و هەوڵى کەمکردنەوەى مەترسیەکان بدەن، وتەبێژى وەزارەتى دەرەوەى ئەڵمانیاش مارتن شایفر، ڕاگەیاند پێویستە هەریەک لە کۆریاى باکور و ئەمریکا کۆنترۆڵى خۆیان بکەن، ڕویساش بەهەمان شێوە خوازیارە ئەم بابەتە بەرى پێبگردرێت، چینیش لە بەیاننامەیەکدا ڕایگەیاند، پێویستە لایەنەکان بەردەوام بن لە هەوڵدان بۆ گەیشتن بە چارەسەرێکى ئاشتى، لەهەمبەر مەترسى تەقینەوەى ئەتۆمى لە نیمچە دورگەى گوام، بەڵام دواى ئەم بەیاننمایە ڕۆژنامەى گلوبال تایمزى چینى، ئەوەى بڵاوکردەوە لە حاڵەتى دەستپێشخەرى کۆریاى باکور بۆ هەڵدانى موشەک بۆ نیمچە دورگەى گوام بێلایەن دەبێت، بەڵام چین و ڕوسیا لە ڕابردوودا بە ڕوونى هەڵوێستیان نەبووە لەبەرامبەر کۆریاى باکور، ترەمپ هەمیشە ڕوسیا و چین بەرامبەر بە کۆریاى باکور بە لاواز و شەرمنانە ناودەبات، بەوەى هەرگیز نایانەوێت کۆریا بدۆڕێنن و بە هاوسێیەکی باش لێی دەڕوانن. سەرۆک وەزیرانى ئوستورالیاش ئەوەى ڕاگەیاند کە دەوڵەتەکەى ئامادەیی یارمەتیدانى ئەمریکاى هەیە، لەبەرامبەر هەرهێرشێکى موشەکى کۆریاى باکوردا، ئاشکراشە هەریەکە لە کۆریاى باشور و یابان لەبەردەم هەڕەشە موشەکییەکانى کۆریاى باکوردان، هەرودولاش هاوپەیمانى ئەمریکان و پشتى بەرنادەن، هەروەک چۆن یابان پێی وایە هەر هەڕەشەیەک بۆ سەر نیمچەدورگەى گوامى ئەمریکى، واتاى هەڕەشەکردنە بۆسەر یابان. (9)

کۆبەند
١: پێکدادانى سەربازى لەنێوان ئەم دوو دەوڵەتە بژاردەیەکى قورسە، چونکە پەلدەکێشێت بۆ دروستبوونى میحوەر و هاوپەیمانى دوانەیی، لە لایەک ئەمریکا و ژاپۆن و کۆریاى باشور لەبەرەیەکدادەبن و روسیا و ئێران و کۆریاش لەبەرەیەکى تردا، پێشبینى چونە پاڵى چینیش ئەگەرێکى کراوەیە، چونکە ئەو جەنگى دژى سیستەمى تاکجەمسەرى لا ڕەواترە هەتا درواوسێ باشەکەى. سزادانى ڕوسیا و ئێران و کۆریاى باکور لەیەک لیستدا لە لایەن ئەمریکاوە، دروستبوونی ئەم بەرەیە زیاتر دەکات.
٢:بژاردەى شایستە لەبەردەم ئەمریکادا، دانوستانکردنە لەگەڵ کۆریاى باکوردا، دانپێدانان بە تواناى سەربازى و موشەکى ئەو دەوڵەتە، وەک ئەوەى لەگەڵ ئێران کردى،زمانى زبر و لێدوانى توند لێکەوتەى ناباشى دوانەیی لێدەکەوێتەوە. بۆیە ئەمریکا باش لەوە تێگەیشتووە جەنگ و کردەى سەربازى لەگەڵ کۆریادا کارەساتە، بەجۆرێک هاوسەنگى سیستەمى جیهانى و تاکجەمسەرى تێکدەدات، بۆیە ئەوەى ئێستا دەیکات هیچ نیە بێجگە لە موزایەدەیەکى سیاسى فوتێکراو، کە لە ڕێیەوە دەیەوێت بەرژەوەندى فرەڕەهەند وەگیربخات.
٣:هەڕشەکانى کۆریاى باکور لە ناوچەکە و دەوڵەتانى نەیارى تەنیا زیان ناخاتەوە، بەڵکو سودى ئەمریکاى تێدایە، بۆئەوەى هەمیشە ژاپۆن و کۆریایی باشور، داواى ئەوە بکەن ئەمریکا بیان پارێزێت و باشتر سیستەمى بەرگرى هاوبەشیان لەگەڵ دابمەزرێنیت. هەرچەندە ئەمە ئامادەیی کردارەکی ئەمریکا لەم ناوچەیە چین دڵخۆش ناکات، هەربۆیە چین هەمیشە خوازیارە دۆخەکە نەتەقێتەوە، تا ئەمریکا کەمتر ئامادەیی هەبێ لە دەوڵەتانی ڕۆژهەڵاتی ئاسیادا.
٤: لێدان لەم دورگە ستراتیژییە باجەکەى قوس دەبێت یان ڕاسترە بڵێین دەبێتە تەقینەوەى جەنگێکى ئەتۆمى، بۆیە کۆریاى باکور وەک چەکێکى پروپاگەندەیی یان جەنگێکى دەرونى سود لەم ورژاندنە ڕاگەیاندنیە وەدەگرێت، چونکە لە کاردانەوەدا ناوچە هەستیارەکانى کۆریا و ناوەندەکانى چەکى ناوکى ئەو وڵاتە یەکەم بەرپەرچى گوزى سوپاى ئەمریکا دەبن.
٥: گوتارە ئاگرینە بەردەوامەکان، مەترسی وەرگۆڕانیان بۆ جەنگی مەیدانی لێدەکرێت، بیانووگێڕان بە کۆریا لە لایەن ئەمریکاوە پێدەچێت سینارییۆیەک بێت بۆ وەگەرخستنی کردەی سەربازی، بەنیەتی لە کۆڵکردنەوەی فۆبیای کۆریا، هەرچەندە ئەم ئەگەرە لە ئێستادا تاڕەدەیەکی زۆر نەکردەیە.
لیستى سەرچاوەکان
1: قواعد أمريكية تحت رحمة صواريخ كوريا الشيمالية، موقع سكاى نيوز .
2:نفس مصدر
3: أجواء حرب تخيم على شبة الجزيرة الكورية،الجزيرة العربية.
4: بيونغ يانغ ترد على تهديدات ترامب وتدرس استهداف منشآت عسكرية أمريكية،موقع الوقت.
5: ترامب: تهديدي لبيونغ يانغ بـ"النار والغضب" لم يكن قويا بما فيه الكفاية، روسيا اليوم.
6: خطط الهجوم على جزيرة غوام الأمريكية ستكون جاهزة خلال أيام، بى بى سى.
7: طبول الحرب تقرع في شبة الجزيرة الكورية، موقع سكاى نيوز.
8: التصعيد الاميركي-الكوري ... مزايدات سياسية أم حرب نووية وشيكة؟جريدة الشرق الأوسط، ل12.
9: نفس مصدر.

پێشتر لە هەفتەنامە ئاژانس ئەم توێژینەوەیە بڵاوکراوەتەوە

ئەلبومی وێنەکان

52161892017_2.jpg

142161892017_3.png

232161892017_4.png

 

402161892017_6.png

 

02261892017_8.jpg

162261892017_10.png

242261892017_11.png

زۆرترین خوێندراوە

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure