عوسمان قادر
384 جار بینراوە 20/3/2017 09:52 PM

لەم چاوپێکەوتنەوە ئاشنابن بەدنیای شاعیر عوسمان قادر



سنور میدیا

عوسمان قادری شاعیر له‌ چاوپێكه‌وتنێكی تایبه‌تی سنور میدیا دا ، تایبه‌تمه‌ندیه‌كانی خۆی ئاشكرا ده‌كات.

سەرەتای شیعر نووسینت ئەگەرێتەوە بۆ چیکاتێ ؟ لەژێر کاری گەری کام لەشاعیرەکانی ؟


سەرەتای شیعر نووسینم ئەگەڕێتەوە بۆ ساڵی 1988مانگی دوو ...لە شاری هەڵەبجە .

وەکو کاریگەریش سەرەتا شیعرە بەرزەکانی احمد هەردی و هەنێ لە شیعرەکانی مامۆستا گۆران وایان کرد هەست بە بەهرەی ناوەوەی خۆم بکەم .دواتریش زۆر خوێندنەوەی شیعرەکانی حەزرەتی نالی و هەنێ لە شیعرەکانی قانع بەم دوادواییەش شیعرەکانی حەکیم میرزا گوڕ و تینێکی باشی پێ دام و وەک لەو زۆنگاوی وشک بونەی شیعر ڕزگاری کردم ..چونکە بەڕاستی شیعرەکانی میرزا جوانن و زۆر زوو ئەچنە دڵەوە .

 

چۆن بوو شاعیریت هەلبژارد ؟

ئەوەی من هەستم کردبێ شیعر کەرەستەیەک نیە تۆ هەڵیبژێری یان ڕەتی بکەیتەوە بەڵکو ئەو خۆی وەک خوێن دێتە دەمارەکانتەوە و خۆی ئەسوڕێتەوە بە دەمارەکانی جەستە و دەماغی شاعیرەوە .من وای ئەبینم.

 

زیاتر بەکام ڕێباز شیعر ئەنووسی ؟

سەرەتای شیعریم بە کلاسیک دەستم پێ کرد بەڵام هەرزوو خۆم لە شیعری ئازاد دا دۆزیەوە ..هەستم کرد خۆمانو کردن بە وەزن و قافیەو کاتێکی زۆرت ئەبات و هەنێ جاریش کاتەکە ئەبێتە کاتێکی بەزایەچوو . چونکە شاعیر ئەتوانی بەبێ وەزن و قافیەش جوانترین وێنای شیعری دەربخات و بەرجەستەی بکات .

 

بەرهەمی چاپکراوت هەیە ؟

بەرهەمی چاپ کراوم تا ئێستا نیە .بەڵام کۆمەڵێ شیعری زۆرم هەیە .بەداخەوە بڵاو کردنەوەی شیعریش یان ئەبێ سەرمایەت ببێ یان پاشکۆی حیزبێ بیت .

 

خۆشەویستی لای تۆ وەک شاعیریک چی دەگەینێ؟

خۆشەویستی وەک شاعیر و وەک مرۆڤیش لای من تەنها هەستێکی جوانی ناو دڵ و دەرونە و هەمیشە ئەبێ ببەخشرێتەو بۆ بەرامبەرەکەت . خۆشەویستی نەبێ نەژیان بەڕێ ئەکرێ و نە چێژ لە جوانیەکانی تری ژیانیش ئەبینرێ . خۆشەویستی بە هەموو شێوەکانیەوە هەر جوانە .بۆ نمونە خۆشەویستی بۆ دایک و باوک بۆ هاوسەر و هاوڕێی و دۆست و برادەرەکان ..هەمویان هەر جوانن و زەرورەتی ژیانن.

 


ژیانی هاوسەریت بەخۆشەویستی پێک هێناوە ؟

بەڵێ ژیانی هاوسەریم پێک هێناوە و سوپاس بۆ خوا ژیانێکی سادەی هەژارانە بە سەربەرزیەوە بەڕێ ئەکەم.

 


زیاتر لەچی کاتێکدا شیعر ئەنووسی ؟

شیعر لای من کاتی بۆنیە و مەرج نیە کاتێ دیاری بکرێ بۆ شیعر .چونکە شیعر خۆی دێ و خۆی ئەڕوا....

 


دنیای شاعیر لەگەل دنیای مروڤەکانی کە جیاوازە ؟

منــ هەست ناکەم هەستی شاعیرێکی باش لەگەڵ هەستی کەسێکی غەیرە شاعیر جیاوازبێ .بەڵام ئەوە هەیە زۆربەی زۆری شاعیرەکان هەستیان لە کەسانی تر ناسک تر و جوانترە .

 


خولیایەکت هەبووە نەهاتبێتە دی ؟ هەرچاوەروانبیت ؟

هەموو مرۆڤێ تا ئەمرێ خولیای و ئاواتی خۆی هەیە و زۆربەشیان نایەنە دی ...بەتایبەت لەم بارو دۆخە ناخۆش ناجۆرەی کوردستان دا کە ژیان هەرخۆی بوە بە بەڵا بەسەر هاوڵاتیانەوە.

 


لەئێستا دا شیعر لەچی ئاستێک دا ئەبینی ؟

ئاستی شیعر لە ئێستادا بە بۆچونی من لە جوانترین حاڵەتی دایە و ئەبینم کۆمەڵێ گەنجی جوان و به توانا شیعر ئەنوسن و سەرقاڵن .ئەوە مایەی دڵخۆشیە و هەستێکی جوانم ئەداتێ.

 

چیت هەیە بۆ خوێنەرانی شیعرو ئەوانەی موعجیبن بە شیعرەکانت ؟

من تەنها خۆشەویستی و ڕێز و وەفام هەیە بۆ خوێنەرانی شیعرەکانم و چاوی هەمویان ماچ ئەکەم و بەدڵنیاییەوە هاندانەکانی ئەوان زیاتر گوڕ و تینم ئەداتێ بۆ شیعر نوسین.

 

ئەمانە لای شاعیر چیەگەیەنن ؟
دایک، نیشتیمان، شیعر،عیشق

دایک ....ئازیز ترین کەسە مرۆڤ شانازی پێوەبکات و لە دڵی خۆیدا بۆ هەمیشە بیهێڵێتەوە

نیشتیمان ..... خۆی لە ڕاستیدا نیشتیمان کۆشی گەرمی مرۆڤەکانن کە تێیدا نیشتە جێن .بەڵام بە داخەوە ئێستا نیشتیمان و خاک نە ئەو کوشە گەرمەیە و نە لای خەڵکیش وەک جاران ئینتیمای بۆ مابێ بە بۆنەی ئەو هەمو ناعەدالەتی و ستەمانەی کە لە نیشتیمان و خەڵکەکەی ئەکرێ .

شیعر .....شیعر بۆ من دیاری خودایە و خەمی دڵم سوک ئەکات و خۆشیم ئەداتێ

عیشق .... عیشق یەکەم جار بۆ خودایە دواتر عیشقی نێوان مرۆڤەکان .دواتر عشقی دار و دڕەخت و کەژ و ئاو خاک ...ئەوانە هەموی بە عیشق و خۆشەویستیەوە جوانن .

 

دواتر دەسخۆشی و سڵاوی جوانم بۆ کاکە هەورامانی خۆشەویست هەیە و خوای گەورە چاوی لێی بێ .سوپاسی مانو بونەکانی ئەکەم .

ئامادە کردنی چاوپێکەوتن :هەورامان خالید

 

 

زۆرترین خوێندراوە

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure