حەشدی شەعبی
166 جار بینراوە 21/11/2016 11:22 PM

حەشدی شەعبی پێكهاتە و مەترسییەكانی لە داهاتودا



 

ئامادەکردنی: هاوکار ڕەفیق

بەکالۆریۆس لە زانستە ڕامیارییەکان

پێشەكی:

دوای دزرەكردنی ڕێكخراوی تیرۆرستی (داعش) بۆ ناو خاكی (عێراق) و دروستبوونی بۆشایی ئەمنی لە لایەك، نەبوونی وەڵامێكی سەبازی بەهێز بۆ هێرشی (داعش) لە لایەن سوپای (عێراق)ەوە لە لایەكی ترەوە، بەم دوو هۆكارەش (داعش) لە ماوەیەكی كەمدا توانی یەك لەسەر سێی خاكی عێراق داگیر بكات، دوای ماوەیەكی كەمیش عیراق بووە ژینگە و مەیدانی هێنانە ناوەوەی چەندین ڕێكخراو و گروپی میلیشیایی و شیعی، هەموو ئەم گروپ و ڕێكخروە شیعانەش لە ژێر سایە و دەسەڵاتی (حەشدی شەعبی)دا دیسپلینكران و كۆكرانەوە،كە لە ناوەڕاستی ساڵی (2014)دا، بە پاڵپشتی ئێران و شیعەكانی عێراق دروستكر، بۆیە لێرەدا بە پێویستی دەزانم بەكورتی ناوی سەرجەم ڕێكخراو و گروپەكانی ناو هەناوی (حەشدی شەعبی)بخەمە ڕوو، كە بە پێی سەرچاوەكان هەتا ئێستا گروپ و دەستە چەكدارییەكانی زیاترە لە (چل)گروپی چەكداری، بەدوای ئەوەدا مەترسیەكانی مانەوەی ئەم گروپە لە ئایندەدا، بە (شەش) خاڵ دەخەمەڕوو:_

 

یەكەم: گروپ و ڕێكخراوە سەرەكیەكانی ناو (حەشدی شەعبی):

1: ڕێكخراوی بەدر، ( هادی عامری) بەرپرسی سوپای ئێستای سوپای بەدرە و كەسێكی باوەڕ پێكراوی ( خامنەیی _ ڕێبەری ئیسلامی ئێران ) ە، لە لێدوانێكیدا بۆ ئاشانسی هەواڵی ڕۆیتەرز دەڵێت: خامنەیی تەنیا ڕێبەری ئێرانیەكان نیە، بەڵكو ئەو ڕێبەری هەموو موسوڵمانانی جیهانیشە)، هاوكات سوپای بەدر بە بەهێزترین گروپی چەكداری عەشدی شەحبی دادەنرێت و بە پێی ئامارە نافەرمیەكان ژمارەی ئەو هێزانەی لە ناو سوپای بەدر دان زیاتر لە (15) هەزار چەكدارە، زۆرێك لە سەرچاوەی دیكەش بۆ  (10.000) بۆ (12.000)هەزار چەكدار خەمڵاندنی بۆ دەكەن و بێجگە لە (عێراق) (ئێران)یش پاڵپشتی دارایی سەرەكیەتی، ئەم ڕێكخراوە لە ساڵێ‌ (2012)وە بەم ناوەوە دروستكرا.


2: كەتایبی حیزبوللە: ئەم ڕێكخراوە هاوشێوی حیزبووللەی لوبنانی هەمان ئامانج و ستراتیژی هەیە بەڵام ژینگەی كاركردن و جوڵەكردنی لە ناو (عێراق)دایە، بەم شێوەیە زۆرێك بە باڵی حیزبوللەی عێراق دەیناسێنن، گرنگترین ئامانجیشی بریتیە لە بڵاوەپێكردنی پەیام و دەستكەوتە سیاسی و ئاینیەكانی شۆڕشی ئیسلامی ئێران و چەسپاندنیان لە سەر زەمینی دەوڵەتی (عێراق)دا.


3: عەسایبی ئەهلی حەق: شوێنگرەوەی سوپای مەهدییە و  لە لایەن ( قەیس غەز علی) ەوە سەرپەشتی دەكرێت، (حەسایبی ئەهلی حەق) باوەڕی تەواویان بە ویلایەتی خامنەیی هەیە و وەك ڕێبەری ئاینی شیعەكانی دنیا دەیناسێنن، بە پێی سەرچاوە جیاوازەكان بەر لە هێرشی (داعش) بۆ سەر (عێراق) ژمارەی چەكدارانی ئەم گروپە بە (3) هەزار كەس دەخەمڵێنرا، زۆرینەشیان بۆ جەنگ دژی ڕێكخراوی تیرۆرستی (داعش) ڕەوانەی (سوریا) كرابوون، بەڵام لە ئێستادا بە پێی سەرچاوەكان ئەندامەكانی بۆ هەزاران كەس بەرز بۆتەوە.


4: سەرایای خۆراسانی (سوپای خۆراسان)

گروپێكی دیكەی چەكداری شیعەی ناو حەشدی شەعبیە لە عێراقدا، هەر وەك بەرپرسانی ئەو گروپە دەڵێن دامەزراندنی ئەو گروپە لەسەر داوای (خامنەیی) ڕێبەری دەوڵەتی ئیسلامی ئێران بووە، سەرایای خۆراسانی ناوەكەی لە (سەیدی خۆراسانی) یەوە وەرگرتووە، كە ڕەمزێكی ئاینی شیعەكانە و بە شێك لە شیعەكانیش بە سەیدی خۆراسانی دادەنێن، بەدەر لەوەی خامنەیش خۆی لە دایك بووی خۆراسانە، ئەم گروپە چەكدارییە لە لایەن ( حەمید تەقەوی) یەوە لە فەرماندە باڵاكانی قودسی ئێرانیەوە دامەزراوە، تەنانەت لۆگۆی گروپەكەش لەسەر شێوەی (سوپای پازدارانی ئێران) دامەزراوە، بە شێوەیەكی ورد و ڕاست ژمارەی چەكدارانی ئەم گروپە نەزاندراوە، بەڵام چەك و پێداویستیە سەربازیەكانیان لە لایەن دەوڵەتی ئێرانەوە دابین دەكرێت.


5: سەرایای سەلام

ئەمیش وەك گروپە چەكدارەكانی دیكەی (سوپای بەدر، سەرایای خۆراسانی،   كەتیبەكانی حیزبوڵا و حەسایبی ئەهلی حەق) بەشێكە لە پێكهاتەی (حەشدی شەعبی) لە عێراق، ئەم گروپە لە بەشێك لە پاشماوەكانی سوپای مەهدی و ژمارەیەكی بەرچاوی شیعە پێكهاتووە، كە ژمارەیان دەگاتە هەزاران چەكدار، دەوترێت ئەم گروپەش لە لایەن دەوڵەتی ئێرانەوە چەك و پێداویستی سەربازیان بۆ دابین دەكرێت، سەرجەمی ئەو گروپە شیعانەی لەسەرەوە ناوم هێناون و چەندین گروپی دیكە لە لایەن ئێرانەوە دامەزراون و هاوكاری سەربازییان دەكرێت، هاوكات بەشێك لەو گروپانە پێشتر لە ناوخۆیاندا ململانێ و ناكۆكیان هەبووە، بەڵام ڕێكخستنیان لەناو هێزێكی گەورەی خاوەن دارایی مەزن  و فرە گروپی شیعەیی وەك حەشدی شەعبی دەیانكاتە هێزێكی كاریگەر و بەهێزتر لە جاران.   

 

گروپ و دەستەكانی تری سەر بە حەشدی شەعبی:

1: كەتیبەی سەید ئەلشوهەدا: لە ساڵی (2013) وە لە لایەن (ڕێكخراوی بەدر) و (كەتیبەی حیزبوللە)وە دامەزراوە، سەركردایەتی ئەم گروپە بە (حاج ابو عەلا ْ) سپێردراوە، ئامانجی سەرەكی پاراستنی شوێنە پیرۆز و ئاینیەكانە لە عێراق و سوریا، ئەم گروپە هێندە كاریگەر نیە لە هەناوی حەشدی شەعبیدا، بە راورد بە گروپەكانی تر، دەتوانرێتـ بڵێن وێنەیەكە لە (كەتیبەی حیزبوللە) بەڵام ئامانجی كاركردن و شوێنی كاركردنی دەیكاتە گروپێكی تاڕادەیەك جودا.

2: حەرەكەی ئەلنوجابە: لە (2013)وە دامەزراوە و لە لایەن (شێخ اكرەم)ەوە سەركردایەتی دەكرێت، شوێكەوتەی سیاسەتەی ئێرانە، چەندین جوڵانەوە و پێكدادانی كارای بینیوە دژی تیرۆرستانی (داعش).

3: فەیلەق ئەلوەعد سادق: لایەنگری توندی (علی خامنەیی)یە و لە لایەن (محمد هەمزە)ەوە بەڕێوەدەبرێت و ئامانجی سەرخستنی سیاسەت و ئەجێندای ئێران و سنوردانانە بۆ پێشڕەوی داعش لە عێراق.

4: لیوای ئەبو ئەلفەزڵ العباس: هەمان گروپ بە هەمان ناوەوە لە سوریاش بوونی هەیە، بارەگای سەرەكی لە كەربەلایە و بەرگریكاری شوێنە پیرۆز و ئاینیەكانە.

5:  كەتیبەی تەیار ئەلریسالی: ئەم گروپە لە لایەن (عەدنان ئەلشەحمان)ەوە دروستكراوە و لە ژێر ئاراستە و بڕیاری خۆشیدایە و بە شێوەیەكی سەرەكی لە لایەن دەوڵەتی یاساوە پارەدار دەكرێت.

6: كەتیبەی ئیمامی عەلی: مێژووی دروستبوونی ئەم گروپە نزیكە لە گەڵ دروستبوونی (حەشدی شەعبی)، لە لایەن (شەبیل زەیدی)ەوە دەبرێـت بەڕیوە، پەیوەندی تۆكمەی لەگەڵ (سوپای بەدر)هەیە، و هەم لەگەڵ عێراق و هەم لەگەڵ ئێران پەیوەندی قوڵی هەیە و لە لایەن ئەوانەوە یاریدەدەرێت، لە جەنگی تێكشكاندنی (داعش)دا ڕۆڵی گرنگ و بەهێی بینیوە، چەند جارێك لەگەڵ دانیشتوانە سوننەكانی پارێزگاكانی عێراق بە توندی مامەڵەی كردووە.

7:لیوای ئیمام حوسێن: هاوشێوەی (كەتیبەی ئیمامی عەلی) لە هەمان مانگدا لە ساڵی (2014) دامەزراوە، چالاكییەكانی لە پارێزگای سەلاحەدینە.

8: كەتیبەی رۆحولا: سەركرایەتی ئەمگروپە لە لایەن (شێخ ئەبو تەلیب)ەوە دەكرێت، لە لایەن ئێرانەوە پڕچەك دەكرێت.

9: كەتیبەی ئیمام غلیب (ئیمام مهدی):زیاتر لە (كەتیبەی حیزبوللە)ەوە نزیكە و لە لایەن (ئەبو زەر ئەغفاری)ەوە سەركرایەتی دەكرێت.

10: لیوای عەمار بن یاس: لە ساڵی (2013)ەوە، سەر بە ڕژێمی بەشار ئەسەدە و لە لایەن ئێرانەوە هاوكاری دەكرێت، مەیدانی چالاكیەكانی دەوربەری شاری (حەلەب)ە لە سوریا.

11: مقاومە ئیسلامیە(لیوا یەوم ئەلمەوعید): لە سامەڕا و تكریت چالاكی هەیە و لە ساڵی (2008)ەوە وەك بەشێك لە سوپای مەهدی دامەزراوە، سوننەكانی ئەم ناوچەیە لە مامەڵەی ناباشی ئەم گروپە دڵگرانن.

12: لیوا ئەسەدوڵا غالیب: پاڵپشتی ڕژێمی ئەسەد دەكات، لە لایەن (سوهەیل ئەراجی)ەوە سەركردایەتی دەكرێت.

13:لیوای ئەلمونتەزەر: لە بەسرەوە دامەزراوە، لە لایەن (سەید دەغز ئەلموسەویی)ەوە سەرپەرشتی دەكرێت.

14: سەرایەی ئەلجیهاد: لە ناوەڕاستی (2006) دامەزراوە و لە لایەن (حەسەن ئەلساریی)ەوە سەرۆكایەتی دەكرێت.

15: سەرایەی ئاشورا: لە (2014)دامەزراوە، پەیوەندییەكی نزیكی لەگەڵ (عەمار ئەلحەكیم)هەیە و مەیدانی جوڵانەوەكانی لە (بەغدا و سامەڕا)دایە.

 بەدەر لەم گروپانە(17)گروپی تر دەستنیشان دەكەم كە بەشێكن لە حەشدی شەعبی كە مەیدانی چالاكییەكانیان لە عێراق و سوریادایە:_

(موجاهیدینی حیزبوللە لە عێراق، كەتیبەی ئەلشەهید ئەلئەوەل، كەتیبەی دیفاع ئەلموقەس، سەرایەی ئاشورا، كەتیبەی ئەنسار ئەلعقیدە، قوەت شەهید بەدر، لیوای یوم قیامە، حیزبوللە ئەلسایرون، حەرەكەت ئەبداڵ، سەرایەی ئەلزەهرا، حیزبوللە ئەلئەبرار، لیوا ئیمام ئەلموجتەنا، كەتیبەی ئەلفەتح موبین، لیوا ئیمام ئەلقام، لیوا ئەلقاریە، لیوا ئەلسادقین، لیوا ئەلشەباب ئەلریسالی).

 

ئاسەوارەكانی حەشدی شەعبی، دوای نەمانی (داعش) لە عێراق

بە دڵنیایەوە دوای كۆتایی هاتنی ڕێكخراوی تیرۆرستی داعش لە عێراقدا، كێشەی سەرەكی كار و چالاكی و داخوازییەكانی حەشدی شەعبی دەبێت(مەبەست لە داخوازییەكانی دوای جەنگە)، گەوەرە بوونی هاریكاریكردن و پاڵپشتكردنیشی لە لایەن دەوڵەتی شیعە مەزهەبی ئێران و بێدەنگیەكانی پێكهاتەی شیعەی عێراق كە لە ئێستادا باڵادەستی سەرەكی عێراقە، مەترسی ئایندەی مانەوەی (حەشدی شەعبی) تۆختر دەكاتەوە، ئەم مەترسیانە لەم چەند خاڵەدا دەردەكەون:_

یەكەم:(حەشدی شەعبی) بە سەرجەم گروپ و دەستەكانی ناوییەوە، ئامانجی سەرەكی ڕەوایی دانە بە سیاسەت و ستراتیژی دەوڵەتی ئێران لە (عیراق)دا، كە هەتا ئەم ساڵانەی دوایی و هاتنە سەركاری شیعەی عێراقی بۆسەر دەسەڵات، دەوڵەتی ئێران ڕۆڵێكی كارای نەبوو بەسەر سیاسەت و ئاراستە و بڕیاری عێراقەوە.

دووەم:مانەوەی (حەشدی شەعبی) یەكناگرێـتەوە لەگەڵ ویست و خواستی (سوننە)كانی عێراق، ئەوان جەنگی مێژووی و مەزهەبی توندیان هەیە لەگەڵ (شیعە)دا، بۆیە ئەم باڵادەستبوون و پاڵپشتی كردنەی (حەشدی شەعبی) لە لایەن ئێران و عێراقەوە، دڵیان خۆش ناكەت، بگرە پێكدادان و بەریەكەوتنیان لەگەڵ یەكدی دوای كۆتایی هاتنی (داعش) ڕووداوێكی نەكردەیە (موستەحیلە)، ئەمە وێڕای ئەوەی توندوتیژی (حەشدی شەعبی) بەرامبەر پێكهاتە سوونەكانی (فەلوجە و ئەنبار و ڕومادی) گەورەترین نیشانەی ئەم پێكدادانەیە.

سێهەم:دروستكردنی (حەشدی شەعبی) بۆ دژوەستانەوەی، كردەوە تیرۆرستیەكانی (داعش)دروستكرا لە خاكی عێراقدا، داواكردنی دەستكەوتی جەنگی دوای كۆتایی هاتنی (داعش) لە لایەن (حەشدی شەعبی)یەوە، داوایەكی حەتمیە، ڕەنگە داواكارییەكانی لە لایەن زۆرێك لە پێكهاتەكانی عێراقەوە، بە ڕەوا نەبینرێـت و دیسانەوە هۆكارێك بێت بۆ پێكدادان و خۆشكردنی ئاگری جەنگی ناوخۆ.

چوارەم:مانەوەی (حەشدی شەعبی) لە عێراقدا، پێش هەر دەوڵەتێكی تر لە سەر ئاستی نێودەوڵەتی (ویلایەتە یەكگرتووەكانی ئەمریكا) توڕە دەكات، ئەمە وێڕای دەوڵەتانی ناو هاوپەیمانی نێودەوڵەتی ڕووبەڕووبوونەی جەنگی داعش، دڵگرانن بە ڕۆڵی (حەشدی شەعبی) لە عێراقدا، چونكە ئەمان ئەم كارانەی ئەوان بە درێژكراوەی سیاسەتەكانی (ئێران) دەبینن لە عێراقدا، یەكەمین نیشانەی ناڕازیش لە ئێستادا ئەوەیە كە (فرۆكەكانی هاوپەیمانان)  یاریدەی هێرشە زەمینیەكانی (حەشدی شەعبی)ناكەن، لە كاتی دژوەستانەوەیان لەگەڵ تیرۆرستانی داعش.

پێنجەم:(حەشدی شەعبی) لە ماوەی ڕابردوودا پەیوەندییەكی ناباشی هەبووە لەگەڵ (هێزی پێشمەرگەی كوردستان) تا ئەم حاڵەتە گەیشتۆتە پێكدادانی نێوانیان و شەهیدكردنی (پێشمەرگەی كوردستان) بەدەستی چەكدارانی (حەشدی شەعبی)، بەم پێیە بێت دوای لەناوبردنی (داعش) سیناریۆی هێرشكردنی (حەشدی شەعبی) بۆ سەر ئەو ناوچە كوردیانەی (هێزی پێشمەرگە) كۆنترۆڵی كردوون و بە ناوچەی دابڕاوەكان لەقەڵەم دەدرێن، پێشبینیەكی واقیعیە كە تاڕادەیەكی زۆر نزیكە لە ڕوودانەوە، بە بیانووی ئەوەی ئەم خاكە بە شێكە لە عێراق و كورد مافی ئەوەی نیە كۆنترۆِلی ئەم ناوچانە بكات.

شەشەم:(حەشدی شەعبی) و سەرجەم گروپ و پێكهاتەكانی ناوی، هێزی چەكدارن ئەوان هەموویان پێكەوە تینووی جەنگن، هەر لە پێناو جەنگكردنیش دژی پێكهاتە نەیارەكانیان دروستكروان، ئەوان یەكەم میكانیزمی كێشەكان بە جەنگ دەبینن، بۆیە دور نیە هەر پێكهاتە و هێز و دەستەیەك بچێتە سەرنگەریانەوە یان (حەشدی شەعبی) بە نەیاری خۆی ناوزەندیان بكات، ئەوە پێشبینی جەنگ و پێكدادن دەبێتە ڕاستیەكی مەیدانی.

 

2162021112016_102914972016_255.JPG

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure